Lagani rua bamona lalonai Iesu be ia haroro goadagoada. Hari iena gaukara do ia hamaragia bona do ia laga-ani, a? Lasi, to ena haroro gaukara ia habadaia, “[Galilea ena] siti bona hanua ibounai dekenai ia lao, bona edia sinagoga lalonai taunimanima ia hadibaia bona Basileia ena sivarai namona ia harorolaia. Bona taunimanima edia gorere idauidau ia hanamoa.” (Mataio 9:35) Ia itaia gauna ese ena lalona ia hagoadaia haroro gaukara ia habadaia totona. To edena bamona unai do ia karaia?

Iesu ena laolao lalonai, ia itaia taunimanima be hereva momokani amo heduru bona goada idia abia be namo. Idia be mamoe naria tauna ese ia naria lasi mamoe bamona, haida ese idia haberoa bona idia dadaraia. Ia hebogahisi henidia bona ena hahediba taudia ia hamaoroa: “Oibe, uma aniani gogoa gaukarana be bada, to gaukara taudia be momo lasi. Unai dainai gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.”​—Mataio 9:37, 38.

Iesu ia diba dahaka do ia karaia. Iena aposetolo 12 ia boiria bona rua rua ia haridia, idia haroro totona. Bena ia haganidia: “Idau bese taudia dekenai do umui lao lasi, bona Samaria ena siti ta lalonai umui vareai lasi, to Israela besena ena boio mamoe sibona dekenai do umui lao. Umui lao neganai umui haroro, umui gwau: ‘Guba Basileia be ia kahirakahira vadaeni.’”​—Mataio 10:5-7.

Do idia harorolaia Basileiana be guna Iesu  ese guriguri dalana ia hadibaia neganai, ia herevalaia gauna. “Basileia be ia kahirakahira,” anina be Dirava ese ia abia hidi King, Iesu Keriso, be idia huanai ia noho. To, dahaka ese do ia hamomokania iena hahediba taudia be unai Basileia gavamanina ena gwaukau taudia? Iesu ese ena hahediba taudia dekenai siahu ia henia, gorere taudia do idia hanamoa bona mase taudia do idia hatorea isi lou, davana lasi. To edena dala ai aposetolo taudia be sibona edia dabu gaudia, hegeregere aniani do idia abia?

Iesu ese ena hahediba taudia ia hamaoroa edia laolao totona tauanina durua gaudia do idia abia lasi. Edia puse lalonai golo, siliva eiava kopa do idia udaia lasi. Danu, aniani puse, eiava dabua o tamaka do idia abia lasi. Dahaka dainai? Iesu ese ia hamaorodia: “Gaukara tauna dekenai aniani idia henia be maoro.” (Mataio 10:10) Idia harorolaia sivaraina idia abia dae taudia ese hahediba taudia edia dabu gaudia do idia henia. Iesu ia gwau: “Ruma ta lalonai umui vareai neganai, unuseniai umui noho ela bona unai gabu umui rakatania.”​—Mareko 6:10.

Iesu ese danu Basileia ena sivarai be ruma taudia dekenai do idia gwauraia dalana ia hadibaia, ia gwau: “Ruma umui vareai neganai, ruma taudia umui hanamoa. Bema ruma taudia idia kamonai, emui maino be idia latanai do ia noho, to bema idia kamonai lasi, emui maino do umui abia lou. Bema ta ese umui ia abia dae lasi eiava emui hereva ia kamonai lasi, unai ruma eiava siti umui rakatania neganai, emui aena ena kahu do umui kokia.”​—Mataio 10:12-14.

Reana siti ta eiava hanua ta ese idia harorolaia sivaraina idia dadaraia diba. Unai gabu dekenai dahaka do ia vara? Iesu ia hahedinaraia idia ese hahemaoro metauna do idia davaria. Ia gwau: “Umui lau hamaoroa momokani, Hahemaoro Dinana ai, unai siti ena dika davana ese Sodoma bona Gomora edia dika davana do ia hereaia.”​—Mataio 10:15.