Iesu be Perea amo Ierusalema dekenai ia do lao noho. Taga tauna ta be Iesu dekenai ia heau lao bona ena vairanai ia tui diho. Ia be “lohia tauna ta,” reana sinagoga ena ofesa ta eiava Sanhedrin ena memba ta. Ia gwau: “Hadibaia Tauna Namona e, mauri hanaihanai abia totona, dahaka lau karaia be namo?”​—Luka 8:41; 18:18; 24:20.

Iesu ia haere: “Dahaka dainai lau oi gwauraia namo? Tau ta be ia namo lasi, to Dirava sibona.” Unai tau ese inai hereva “Hadibaia Tauna Namona” be reana dagi ladana bamona ia gaukaralaia, rabi taudia idia karaia bamona. Ena be Iesu be hahediba tauna namona, to unai tauna ia hamaoroa, inai dagi ladana “Namo” be Dirava sibona dekenai do ia gwauraia.

Iesu ese ia sisiba henia: “To bema oi ura mauri oi abia, taravatu oi badinaia noho.” Unai tauna ia henanadai: “Edena taravatu?” Iesu ese Taravatu Ten amo taravatu 5 ia gwauraia—ala-ala, heudahanai, henaohenao, ta samania koikoi karana, bona tama sina matauraia karana. Bena mai anina bada taravatuna ia gwauraia: “Namona be emu dekena tauna oi lalokau henia oi sibona oi lalokau henia hegeregerena.”​—Mataio 19:17-19.

Unai tauna ia haere: “Unai taravatu ibounai lau badinaia vadaeni, ma dahaka lau karaia?” (Mataio 19:20) Reana ia laloa kara namona ma ta ia do karaia lasi, unai kara dainai mauri hanaihanai ia abia diba. Unai tauna ia ura momokani unai ia diba dainai, Iesu ese “ia lalokau henia.” (Mareko 10:21) To gau ta ese unai tauna ia koua.

Unai tauna be ena kohu ia ura henia bada, unai dainai Iesu ia gwau: “To gau tamona oi do karaia lasi: Oi lao, emu kohu oi hoihoilaia bona moni be ogogami taudia dekenai oi henia, bena guba dekenai oi be mai emu dava bada kohu. Bona oi mai egu hahediba tauna ai oi lao.” Oibe, unai tauna ese ena moni be ogogami taudia dekenai ia henia diba, badina ena davana do idia haloua lasi, bena Iesu ena hahediba tauna ai do  ia lao. To Iesu ia itaia unai tauna be mai lalohisihisi ida ia toreisi bena ia lao. Unai tauna be ena taga, ena “dava bada kohu,” ese ia hakepulua dainai mai anina bada gauna ia itaia lasi. (Mareko 10:21, 22) Iesu ia gwau: “Moni momo taudia dekenai do ia auka Dirava ena Basileia lalonai idia vareai totona!”​—Luka 18:24.

Iesu ena hahediba taudia be unai hereva bona gabeai ia gwauraia herevana dekenai idia hoa, ia gwau: “Oibe, kamelo be turituri nila matuna lalonai ia vareai be auka lasi, to taga tauna be Dirava ena Basileia lalonai ia vareai be auka.” Unai dainai ena hahediba taudia idia henanadai: “Daika be mauri ia abia diba?” Hahemauri abia dalana be auka dainai taunimanima do idia hegeregere lasi, a? Iesu be idia dekenai ia gwau: “Taunimanima ese idia karaia diba lasi gauna be Dirava ese ia karaia diba.”​—Luka 18:25-27.

Petero ia hahedinaraia, idia abia hidi gauna be unai taga tauna ena amo ia idau, ia gwau: “Itaia! Ai be gau ibounai ai rakatania bona oi murinai ai raka, vadaeni dahaka do ai abia?” Iesu ese edia abia hidi maorona ena namo ia gwauraia: “Gau ibounai hamatamataia lou negana ai, taunimanima ena Natuna be ena terona hairaina latanai ia helai neganai, lau umui badinaia taudia be terona 12 latanai do umui helai, bona Israela ena iduhu 12 do umui hahemaoro henia.”​—Mataio 19:27, 28.

Iesu ia hahedinaraia vaira nega ai tanobada dekenai mauri be do ia namo lou, Eden umana dekenai bamona. Petero bona hahediba taudia ma haida be Iesu danu tanobada Paradaisona do idia lohiaia, unai hahenamo ese idia dadaraia gaudia ibounai ia hereaia!

To vaira nega sibona dekenai hahenamo do idia abia lasi. Iena hahediba taudia be hahenamo haida idia moalelaia noho. Iesu ia gwau: “Dirava ena Basileia totona edia ruma, hahine, tadikaka, tama sina, eiava natudia idia rakatania taudia ibounai ese hari inai negai unai gaudia momo do idia abia, bona do ia mai nega oromana ai mauri hanaihanai do idia abia.”​—Luka 18:29, 30.

Oibe, ena hahediba taudia do idia lao gabudia ibounai dekenai, edia Keristani tadikaka oreana huanai ia noho lalokauna do idia mamia, unai ese edia varavara korikori amo idia mamia lalokauna ia hereaia. To madi, unai taga tauna be unai hahenamo bona Dirava ena guba Basileia lalonai do ia lohia ena hahenamo ia reaia.

Iesu ma ia gwau: “To idia guna taudia momo be do idia gabeai bona gabeai taudia be do idia guna.” (Mataio 19:30) Unai ena anina be dahaka?

Unai taga tau matamatana bona Iuda gunalaia taudia be “guna taudia.” Ia be Dirava ena taravatu ia badinaia dainai, ia be gau namodia momo ia karaia diba. To ena mauri lalonai, ia ese taga bona kohu momo ia atoa guna. To idia laloa maragi hanua taudia be idia laloparara, Iesu ena hahediba herevadia be hereva momokani bona mauri abia dalana. Ita gwau diba idia be “gabeai taudia,” to hari idia be “guna taudia.” Idia be Iesu danu terona latanai do idia helai bona tanobada Paradaisona do idia lohiaia.