Dirava ena turana ai oi lao totona, namona be ia oi diba. Oiemu turadia ese emu ladana idia diba bona idia gaukaralaia, a? Oibe. Dirava ia ura iena ladana oi diba bona oi gaukaralaia danu. Dirava ena ladana be Iehova. (Salamo 83:18; Mataio 6:9) Namona be ia ura bona ia ura lasi gaudia oi diba danu. Daidia be iena turadia bona iena inai taudia oi diba be namo. Nega bada oi atoa murinai ta oi dibaia diba. Baibel ia gwau, Iehova ita diba totona nega ita atoa be aonega karana.​​—Efeso 5:​15, 16.

Dirava ena turadia ese ia moalelaia gaudia idia karaia. Mani emu turadia oi laloa. Bema oi kara namo henidia lasi bona idia inai henia gaudia oi karaia, oi do idia tura henia noho, a? Lasi momokani! Unai hegeregerena, bema oi ura Dirava ena turana ai oi lao, namona be ia moalelaia gaudia oi karaia.​​—Ioane 4:​24.

Tomadiho iboudiai ese Dirava ena turadia ai ita lao dalana idia kehoa lasi. Iesu, Dirava ena turana namona, ese dala rua ia gwauraia. Dala ta be bada bona taunimanima amo ia honu. Unai dala be mase dekenai ia lao. Dala ma ta be maragi bona taunimanima momo lasi be ia dekenai idia raka. Unai dala be mauri hanaihanai dekenai ia lao. Unai ena anina be, bema oi ura Dirava ena turana ai oi lao, ia oi tomadiho henia dalana maorona oi diba be namo.​​—Mataio 7:​13, 14.