Satani bona ena demoni idia ura lasi Dirava oi hesiai henia. Idia ura taunimanima iboudiai be Dirava amo idia hakaua siri. Unai be edena dala ai idia karaia toho? Dala ta be tomadiho koikoi. (2 Korinto 11:​13-​15) Tomadiho ta be tomadiho koikoi bema Baibel ena hereva momokani ia hadibaia lasi. Tomadiho koikoi be moni koikoina bamona​​—ena toana be momokani bamona, to ia be anina lasi. Oi dekenai hekwakwanai momo ia havaraia diba.

Tomadiho edia koikoi karadia ese Iehova, kara momokani Diravana, idia hamoalea diba lasi. Iesu be tanobada ai ia noho neganai, tomadiho orea ta taudia idia ura Iesu idia hamasea. Idia laloa edia tomadiho dalana be maoro. Idia gwau: “Aiemai tamana be tamona, Dirava unai.” Iesu ese edia hereva ia abia dae, a? Lasi! Iesu ese idia ia hamaoroa: “Umui be emui tamana Satani dekena amo umui mai.” (Ioane 8:​41, 44) Hari inai negai momo idia laloa Dirava idia tomadiho henia noho, to momokani, idia ese Satani bona ena demoni idia hesiai henia!​​—1 Korinto 10:20.

 Au dikana ese huahua dikadia ia havaraia bamona, tomadiho koikoi ese kara dika idia karaia taudia ia havaraia. Taunimanima ese idia karaia kara dikadia dainai, tanobada be hekwakwanai amo ia honu. Matabodaga, heatu, henaohenao, dagedage, ala-ala, bona reipi karadia idia vara. Unai kara dikadia idia karaia taudia momo be mai edia tomadiho, to edia tomadiho ese idia ia hasiahua lasi kara namodia idia karaia totona. Dirava ena turadia ai idia lao diba lasi bema kara dikadia karaia karana idia hadokoa lasi.​​—Mataio 7:​17, 18.

Tomadiho koikoi ese taunimanima idia hadibaia kaivakuku idia tomadiho henia totona. Dirava ia gwau kaivakuku ita guriguri henia lasi. Unai be maoro. Bema ta ese oi ia hereva henia lasi to emu laulau ia hereva henia, do oi moale, a? Unai tauna be oiemu turana momokani ai ia lao diba, a? Lasi, do ia lao diba lasi. Iehova ia ura taunimanima ese ia dekenai idia hereva, idia mauri lasi kaivakuku eiava laulau dekenai lasi.​​—Esodo 20:​4, 5.

Tomadiho koikoi idia gwau tuari lalonai ma haida alaia karana be maoro. Iesu ia gwau Dirava ena turadia huanai lalokau do ia noho. Ita lalokau henia taudia ita alaia lasi. (Ioane 13:35) Taunimanima dikadia alaia karana danu be kerere. Iesu ena inai taudia be ia idia abia totona idia mai neganai, ena hahediba taudia be ia totona idia heatu karana ia koua.​​—Mataio 26:​51, 52.

Tomadiho koikoi idia gwau kara dika taudia be hel ena lahi lalonai do idia hisihisi. To, Baibel ia gwau kara dika ena davana be mase. (Roma 6:​23) Iehova be lalokau Diravana. Lalokau Diravana ese taunimanima do ia hahisia ela bona hanaihanai, a? Lasi momokani! Paradaiso lalonai, tomadiho tamona sibona do ia noho, Iehova ese ia abia dae tomadihona unai. (Apokalupo 15:4) Satani ena koikoi herevadia idia badinaia tomadiho iboudiai be do idia ore.