Unai dina ai Iesu be gaukara momo ia karaia. Dekapoli kahanai bouti amo ia hanaia mai murinai, rara gorere hahinena ia hanamoa bona Iairo ena natuna ia hatorea isi lou. To ena gaukara be ia ore lasi. Iairo ena ruma ia rakatania neganai, matakepulu taudia rua be ia murinai idia raka, idia boiboi: “Davida ena Natuna e, ai oi hebogahisi henia.”​—Mataio 9:27.

Unai tatau rua ese Iesu idia gwauraia “Davida ena Natuna” neganai, idia abia dae Iesu be Davida ena terona do ia abia tauna bona ia be Mesia. To Iesu be edia boiboi ia laloa lasi, reana ia ura itaia bema ia do idia noia loulou, bona unai idia karaia. Iesu be ruma ta ia vareai neganai, ia murinai idia vareai danu. Iesu ese ia nanadaidia: “Umui abia dae momokani emui matana lau kehoa diba, a?” Mai abidadama ida idia gwau: “Oibe, Lohiabada.” Vadaeni Iesu ese edia matana ia dogoatao bona ia gwau: “Emui abidadama hegeregerena, umui dekenai unai do ia vara.”​—Mataio 9:28, 29.

Maoromaoro idia itaia diba! Guna haida ia hagania hegeregerena, Iesu ese ia hamaorodia ia karaia gauna do idia herevalaia lasi. To idia moale bada dainai, ena sivarai be gabu ibounai dekenai idia gwauraia.

Unai tatau rua be ruma idia rakatania noho lalonai, haida ese tau ta idia mailaia; lauma dikana ese ia biagua dainai ia herevahereva diba lasi. Iesu ese lauma dikana ia lulua, bena maoromaoro ia hereva diba. Hutuma idia hoa, idia gwau: “Israela dekenai inai bamona kara be nega ta ai itaia lasi.” Farisea taudia danu idia noho. Unai hoa karana idia hakoikoia diba lasi dainai, Iesu idia samani koikoi lou, idia gwau: “Ia be demoni edia lohia ena siahu amo demoni ia luludia.”​—Mataio 9:33, 34.

Unai murinai, Iesu be ena hanua korikorina Nasareta dekenai ia giroa lou; ena hahediba taudia ese idia bamoa. Lagani ta gunanai, unuseniai sinagoga lalonai momo ia hadibaia. Taunimanima be ena hereva idia moalelaia, to gabeai ena hahediba herevadia dainai idia moale lasi bona idia ura ia idia hamasea. Hari Iesu ia ura ena hanua taudia ia durua toho lou.

Sabati ai, sinagoga dekenai ia giroa lou idia ia hadibaia totona. Momo idia hoa, bona idia henanadai: “Inai tauna ena aonega bona siahu karadia be edeseni amo ia abia?” Idia gwau: “Inai be kapenta tauna ena natuna, ani? Iena sinana ena ladana be Maria, bona ena tadikaka be Iamesi, Iosepa, Simona, bona Iuda, ani? Bona ena taihudia be ita danu idia noho, ani? Vadaeni edeseni amo unai aonega ia abia bona unai siahu karadia ia karaia?”​—Mataio 13:54-56.

Idia laloa Iesu be idia hegeregerena. Reana idia gwau: ‘Ia be iseda vairana dekenai ia tubu daekau, ma edena bamona ia be Mesia?’ Herevana hamomokania gaudia be momo—Iesu ena aonega bada bona siahu karadia—to ia idia dadaraia. Iena varavara bona Nasareta taudia be ia idia diba namonamo, to ia idia abidadama henia lasi. Unai dainai Iesu ese ia hamaorodia: “Peroveta tauna be gabu ibounai dekenai idia matauraia, to iena hanua eiava ruma bese taudia ese ia do idia matauraia lasi.”​—Mataio 13:57.

Oibe, Iesu ia hoa, badina idia abidadama lasi. Unai dainai unuseniai hoa karadia ia karaia lasi, “to gorere taudia haida sibona latanai ena imana ia atoa bona ia hanamodia.”​—Mareko 6:5, 6.