Iesu be Iudea bona Ierusalema ai taunimanima ia hadibaia bona gorere taudia ia hanamoa. Bena Ioridane Sinavaina ia hanaia, bona Perea ena siti ta ta dekenai ia haroro. To kahirakahira Ierusalema dekenai do ia giroa.

Iesu be Perea ai ia noho neganai, tau ta ese ia nanadaia: “Lohiabada e, mauri do idia abia taudia be haida sibona, a?” Reana inai tauna ia diba, tomadiho gunalaia taudia be inai hereva, momo do idia mauri eiava haida sibona idia hepapahuahulaia. Iesu ena haere amo ia ese hida do idia mauri ia herevalaia lasi, to dahaka do idia karaia mauri abia totona ia herevalaia. Ia gwau: “Do umui gaukara goadagoada iduara maragina amo umui vareai totona.” Oibe, ita hekwarahi be namo. Dahaka dainai? Iesu ia gwau: “Umui lau hamaoroa, momo be do idia ura idia vareai, to do idia hegeregere lasi.”​—Luka 13:23, 24.

Iesu ese parabole ta amo ia hahedinaraia ta ia gaukara goada be namo, ia gwau: “Ruma tauna ia toreisi bona iduara ia lokaia neganai, umui be murimuri ai umui gini bona do umui pidipidi noho, umui gwau, ‘Lohiabada e, mani iduara oi kehoa.’. . . To umui dekenai do ia hereva, ia gwau: ‘Lau diba lasi umui be daika. Lau amo umui siri, umui be dika karaia taudia!’”—Luka 13:25-27.

Unai parabole ese ia mai leiti tauna dekenai ia vara gauna ia herevalaia. Ia be ena ura negana ai ia ginidae, bona ia davaria iduara be idia koua bona lokaia vadaeni. Unai tauna ia mai haraga be namo, herevana ia dekenai ia auka. Unai hegeregerena, Iesu be unai gabu ai ia noho bona taunimanima ia hadibaia neganai, momo be namo idia davaria diba. To edia mauri ai tomadiho momokani be gau ginigunana ai idia halaoa lasi. Dirava ese Iuda besena dekenai Iesu ia siaia, to ena hahemauri dalana idia abia dae lasi. Iesu ia gwau idia be murimuri ai idia negea neganai, do ‘idia taitai bona edia isena do idia koria.’ To taunimanima be “ist, west, not, bona saut kahana amo do idia mai,” oibe, bese ibounai amo, bona “Dirava ena Basileia lalonai teibolo dekenai do idia helai.”​—Luka 13:28, 29.

Iesu ia gwau: “Gabeai taudia [Iuda lasi bona idia hahisia Iuda taudia] be do idia guna, bona idia guna taudia [Iuda tomadiho gunalaia taudia, idia be mai hekokoroku ida idia gwau idia be Aberahamo ena bese] be do idia gabeai.” (Luka 13:30) “Do idia gabeai” anina be Dirava amo idia abia gau namodia idia laloa bada lasi taudia be Dirava ena Basileia lalonai do idia vareai lasi.

Farisea taudia haida be Iesu dekenai idia mai bona idia gwau: “Inai gabu oi rakatania bona oi lao, badina Heroda [Anetipa] ia ura oi ia alaia.” Reana Heroda sibona ese unai hereva ia halasia, badina ia ura Iesu be unai gabu ia rakatania. Reana Heroda ia gari dika Dirava  ena peroveta tauna ma ta ena mase dalana ia karaia, guna Ioane Bapatiso dekenai ia karaia bamona. To Iesu ese Farisea taudia ia hamaoroa: “Umui lao bona unai koikoi tauna umui hamaoroa, ‘Kamonai! Hari bona kerukeru lau be demoni do lau luludia bona gorere taudia do lau hanamoa bona dina ihatoina ai egu gaukara do ia ore.’” (Luka 13:31, 32) Oibe, Iesu be Heroda eiava tau ma ta ese do ia hagaria lasi ena gaukara ia hadokoa totona. Iena Tamana ese ia henia gaukarana do ia hagugurua, Dirava ena sediual hegeregerena, taunimanima edia lasi.

Gabeai Iesu be Ierusalema dekenai ia giroa, badina ia gwau, “peroveta tauna be Ierusalema murimuri ai do idia hamasea be maoro lasi.” (Luka 13:33) Baibel ena peroveta hereva ta ia gwau lasi Mesia be Ierusalema ai do idia hamasea. Vadaeni dahaka dainai Iesu ia gwau unuseniai do idia hamasea? Badina Ierusalema be siti badana, bona unuseniai Sanhedrin kota badana ena memba taudia 71 idia noho, bona unai kota ai peroveta koikoi taudia idia kota henia. Danu, unuseniai animal idia bouboulaia. Unai dainai, Iesu ia laloa Ierusalema ai ia idia hamasea be maoro.

Iesu be mai lalohisihisi ida ia gwau: “Ierusalema e, Ierusalema e, oi ese peroveta taudia oi alaia bona oi dekenai idia siaia taudia be nadi amo oi hodoa mase. Nega momo lau ura emu natudia lau haboua, kokoroku ese ena natudia be ena apena henunai ia haboua hegeregerena! To oi ura lasi. Kamonai! Emu dubu helaga be do ia noho kava.” (Luka 13:34, 35) Iuda besena be Dirava ena Natuna idia dadaraia dainai, dika do idia davaria!

Iesu be Ierusalema dekenai ia do ginidae lasi neganai, Farisea taudia edia gunalaia tauna ta ese ia boiria Sabati ai ena ruma dekenai idia aniani totona. Unuseniai tau ta ia noho danu, ia be tauanina gudu gorerena ia abia. Bona unuseniai idia noho taudia haida be Iesu idia raraia, badina idia ura diba ia be unai tauna do ia hanamoa eiava. Iesu ese Farisea taudia bona Taravatu diba momo taudia ia nanadaia: “Sabati ai gorere hanamoa be taravatu eiava lasi?”​—Luka 14:3.

Ta ia haere lasi. Iesu ese gorere tauna ia hanamoa bena ia nanadaidia: “Bema Sabati dinana ai umui ta ena natuna eiava boromakau be ranu guri lalonai ia moru, maoromaoro do umui veria daekau lasi, a?” (Luka 14:5) Unai henanadai dekenai haere ta idia henia lasi danu.