Iesu ese boio merona ena parabole ia gwauraia neganai, namona be takisi gogoa taudia, taravatu hadibaia taudia, bona Farisea taudia idia laloparara Dirava be mai ura ida idia helalo-kerehai taudia edia dika ia gwauatao. (Luka 15:1-7, 11) Vadaeni Iesu ese ena hahediba taudia ia hereva henia. Ia ese parabole ma ta ia gwauraia, unai parabole ai, taga tauna ta ia kamonai ena ruma ia naria tauna be ena gaukara ia karaia namonamo lasi.

Iesu ia gwau unai ruma naria tauna be ena biaguna ena kohu ia gaukaralaia namonamo lasi. Unai dainai biaguna ia gwau ruma naria tauna be ena gaukara amo do ia hadokoa. Ruma naria tauna ia laloa: “Dahaka do lau karaia, badina egu biaguna ese egu gaukara amo lau do ia hadokoa? Lau hegeregere lasi tano lau geia, bona lau hemarai noinoi totona.” Vaira negana ia laloa neganai, ia gwau: “Lau diba dahaka do lau karaia, unai amo gaukara amo lau ia hadokoa neganai, taunimanima ese edia ruma dekenai lau do idia abia dae.” Maoromaoro idia abitorehai taudia ia boiria, bona ia nanadaidia: “Egu biaguna amo hida oi abitorehai?”​—Luka 16:3-5.

Tau ginigunana ia gwau: “Olive dehoro bat 100.” Unai be 2,200 lita hegeregerena. Reana unai abitorehai tauna be mai ena olive audia eiava ia be oela hoihoilaia tauna. Ruma naria tauna ese ia hamaoroa: “Emu abitorehai pepana oi abia giroa, oi helai bona haraga 50 [1,100 lita] oi torea.”​—Luka 16:6.

Ruma naria tauna ese ma ta ia nanadaia: “Ma oi, emu abitorehai be hida?” Ia gwau: “Witi 100 kor.” Unai be 22,000 lita bamona. Ruma naria tauna ese ia hamaoroa: “Emu abitorehai pepana oi abia giroa bona 80 oi torea.” Ia ese ena abitorehai be 20 pesen amo ia hamaragia.​—Luka 16:7.

Ruma naria tauna ese ena biaguna ena moni ia do naria noho dainai, ia be mai ena maoro unai taudia edia abitorehai davana ia hamaragia totona. Unai ia karaia dainai, ia be edia turana ai ia lao, bona gabeai biaguna ese ena gaukara amo ia hadokoa neganai, idia ese ia idia durua diba.

Gabeai ena biaguna ese ia vara gauna ia kamonai. Ena be biaguna be moni bada do ia halusia, to ia moale bona ruma naria tauna ia hanamoa, badina “ena be ia kara maoromaoro lasi,” to “mai aonega ida ia kara.” Iesu ia gwau: “Inai nega oromana ena taunimanima be edia uru taudia idia kara henia neganai, edia aonega ese diari ai idia noho taudia edia aonega ia hereaia.”​—Luka 16:8.

Iesu ia gwau lasi ruma naria tauna ese ia karaia karana be maoro, bona danu ia ura lasi taunimanima be koikoi dalanai bisinesi idia karaia. Vadaeni iena hereva ena anina be dahaka? Hahediba taudia ia hagania: “Kara maoromaoro lasi tanobada ena taga amo turadia umui karaia, bena unai idia ore neganai, unai turadia ese noho hanaihanai gabudia dekenai umui do idia abia dae.” (Luka 16:9) Oibe, Iesu ena parabole amo  aonega dalana badinaia karana dekenai diba ita abia. Dirava ena hesiai taudia, “diari ai idia noho taudia” unai, ese edia kohu be aonega dalanai do idia gaukaralaia, unai amo mauri hanaihanai helarona idia laloa diba.

Iehova Dirava bona ena Natuna sibona ese guba Basileia ai eiava unai Basileia henunai tanobada ai do ia noho tauna do idia abia hidi. Unai dainai namona be iseda kohu ita gaukaralaia Basileia ena gaukara ita durua totona, unai amo iseda hetura karana idia ida ita hagoadaia diba. Bona golo, siliva, moni, bona kohu edia siahu ia ore neganai, mauri hanaihanai ita abia diba.

Danu Iesu ia gwau, edia kohu idia naria bona gaukaralaia namonamo taudia be gau badadia idia naria diba. Iesu ia gwau: “Unai dainai, bema inai kara maoromaoro lasi tanobadana ena taga be mai kara momokani ida umui gaukaralaia lasi, daika ese umui dekenai taga korikorina [hegeregere Basileia ena gaukara] do ia henia?”​—Luka 16:11.

Iesu ia ura hahedinaraia ena hahediba taudia idia gaukara goada be namo “noho hanaihanai gabudia dekenai” idia ia abia dae totona. Ta be Dirava ena hesiai gaukara bona kara maoromaoro lasi taga ena hesiai gaukara ia karaia hebou diba lasi. Iesu ena hereva dokonai ia gwau: “Hesiai tauna ta be biaguna rua ia hesiai henia diba lasi, badina ia ese ta do ia inai henia bona ta do ia lalokau henia, eiava ta do ia badinaia bona ta do ia dadaraia. Dirava bona Taga be nega tamona umui hesiai henia diba lasi.”​—Luka 16:9, 13.