Hari tanobada ai idia vara gau dikadia ese idia hahedinaraia Paradaiso be kahirakahira. Baibel ia gwau Paradaiso ia mai gwauraia neganai gau dikadia do ita itaia. Hari ita be unai bamona negana lalonai ita noho! Baibel ese ia perovetalaia gaudia haida be inai:

Tuari badadia. “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” (Mataio 24:7) Unai peroveta herevana be ia guguru. Lagani 1914 amo ema bona hari, tanobada ibounai tuaridia rua bona tuari maragidia momo idia vara. Idia lalonai taunimanima milioni momo idia mase.

Gabu momo ai idia vara goreredia. “Ta ta dekenai do ia hanaia gorerena do idia vara.” (Luka 21:11) Unai ia vara, a? Oibe. Kensa gorere, kudou gorere, TB, malaria, AIDS, bona ma gorere haida ese taunimanima milioni momo idia hamasea.

Aniani lasi. Tanobada ibounai lalonai taunimanima momo herea edia aniani be hegeregere lasi. Lagani iboudiai hitolo dainai idia mase taudia be milioni momo. Unai be ma toa ta bona ia hahedinaraia Paradaiso be kahirakahira do ia mai. Baibel ia gwau: “Hitolo bada negana danu do ia vara.”​​—Mareko 13:8.

 Tano mareremarere. “Gabu idauidau dekenai . . . tano danu do ia mareremarere.” (Mataio 24:7) Unai danu be iseda negai ia guguru. Lagani 1914 amo ema bona hari, taunimanima milioni mai kahana be tano mareremarere dainai idia mase.

Taunimanima dikadia. Taunimanima ese “moni do idia mataganigani henia” bona “edia ura sibona do idia tahua.” “Lebulebu karadia idauidau do idia ura henia bada, to Dirava do idia ura henia maragi.” Natudia ese “edia tamana bona sinana do idia kamonai henia lasi.” (2 Timoteo 3:​1-5) Do oi abia dae hari taunimanima momo be unai bamona, ani? Dirava idia matauraia lasi, bona Dirava idia ura diba taudia dekenai hekwakwanai idia havaraia.

Kara dikadia. “Kara dikadia danu do idia vara gabu idauidau dekenai.” (Mataio 24:12) Oi abia dae diba kara dikadia idia vara momo, guna bamona lasi. Gabu iboudiai dekenai taunimanima idia diba, reana ta ese edia kohu do ia henaoa, do ia koidia, o do ia hadikadia.

Unai gau iboudiai ese idia hahedinaraia Dirava ena Basileia be ia kahirakahira. Baibel ia gwau: “Inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni.” (Luka 21:31) Dirava ena Basileia be dahaka? Ia be Dirava ena guba gavamanina, inai tanobada dekenai Paradaiso do ia mailaia gavamanina unai. Dirava ena Basileia ese taunimanima edia gavamani edia gabu do ia abia.​​—Daniela 2:44.