Iesu bona ena hahediba taudia be not kahana amo Galilea dekenai idia lao. Siahu negana ia matamaia dainai witi be edia anina idia atoa. Hahediba taudia idia hitolo dainai, witi ena anina haida idia kokia bona idia ania. To unai be Sabati dinana, bona Farisea taudia be idia karaia karana idia itaia.

Ierusalema ai, guna Iuda taudia haida be idia ura Iesu idia hamasea, idia gwau ia ese Sabati taravatuna ia utua. Bona hari Farisea taudia be iena hahediba taudia edia kara dainai Iesu idia gwauraia dika. Idia gwau: “Itaia! Oiemu hahediba taudia be Sabati dinana ai idia taravatua gauna idia karaia noho.”​—Mataio 12:2.

Farisea taudia idia gwau, witi idia kokia bena imana dekenai idia dahua bona ania be witi gogoa bona kwadia gaukarana hegeregerena. (Esodo 34:21) Sabati ai do idia karaia lasi gaukaradia totona taravatu idia atoa dainai, taunimanima dekenai metau idia atoa, to matamanai Sabati be moale bona ta ta ena abidadama hagoadaia negana. Edia lalohadai kererena hamaoromaoroa totona, Iesu ese haheitalai haida ia gwauraia, unai amo ia hahedinaraia Iehova Dirava ia ura lasi ia atoa Sabati taravatuna be unai dala ai idia badinaia.

Ia gwauraia haheitalai ta be Davida bona ena bamodia edia sivarai. Idia hitolo neganai, dubu helaga dekenai idia lao bona paraoa helagadia idia ania. Unai paraoa be hahelaga taudia ese Iehova ena vairana amo idia kokia vadaeni, bona ena gabunai paraoa matamatadia idia atoa. Bona paraoa gunana be hahelaga taudia ese do idia ania. To Davida bona ena tatau be idia hitolo bada dainai unai paraoa idia  ania, bona idia ia gwauraia dika lasi.​—Levitiko 24:5-9; 1 Samuela 21:1-6.

Haheitalai iharuana ai Iesu ia gwau: “Taravatu dekenai umui duahia lasi, a? Sabati dinana ai, hahelaga taudia be dubu helaga lalonai idia gaukara, to idia kerere lasi.” Anina be Sabati ai, dubu helaga lalonai hahelaga taudia ese boubou totona animal idia aladia bona gaukara ma haida idia karaia. Iesu ia gwau: “To umui lau hamaoroa, dubu helaga ia hereaia tauna ta be iniseniai.”​—Mataio 12:5, 6; Numera 28:9.

Iesu ese ena hereva ena anina hahedinaraia totona Toretore Helagadia ia gaukaralaia, ia gwau: “Bema umui be inai Toretore Helagana ena anina umui lalopararalaia, ia gwau, ‘Lau be hebogahisi lau ura, to boubou gauna lasi,’ umui ese kerere lasi taudia do umui gwauraia dika lasi.” Ma ia gwau: “Badina taunimanima ena Natuna be Sabati ena Lohiabada.” Iesu be vaira nega ai lagani 1,000 lalonai mai maino ida Basileia do ia lohiaia negana ia herevalaia.​—Mataio 12:7, 8; Hosea 6:6.

Lagani momo lalonai, taunimanima be Satani ena igui henunai idia noho dainai, tuari bona dagedage karadia be bada. To Keriso ena lohia lagani 1,000 lalonai, ia ese laga-ani do ia henia, mai ura bada ida ita naria negana unai!