Dekapoli ai hutuma be Iesu dekenai idia mai, unai be Galilea Gohu ena ist kahanai. Idia mai iena hereva idia kamonai bona edia gorere ia hanamoa totona, bona bosea badadia mai aniani idia mailaia danu.

Dina haida murinai, Iesu ese ena hahediba taudia ia hamaoroa: “Hutuma lau hebogahisi henidia, badina dina toi lau ida idia noho vadaeni bona edia aniani be ia ore. Bema mai hitolo danu edia ruma dekenai lau siaidia lao, dala dekenai do idia moru. Bona idia haida be gabu daudau amo idia mai.” Hahediba taudia idia henanadai: “Inai taunimanima lasi gabuna ai, ta ese edeseni amo paraoa ia abia diba inai taudia ia ubua totona?”​—Mareko 8:2-4.

Iesu ia haere: “Umui dekenai paraoa hida idia noho?” Hahediba taudia idia gwau: “Paraoa 7 bona gwarume maragidia haida.” (Mataio 15:34) Bena Iesu ese hutuma ia hamaoroa, tano dekenai do idia helai. Paraoa bona gwarume ia abia, Dirava ia guriguri henia, bena hahediba taudia ia henia idia hariharilaia totona. Taunimanima ibounai idia aniani bona idia boga-kunu. Ena be tatau 4,000 bona hahine bona natudia danu idia aniani, to aniani oredia be bosea badadia 7 lalonai idia hahonua!

Iesu ese hutuma ia siaia murinai, ia bona ena hahediba taudia be bouti idia guia bona Magadana dekenai idia lao, unai be Galilea Gohu ena west kahanai. Unai gabu ai, Farisea bona Sadukea taudia be Iesu tohoa totona, idia hamaoroa toa ta be guba amo do ia hahedinaraia.

Edia lalohadai ia diba dainai, Iesu ia gwau: “Dina ia diho neganai umui gwau, ‘Kerukeru dina be do ia namo badina guba ia kakakaka,’ bona daba neganai, umui gwau, ‘Hari dina be keru bona medu negana, badina guba be ia kakakaka bona ori ese ia koua.’ Umui be guba ena toana ena anina umui gwauraia hedinarai diba, to inai nega ena toana ena anina umui gwauraia hedinarai diba lasi.” (Mataio 16:2, 3) Bena Iesu ese Farisea bona Sadukea taudia ia hamaoroa toa ta do ia henidia lasi, to Iona ena toa sibona.

Iesu bona ena hahediba taudia be bouti idia guia bona Betesaida dekenai idia lao, unai be gohu ena not ist kahanai. Idia lao lalonai, hahediba taudia idia itaia edia paraoa be momo lasi, to tamona sibona. Iesu ese Farisea taudia bona Sadukea taudia, Heroda ena orea taudia unai, edia hereva ia laloatao dainai, iena hahediba taudia ia hamaoroa: “Heroda bona Farisea taudia edia isti dainai do umui gima noho.” Hahediba taudia idia laloa Iesu be unai ia gwauraia, badina paraoa idia mailaia lasi. Iesu be unai ia diba dainai, ia gwau: “Dahaka dainai paraoa umui abia lasi dainai umui hepapahuahu?”​—Mareko 8:15-17.

Vanegai Iesu ese taunimanima tausen be paraoa amo ia ubua. Unai dainai, namona be hahediba  taudia idia diba ia be paraoa korikorina ia herevalaia lasi. Ia nanadaidia: “Inai umui laloatao lasi, a? Tatau 5,000 totona paraoa 5 lau makohia neganai, paraoa oredia be bosea hida lalonai umui hahonua?” Idia haere: “Bosea 12.” Iesu ma ia gwau: “Tatau 4,000 totona paraoa 7 lau makohia neganai, paraoa oredia be bosea badadia hida lalonai umui hahonua?” Idia gwau: “Bosea 7.”​—Mareko 8:18-20.

Iesu ia henanadai: “Dahaka dainai umui laloparara lasi, lau be paraoa lau herevalaia lasi?” Ma ia gwau: “Namona be Farisea bona Sadukea taudia edia isti dainai do umui gima.”​—Mataio 16:11.

Vadaeni hahediba taudia idia laloparara. Isti idia gaukaralaia paraoa hatubua totona. Iesu ese ia herevalaia isti be kara gageva ia laulaulaia. Ia ese hahediba taudia ia sisiba henia “Farisea bona Sadukea taudia edia hahediba herevadia dainai do idia gima,” badina unai be mai ena dika.​—Mataio 16:12.