Iesu ese ena hahediba taudia dekenai guriguri loulou karana ena parabole ia gwauraia vadaeni. (Luka 11:5-13) Reana hari ia be Samaria o Galilea ai, bona guriguri loulou karana ena namo ia herevalaia lou. Inai parabole ma ta amo unai ia gwauraia:

“Siti ta dekenai diadi ta ia noho. Ia be Dirava ia gari henia lasi bona tau ta ia matauraia lasi. Unai siti dekenai vabu ta ia noho danu, bona unai diadi dekenai ia lao loulou, bona ia gwau, ‘Lau bona lau ia samania tauna be kota dekenai ai gini neganai, mani lau totona hahemaoro maorona oi karaia.’ Nega daudau lalonai diadi ia ura lasi, to gabeai ia sibona dekenai ia gwau, ‘Ena be Dirava lau gari henia lasi bona tau ta lau matauraia lasi, to inai vabu ese lau ia hahekwarahia loulou dainai, hahemaoro maorona do lau karaia, unai amo do ia mai loulou lasi bona ena noinoi loulou karana dainai do lau hesiku momokani.’”​—Luka 18:2-5.

Iesu ese anina ia hahedinaraia, ia gwau: “Ena be diadi be kara maoromaoro lasi tauna, to ia gwauraia herevana umui kamonai! Oibe, Dirava ese ena abia hidi taudia, dina bona hanuaboi ai ia idia taitai henia taudia totona, hahemaoro maorona do ia karaia, ani? Danu, idia dekenai do ia hesiku haraga lasi.” (Luka 18:6, 7) Iesu ese ena Tamana dainai ia gwauraia herevana ena anina be dahaka?

Iesu ia gwau lasi Iehova Dirava be unai kara dika diadi bamona. To ena hereva ena anina be: Bema kara dika diadi ese ia noinoi loulou tauna ia durua diba, Dirava danu be unai bamona do ia karaia. Ia be kara maoromaoro Diravana, bona bema ena taunimanima idia guriguri loulou, do ia haere henidia. Iesu ena hereva amo unai ita diba, ia gwau: “Umui lau hamaoroa, [Dirava ese] idia totona hahemaoro maorona do ia karaia haraga.”​—Luka 18:8.

Vaia ladana maragi bona ogogami taudia be hahemaoro goeva idia abia lasi, to dagi bada bona taga taudia idia kara namo henia. To unai be Dirava ena kara lasi. Nega maorona ai, ia ese kara dika taudia do ia panisia bona iena hesiai taudia be mauri hanaihanai do idia abia.

Daika ena abidadama be unai vabu ena bamona? Taunimanima hida idia abia dae Dirava be “hahemaoro maorona do ia karaia haraga”? Iesu ese ia gwauraia parabole ese guriguri loulou karana ena namo ia hahedinaraia. Guriguri karana ena siahu hahedinaraia totona, ia henanadai: “Taunimanima ena Natuna ia ginidae neganai, tanobada ai inai bamona abidadama karana do ia davaria, a?” (Luka 18:8) Unai ese ia hahedinaraia Keriso ia mai neganai, haida sibona be do idia abidadama.

Iesu ena hereva idia kamonai taudia haida idia laloa edia abidadama ia goada. Idia gwau idia be kara maoromaoro taudia bona ma haida be lasi. Unai dainai Iesu ese inai parabole ia gwauraia:

“Tatau rua be dubu helaga dekenai guriguri totona idia lao. Ta be Farisea tauna bona ma  ta be takisi gogoa tauna. Farisea tauna be ia gini bona ena lalona ai ia guriguri matamaia, ia gwau, ‘Dirava e, oi lau tanikiu henia badina lau be taunimanima ma haida bamona lasi, idia be henaohenao taudia, kara maoromaoro lasi taudia, heudahanai taudia, danu lau be inai takisi gogoa tauna bamona lasi. Wiki ta lalonai nega rua lau aniani lasi, bona lau abia kohu ibounai ena kahana 10 amo kahana ta lau bouboulaia.’”​—Luka 18:10-12.

Farisea taudia be vaia idia ura taunimanima vairanai idia hahedinaraia idia be kara maoromaoro taudia. Unai idia karaia ma haida hamoalea totona. Nega momo Monday bona Thursday ai idia aniani lasi, badina unai dinadia ai momo be maketi gabudiai idia noho, bona idia karaia karana idia itaia diba. Bona aniani ava maragidia edia karoa 10 amo kahana ta idia henia. (Luka 11:42) Hua haida gunanai, idia ese ladana maragi taudia idia gwauraia dika, idia gwau: “Inai hutuma be Taravatu idia diba lasi, bona Dirava ena lalonamo do idia abia lasi.”​—Ioane 7:49.

Iesu ese ena parabole ma ia gwauraia: “To takisi gogoa tauna be daudau dekenai ia gini bona ia ura lasi guba dekenai ia roha isi, to ena kemena ia botaia noho, ia gwau, ‘Dirava e, lau be kara dika tauna, mani lau oi hebogahisi henia.’” Oibe, takisi gogoa tauna be mai manau ida ena kerere ia gwauraia hedinarai. Unai dainai Iesu ia gwau: “Umui lau hamaoroa, inai tauna be ena ruma dekenai ia giroa lou neganai, ena kara maoromaoro ese unai Farisea tauna ena kara maoromaoro ia hereaia. Badina sibona idia abia isi taudia be do idia hahemaraia, to sibona ia hamanaua tauna be do idia abia isi.”​—Luka 18:13, 14.

Unai amo Iesu ia hahedinaraia ita manau be namo. Ena hahediba taudia dekenai unai be sisiba namona, badina unai nega ai Farisea taudia ese taunimanima idia hagoadaia dagi bona ladana bada idia tahua totona. Bona hari Iesu murinai idia raka taudia dekenai unai be sisiba namona.