Iesu ese tauanina gudu gorere tauna ia hanamoa murinai, ia be Farisea tauna ena ruma ai ia do noho. Iesu ia itaia aniani totona idia mai taudia ma haida be helai gabu namodia idia abia hidi. Unai dainai ia laloa unai be nega namona manau karana ia herevalaia totona.

Iesu ia gwau: “Ta be headava aria dekenai oi ia boiria neganai, namo lasi gabu namo hereana ai oi helai. Reana oi ia hereaia tauna ta ia boiria danu. Bena umui ia boiria tauna be do ia mai bona oi dekenai do ia gwau, ‘Inai tauna be oi helai gabunai do ia helai.’ Bena mai hemarai danu do oi lao murina kahanai do oi helai.”​—Luka 14:8, 9.

Iesu ma ia gwau: “Oi idia boiria neganai, oi lao bona murina kahanai oi helai, unai amo oi ia boiria tauna ia mai neganai, oi dekenai do ia gwau, ‘Egu turana e, vairana kahanai oi helai.’ Bena vadivadi taudia ibounai ese oi do idia matauraia.” Unai be kara namo hahedinaraia karana sibona lasi. Iesu ia gwau: “Badina sibona ia abia isi tauna be do idia hamanaua bona sibona ia hamanaua tauna be do idia abia isi.” (Luka 14:10, 11) Oibe, Iesu ese ena kamonai taudia ia hagoadaia manau karana idia hahedinaraia totona.

Bena Iesu be ia ia boiria Farisea tauna dekenai gau ma ta ia hadibaia. Ia hamaoroa daidia ia boiria be namo bema ia ura Dirava ena lalonamo ia abia. Ia gwau: “Dina tubu aniani eiava adorahi aniani oi hegaegaelaia neganai, namo lasi emu turadia o tadikaka o varavara, eiava oi badinai idia noho taga taudia oi boiria. Dika gabeai, idia ese oi do idia boiria bona emu heabidae karana idia haloua. To aria ta oi karaia neganai, ogogami taudia, imana dika taudia, aena dika taudia, bona matakepulu taudia oi boiria, bona do oi moale, badina idia dekenai gau ta ia noho lasi emu heabidae karana idia haloua totona.”​—Luka 14:12-14.

Vaia aria ta ita hegaegaelaia neganai, iseda turadia, varavara eiava dekena taudia ita boiria, bona Iesu ia gwau lasi unai be kerere. To Iesu ia hahedinaraia dabu taudia, hegeregere ogogami, aena dika, o matakepulu taudia dekenai aniani henia karana be hahenamo badana. Iesu ese Farisea tauna ia hamaoroa: “Kara maoromaoro taudia idia toreisi lou neganai, emu davana do oi abia.” Vadivadi tauna ta ia gwau: “Dirava ena Basileia lalonai ia aniani tauna be do ia moale.” (Luka 14:15) Ia laloparara unai be hahenamo badana. To ibounai edia lalohadai be iena hegeregerena lasi, unai dainai Iesu ese parabole ta ia gwauraia:

“Tau ta be aria badana ta ia karaia bona taunimanima momo ia boiria. . . . Ena hesiai tauna ia siaia lao bona ia boiria taudia dekenai ia gwau, ‘Umui mai, badina gau ibounai idia hegaegae vadaeni.’ To idia ibounai ese ekskius herevadia idia gwauraia. Tau ginigunana be ia dekenai ia gwau, ‘Lau be tano ta lau hoia bona do lau lao itaia. Lau sori bada, do lau mai lasi.’ Bona ma ta ia gwau, ‘Lau be boromakau 10 lau hoia bona do lau lao itaia. Lau sori bada, do lau mai lasi.’ To ma ta ia gwau, ‘Harihari sibona lau headava, unai dainai lau mai diba lasi.’”​—Luka 14:16-20.

Unai be ekskius herevadia! Ta ese tano ta o animal ia do hoia lasi neganai, ia sekea namonamo guna, unai dainai gabeai ia itaia lou be anina lasi. Tau ihatoina be ia headava vadaeni dainai, unai ese ia koua lasi be namo mai anina bada boiboina ia abia dae totona. Biaguna ese unai ekskius herevadia ia kamonai neganai, mai badu ida ena hesiai tauna ia hamaoroa:

 “Oi lao haraga siti ena dala badadia bona maragidia dekenai, bona ogogami taudia, imana dika taudia, matakepulu taudia bona aena dika taudia oi hakaudia mai.” Hesiai tauna be unai ia karaia, to ruma ia honu lasi. Bena biaguna be ena hesiai tauna ia hamaoroa: “Dala badadia bona maragidia dekenai oi lao bona taunimanima oi noia goadagoada idia mai totona, unai amo egu ruma do ia honu. Badina umui lau hamaoroa, matamanai lau boiria taudia ta be egu aria dekenai do idia aniani lasi.”​—Luka 14:21-24.

Unai parabole amo Iesu ese ia hahedinaraia, Iehova Dirava be Iesu Keriso amo guba Basileia do idia abia taudia ia boiria. Iesu ese Iuda tomadiho gunalaia taudia ia boiria guna. Iesu ena haroro gaukara lalonai, idia momo be unai boiboi herevana idia dadaraia. To unai boiboi be idia dekenai ia doko lasi. Iesu ese ia hahedinaraia nega iharuana boiboi herevana do ia karaia, bona unai be Iuda besena ena ogogami taudia bona idau bese taudia totona. Unai murinai boiboi ihatoina, unai be boiboi dokona, Iuda taudia idia laloa Dirava ese ia ura henidia lasi taudia do ia boiria.​—Kara 10:28-48.

Oibe, Iesu ena hereva ese vadivadi tauna ena hereva ia hamomokania. Unai tauna ia gwau: “Dirava ena Basileia lalonai ia aniani tauna be do ia moale.”