Sanhedrin taudia idia ura Iesu idia hamasea dainai, ia be Eparaima dekenai ia lao, unai be Ierusalema ena notist kahanai. Iena hahediba taudia ida unuseni ia noho, iena inai taudia amo ia daudau. (Ioane 11:54) Toa lagani 33 C.E. ena Pasova Ariana be kahirakahira, unai dainai Iesu be Eparaima ia rakatania. Bona notwest kahana amo ia lao Samaria, bena Galilea dekenai ia daekau lao, unai be ena laolao ginigabena.

Iesu ena laolao matamanai, ia be hanua ta amo ia lao hanua ma ta neganai, lepera taudia 10 ia hedavari henia. Lepera gorere ese ta ena ima kwakikwaki, aena kwakikwaki, eiava taiana ena hidio be metairametaira ia hadikaia diba. (Numera 12:10-12) Dirava ena Taravatu ia gwau lepera tauna be do ia boiboi, “Miro, miro!” bona sibona do ia noho.​—Levitiko 13:45, 46.

Unai dainai lepera taudia 10 be Iesu amo idia gini daudau. Bona idia boiboi badabada: “Iesu, Hadibaia Tauna e, ai oi hebogahisi henia!” Iesu be idia ia itaia neganai, ia hamaorodia: “Umui lao bona hahelaga taudia vairanai umui hedinarai.” (Luka 17:13, 14) Unai amo ia hahedinaraia ia be Dirava ena Taravatu ia matauraia, badina Taravatu ia gwau hahelaga taudia ese lepera gorere amo idia namo taudia do idia gwauraia namo. Unai murinai, idia be taunimanima ida idia noho hebou diba.​—Levitiko 13:9-17.

Lepera taudia 10 idia diba momokani Iesu be mai ena siahu hoa karadia ia karaia totona. Unai dainai ena be idia do namo lasi, to hahelaga taudia itaia totona idia lao. Iesu idia abidadama henia dainai, idia lao noho lalonai, idia itaia bona mamia idia be idia namo lou!

Idia namo lepera taudia 9 be idia raka lao. To idia ta, Samaria tauna unai, be ia giroa bona Iesu ia tahua. Dahaka dainai? Ia dekenai ia vara gauna dainai, ia ura bada Iesu ia tanikiu henia. “Mai gado badana ida Dirava ia hanamoa,” badina ia laloparara Dirava ese iena gorere amo ia hanamoa. (Luka 17:15) Iesu ia davaria neganai, ena aena badinai ia goru diho bona ia tanikiu henia.

Iesu be ia badinai idia gini taudia dekenai ia gwau: “Idia ibounai 10 idia goeva, ani? Vadaeni idia 9 be edeseni? Dahaka dainai idia ta ia giroa lou lasi Dirava ia hanamoa totona, to inai idau bese tauna sibona?” Bena Samaria tauna ia hamaoroa: “Oi toreisi bona oi lao, emu abidadama ese oi ia hanamoa vadaeni.”​—Luka 17:17-19.

Iesu ese lepera taudia 10 edia gorere ia hanamoa karana amo ia hahedinaraia, Iehova Dirava be ia ia durua noho. Momokani, idia ibounai idia namo, to tamona sibona be mauri ia lao henia dalana ia badinaia. Iseda negai, Dirava be Iesu ia gaukaralaia lasi gorere taudia ia hanamoa totona. To Iesu ita abidadama henia neganai, mauri hanaihanai ia lao henia dalana ita badinaia diba. Mauri hanaihanai do ita abia dainai, Samaria tauna hegeregerena, iseda tanikiu karana ita hahedinaraia, a?