Taravatu hadibaia taudia bona Farisea taudia idia gwau Iesu be Dirava ena siahu amo demoni ia lulua lasi neganai, idia be lauma helaga idia gwauraia dika. Vadaeni daika ena kahanai do idia gini—Dirava eiava Satani? Iesu ia gwau: “Bema oi be au namona, emu huahua do ia namo, bema oi be au dikana, emu huahua do ia dika.”​—Mataio 12:33.

Iesu ese demoni ia luludia neganai, ia be gaukara namona ia karaia, to taunimanima idia gwau ia be Satani ia hesiai henia. Iesu ena Ororo Harorona ai ia gwau, bema huahua be namo, anina be au be ia namo, ia dika lasi. Unai dainai, Farisea taudia edia huahua, Iesu samania koikoi herevadia unai, ese dahaka ia hahedinaraia? Idia be idia dika. Iesu ese ia hamaorodia: “Gaigai ena natudia e, umui be kara dika taudia dainai, edena bamona gau namodia umui herevalaia diba? Kudouna ai idia honu gaudia be uduna ese ia gwauraia.”​—Mataio 7:16, 17; 12:34.

Oibe, iseda hereva ese iseda kudouna ai idia noho gaudia idia hahedinaraia, bona unai hegeregerena Dirava ese ita do ia hahemaoro henia. Unai dainai Iesu ia gwau: “Umui lau hamaoroa, taunimanima ese idia gwauraia anina lasi herevadia ibounai dainai, Hahemaoro Dinana ai Dirava ese idia do ia kota henia, emu hereva dainai oi do ia gwauraia kara maoromaoro tauna eiava emu hereva dainai, oi do ia gwauraia dika tauna.”​—Mataio 12:36, 37.

Ena be Iesu ese siahu karadia momo ia karaia, to taravatu hadibaia taudia bona Farisea taudia idia gwau: “Hadibaia Tauna e, ai ura oi amo toa ta ai itaia.” Herevana Iesu ena hoa karadia idia itaia eiava lasi, to taunimanima momo ese idia itaia bona hamomokania. Unai dainai Iesu ese unai Iuda tomadiho gunalaia taudia ia hamaoroa: “Kara dika bona Dirava badinaia lasi uruna be toa ta idia tahua noho, to idia dekenai toa ta do lau hahedinaraia lasi, peroveta tauna Iona ena toa sibona.”​—Mataio 12:38, 39.

Iesu ia ura lasi ena hereva idia daradaralaia dainai, ia gwau: “Iona be gwarume badana ena bogana lalonai dina toi bona hanuaboi toi ia noho hegeregerena, taunimanima ena Natuna be mase gurina lalonai dina toi bona hanuaboi toi do ia noho.” Iona be gwarume badana ese ia hadonoa, to gabeai ia raka-lasi, unai be hegeregere mase amo ia toreisi lou. Iesu ia peroveta ia danu be do ia mase bona dina toi murinai do ia toreisi lou. Gabeai unai ia vara neganai,  Iuda tomadiho gunalaia taudia ese “Iona ena toa” idia dadaraia, bona idia helalo-kerehai lasi bona edia kara idia haidaua lasi. (Mataio 27:63-66; 28:12-15) To “Nineva taudia” be Iona ese ia haroro henidia murinai idia helalo-kerehai. Unai dainai idia ese inai uru do idia gwauraia dika. Danu, Iesu ia gwau Sieba ena kwini danu ese unai uru do ia gwauraia dika. Ia ura Solomona ena aonega herevadia ia kamonai bona ia moale. To Iesu ia gwau, hari “Solomona ia hereaia tauna be iniseniai.”​—Mataio 12:40-42.

Iesu ese unai uru dikana be lauma dikana ese ia biagua bena ia rakatania tauna ida ia hahegeregerea. (Mataio 12:45) Unai tauna ena lalona be gau namodia amo ia hahonua lasi dainai, lauma dikana ia giroa mai bona lauma dikadia 7 ia abia vareai danu. Unai hegeregerena, Dirava ese Israela besena ia hagoevaia bona ia hamaoromaoroa—lauma dikana ese ia rakatania tauna bamona. To idia ese Dirava ena peroveta taudia idia dadaraia, bona Dirava ena siahu amo hoa karadia ia karaia tauna, Iesu, idia inai henia. Unai dainai unai bese ena dika be bada herea, guna bamona lasi.

Iesu ia hereva noho lalonai, ena sinana bona tadidia idia mai. Iesu badinai idia helai taudia idia gwau: “Emu sinana bona tadikaka be murimuri ai idia gini, idia ura oi idia itaia.” Bena ia hahedinaraia iena hahediba taudia ia lalokau henia bada. Idia ia poinia, ia gwau: “Egu sinana bona egu tadikaka be inai, Dirava ena hereva idia kamonai bona idia badinaia taudia.” (Luka 8:20, 21) Unai amo ia hahedinaraia, ena be iena varavara ia lalokau henia bada, to ia bona ena hahediba taudia huanai ia noho hetura karana ia laloa bada. Oibe, iseda hetura karana iseda tadikaka taihu ida ia goada be namo, bema haida be ita dainai idia daradara eiava ita bona iseda gaukara namodia idia gwauraia dika!