Iesu be Dekapoli amo ia giroa mai ena sivarai be Galilea Gohu ena notwest kahanai idia noho taudia ese idia kamonai. Momo idia kamonai Iesu ese lai gubana bona hurehure ia hadokoa, bona haida idia kamonai ia ese tau ta amo lauma dikadia ia lulua. Unai dainai “taunimanima hutuma” be kone badinai idia haboua, reana Kaperanauma kahirakahira ai, Iesu idia welkam henia totona. (Mareko 5:21) Bouti amo ia diho neganai, idia be mai moale bada ida ia idia naria.

Iesu ia ura itaia tauna ta be Iairo, ia be sinagoga ena ofesa tauna ta. Iesu ena aena badinai ia tui diho bona ia noinoi loulou: “Egu natuna kekeni maragina be ia gorere bada herea. Mani oi mai bona emu imana be ia latanai oi atoa, unai amo do ia namo lou bona do ia mauri noho.” (Mareko 5:23) Iairo ese Iesu ia noia ena mauri lagani 12 kekeni do ia durua. Ia be ena natuna tamona sibona bona ia lalokau henia bada. Iesu be dahaka do ia karaia?​—Luka 8:42.

Iesu be Iairo ena ruma dekenai ia lao noho lalonai, gau ma ta ia vara. Iesu idia bamoa taudia momo be idia moale, idia laloa hoa karana ma ta do ia karaia. To, hutuma huanai hahine ta be sibona ena gorere badana ia laloa.

Lagani 12 lalonai, inai Iuda hahine be rara halusia gorerena ia abia. Doketa momo edia heduru ia tahua, bona idia gwauraia muramura dekenai ena moni ibounai ia haorea. To “ena gorere be ia bada ia lao.”​—Mareko 5:26.

Unai gorere ese iena tauanina ia hamanokaia bada, bona ia hemarai bona ma haida ia bamoa lasi. Bema hahine ta be unai gorere ia abia, do ia herevalaia lasi. Ma danu, Mose ena Taravatu henunai, hua gorere ia abia hahinena be ia miro. Bema ta ese ia eiava iena dabua mai ena rara ia dogoatao, namona be ia digu bona do ia goeva lasi ela bona dina ia diho.​—Levitiko 15:25-27.

Unai hahine be “Iesu ena sivarai ia kamonai” dainai, ia tahua. To ia miro dainai, hunia dalanai hutuma huanai ia raka, bona sibona dekenai ia gwau: “Bema ena dabua sibona lau dogoatao, do lau namo.” Iesu ena dabua dorina ia dogoatao neganai, maoromaoro ia mamia ena “gorere dikana ia ore.”​—Mareko 5:27-29.

Bena Iesu ia gwau: “Daika ese lau ia dogoatao?” Hahine be unai hereva ia kamonai neganai, ena hemami mani oi laloa! Petero ia gwau: “Hutuma be oi idia hagegea bona oi dekenai idia kamokau noho.” Vadaeni dahaka dainai Iesu ia henanadai, “Daika ese lau ia dogoatao?” Iesu ia gwau: “Ta ese lau ia dogoatao, badina lau diba siahu be lau amo ia raka-lasi.”​—Luka 8:45, 46.

Hahine ia laloparara ia hunia diba lasi dainai, mai gari bona heudeheude ida Iesu vairanai ia tui diho. Taunimanima vairanai ena gorere bona ia namo dalana ia herevalaia. Iesu ese ia hebogahisi henia bona ia hamaoroa: “Natugu e, emu abidadama ese oi ia hanamoa vadaeni. Mai maino ida oi lao bona unai gorere dikana ese oi do ia hahisia lou lasi.”​—Mareko 5:34.

Momokani, Dirava ese ia abia hidi tanobada do ia lohiaia Tauna be mai ena hebogahisi, taunimanima ia laloa bada, bona mai ena siahu idia ia durua totona!