Nega sisina lalonai, Iesu be Galilea sibona ai ia haroro badina unuseniai momo idia kamonai, Iudea ai bamona lasi. Danu, Ierusalema dekenai ia noho bona Sabati dinana ai tau ta ia hanamoa neganai, “Iuda taudia be dala idia tahua noho ia idia hamasea totona.”​—Ioane 5:18; 7:1.

Hari be September eiava October 32 C.E., bona Ruma Maragidia o Au Raurau Rumadia Ena Aria be ia kahirakahira. Inai aria be dina 7 lalonai idia karaia, bona dina namba 8 ai hebou helagana idia karaia. Inai aria be uma aniani haboua gaukara ena dokonai idia karaia, bona unai be moale bada negana bona Dirava idia tanikiu henia.

Iesu ena tadikaka—Iamesi, Simona, Iosepa, bona Iuda—ese ia idia hamaoroa: “Inai gabu oi rakatania bona Iudea dekenai oi lao.” Ierusalema be tomadiho gabuna badana. Lagani ta ta ai, aria toi idia karaia neganai, unai siti be taunimanima amo ia honu. Ena tadikaka idia gwau: “Tau ta ia ura taunimanima ese ia idia diba, ia be hunia dekenai gau ta do ia karaia lasi. Bema inai gaudia oi karaia, namona be taunimanima ibounai vairanai oi karaia.”​—Ioane 7:3, 4.

Iesu ena tadikaka 4 be “ia idia abidadama henia lasi” ia be Mesia. To idia ura aria dekenai hoa karadia do ia karaia bona hutuma ese do idia itaia. Iesu be unai ena dika ia diba dainai, idia ia hamaoroa: “Tanobada ese umui ia inai henia be anina lasi, to lau ia inai henia, badina ena kara dika lau gwauraia hedinarai. Aria dekenai umui lao, to lau be do lau daekau lao lasi, badina egu nega be ia do ginidae lasi.”​—Ioane 7:5-8.

Iesu ena tadikaka be hutuma ida idia lao, bena dina haida murinai, Iesu bona ena hahediba taudia be hehuni ai idia lao, taunimanima ese idia itaia lasi totona. Idia be Samaria ia lao henia dalana idia badinaia, to Ioridane Sinavai ena dala idia badinaia lasi. Iesu bona ena hahediba taudia be Samaria ai do idia noho dainai, gwaukau taudia ia siaia guna noho gabuna idia hegaegaelaia totona. Samaria hanuana ta ai idia noho taudia ese idia abidia dae lasi o heabidae karana idia hahedinaraia lasi, badina Iesu be Iuda taudia edia aria totona Ierusalema dekenai ia lao noho. Iamesi bona Ioane be mai badu ida idia henanadai: “Lohiabada e, oi ura guba amo lahi ai boiria diho, idia ia hadikaia ore totona, a?” (Luka 9:54) Unai idia hereva dainai, Iesu ese ia gwau henidia, bena idia raka noho.

Dala ai, taravatu hadibaia tauna ta be Iesu dekenai ia gwau: “Hadibaia Tauna e, oi lao gabudia ibounai dekenai oi do lau badinaia.” Iesu ia haere: “Uda sisia be mai edia kohua bona guba manudia be mai edia ruma, to taunimanima ena Natuna ena kwarana ia atoa gabuna be lasi.” (Mataio 8:19, 20) Iesu ia ura taravatu hadibaia tauna dekenai ia hahedinaraia  bema ia ura iena murinai ia raka, ia be nega aukadia do ia davaria. Toana be unai taravatu hadibaia tauna ia hekokoroku dainai, unai mauri dalana ia abia dae lasi. Unai dainai sibona ita nanadaia diba, ‘Lau be mai lalona ibounai ida Iesu murinai lau raka, a?’

Tau ma ta dekenai Iesu ia gwau: “Lau murinai oi raka.” Unai tauna ia haere: “Lohiabada e, mani lau lao bona egu tamana lau guria guna.” Iesu be unai tau ena noho dalana ia diba dainai, ia gwau: “Mase taudia ese mase taudia idia guria be namo, to oi lao bona gabu ibounai dekenai Dirava ena Basileia oi harorolaia.” (Luka 9:59, 60) Iena tamana be ia do mase lasi. Bema tamana ia mase, unai tau be unuseniai Iesu ida do ia herevahereva lasi. Unai tauna be ia hegaegae lasi ena mauri lalonai Dirava ena Basileia ia atoa guna totona.

Ierusalema ena dala dekenai idia lao noho lalonai, tau ma ta be Iesu dekenai ia gwau: “Lohiabada e, oi murinai do lau raka, to mani lau lao bona egu ruma bese taudia lau bamahuta henidia guna.” Iesu ia haere: “Tano makohia gauna ia doria lao bona murinai idia noho gaudia ia itaia tauna, be ia hegeregere lasi Dirava ena Basileia totona.”​—Luka 9:61, 62.

Iesu ena hahediba taudia momokanidia ai idia ura lao taudia be Basileia ena gaukara do idia laloa bada. Bema tano makohia tauna be vaira kahana ia itaia lasi, ia makohia tano be do ia gageva. Bema murina kahana itaia totona tano makohia gauna ia atoa diho, ena uma gaukara do ia haorea lasi. Unai hegeregerena, bema ta ia giroa inai tanobada gaudia ia itaia totona, mauri hanaihanai ia lao henia dalana amo ia raka siri diba.