Iesu bona ena hahediba taudia be Galilea amo Ioridane Sinavaina idia hanaia bona Perea amo saut kahana idia lao. Guna Perea ai Iesu ese Farisea taudia dekenai Dirava ena taravatu divos karana dekenai ia gwauraia. (Luka 16:18) Iesu tohoa totona unai hereva ma idia gwauraia lou.

Mose ia gwau tau ta be ena hahine ena “kara dikana ta” dainai ia divosia diba. (Deuteronomi 24:1) Divos karana dekenai taunimanima edia lalohadai be idauidau. Haida idia laloa, kerere maragidia dainai ta ia divos diba. Unai dainai Farisea taudia idia henanadai: “Badina idauidau dainai tau ta ese ena hahine ia divosia be maoro, a?”​—Mataio 19:3.

Iesu be taunimanima edia lalohadai ia gwauraia lasi, to mai aonega ida Dirava ese headava ia karaia ena badina ia herevalaia. Ia gwau: “Umui duahia lasi, a? Matamana negana amo, idia ia havaraia tauna ese idia ia karaia tau bona hahine, bona ia gwau: ‘Unai dainai tau ese ena tamana bona sinana do ia rakatania bona ena hahine danu do ia hakapua, bona idia ruaosi be tauanina tamona ai do idia lao.’ Vadaeni idia be rua lasi, to tauanina tamona. Unai dainai Dirava ese ia hakapua taudia be ta ese do ia hapararaia lasi be namo.” (Mataio 19:4-6) Dirava ese Adamu bona Heva edia headava ia karaia neganai, ia gwau lasi edia headava idia hadokoa diba.

Vadaeni Farisea taudia ese Iesu idia nanadaia: “Dahaka dainai Mose be oda ia henia, tau ta ese hahine dekenai divos pepana do ia henia bena hahine do ia siaia?” (Mataio 19:7) Iesu ese ia hamaorodia: “Emui kudouna ia auka dainai, Mose ese gwaumaoro ia henia umui ese emui adavana umui divosia totona, to matamana negana amo be unai bamona lasi.” (Mataio 19:8) “Matamana negana” be Mose ena nega lasi; unai be Dirava ese Eden ai headava ia hamatamaia negana.

Bena Iesu ese inai mai anina bada herevana ia gwauraia: “Umui lau hamaoroa, bema tau ta be matabodaga karadia [Grik, por·nei′a] dainai lasi, to badina ma ta dainai ena hahine ia divosia bona hahine ma ta ia adavaia, ia be ia heudahanai unai.” (Mataio 19:9) Baibel ia gwau matabodaga karadia sibona dainai ta ese ena adavana ia divosia diba.

Unai dainai hahediba taudia idia gwau: “Bema headava maurina be unai bamona, taunimanima idia headava lasi be namo.” (Mataio 19:10) Momokani, namona be headava ia lalohadailaia tauna ia laloatao headava be ia noho hanaihanai gauna!

Headava lasi maurina totona, Iesu ia gwau haida be idia vara neganai idia be eunuko, unai dainai idia headava lasi. Ma haida be taunimanima ese eunuko taudia ai idia halaoa, unai dainai idia headava lasi. To ma haida be sibodia edia ura idia biagua dainai idia headava lasi. Unai bamona idia karaia, unai amo Dirava ena hesiai gaukara idia karaia diba. Iesu ese kamonai taudia ia hamaoroa: “Unai [headava lasi] mauri dalana ia ura abia dae tauna be unai bamona ia karaia be namo.”​—Mataio 19:12.

Taunimanima ese edia natudia be Iesu dekenai idia mailaia. To hahediba taudia ese idia gwau henidia, badina reana idia ura Iesu ia laga-ani. Iesu be unai ia itaia neganai, ia moale lasi, ia gwau: “Natudia maragidia be lau dekenai idia mai be namo, umui koudia toho lasi, badina Dirava ena Basileia be unai bamona taudia edia. Umui lau hamaoroa momokani, bema ta Dirava ena Basileia ia abia dae lasi, natuna maragina ia karaia bamona, ia be do ia vareai lasi momokani.”​—Mareko 10:14, 15; Luka 18:15.

 Unai be sisiba namona! Dirava ena Basileia ita abia totona, namona be natudia maragidia bamona ita manau bona haida edia hadibaia karana ita abia dae. Bena Iesu ese natudia maragidia dekenai ena lalokau ia hahedinaraia, ia rosidia bona ia hanamodia. Bona “natuna maragina ena kara bamona Dirava ena Basileia ia abia dae” tauna be unai bamona ia lalokau henia.​—Luka 18:17.