Iesu Keriso be Iehova ena Natuna bona ia lalokau henia turana namo hereana. Iesu be tanobada ai taunimanima bamona ia do noho lasi neganai, ia be guba dekenai ia noho lauma goadana ta. (Ioane 17:5) Bena tanobada dekenai ia mai, Dirava ena hereva momokani be taunimanima dekenai ia hadibaia totona. (Ioane 18:37) Ena tanobada maurina ia henia danu, kamonai taudia be kara dika bona mase amo ia hamauria totona. (Roma 6:​23) Hari Iesu be Dirava ena Basileia, tanobada dekenai Paradaiso do ia mailaia guba gavamanina, ena King.​​—Apokalupo 19:16.

Aneru danu be Dirava ena turadia. Aneru be tanobada ai taunimanima bamona edia mauri idia hamatamaia lasi. Dirava ese tanobada ia do karaia lasi neganai, guba dekenai ia havaradia. (Iobu 38:​4-7) Aneru be milioni momo. (Apokalupo 5:​11) Unai Dirava ena guba turadia idia ura taunimanima ese Iehova ena hereva momokani idia dibaia.​​—Apokalupo 14:​6, 7.

Tanobada dekenai Dirava be mai ena turadia danu; ia gwauraidia ena witnes taudia. Kota lalonai witnes tauna be tau ta o gau ta dekenai ia diba gauna ia gwauraia. Iehova ena Witnes taudia ese Iehova bona ena ura dekenai idia diba gaudia be ma haida dekenai idia hadibaia. (Isaia 43:10) Aneru hegeregeredia, Witnes taudia idia ura oi idia durua, Iehova ena hereva momokani oi dibaia totona. Idia ura oi danu be Dirava ena turana ai oi lao.