Dirava ena inai tauna badana be Satani Diabolo. Ia be Iehova ia gwau-edeede henia lauma tauna ta. Satani ese Dirava ia do tuari henia noho bona taunimanima dekenai hekwakwanai badadia ia havaraia. Satani be dika. Ia be koikoi tauna bona ala-ala tauna.​​—Ioane 8:​44.

Lauma taudia ma haida ese Satani idia bamoa, Dirava idia gwau-edeede henia totona. Baibel ese ia gwauraidia demoni. Satani bamona, demoni be taunimanima edia inai taudia. Idia ura taunimanima idia hahisia. (Mataio 9:​32, 33; 12:22) Iehova ese Satani bona ena demoni do ia haorea momokani. Taunimanima dekenai hekwakwanai idia havaraia negana be ia kwadogi sibona.​​—Apokalupo 12:12.

Bema oi ura Dirava ena turana ai oi lao, namona be Satani ia ura do oi karaia gaudia oi karaia lasi. Satani bona demoni ese Iehova idia inai henia. Idia be Dirava ena inai taudia, bona idia ura Dirava ena inai tauna ai oi idia halaoa. Namona be oi abia hidi, daika oi ura hamoalea​—Satani eiava Iehova. Bema oi ura mauri hanaihanai oi abia, namona be Dirava ena ura karaia karana oi abia hidi. Satani be mai ena kara bona dala momo taunimanima ia koia totona. Taunimanima momo ia do koia noho.​​—Apokalupo 12:9.