Iesu be Perea amo ia mai bona Betania dekenai ia ginidae, Betania be kilomita toi bamona Ierusalema amo. Mareta bona Maria idia taitai, badina edia tadikaka Lasaro ia mase. Momo idia mai edia lalona hagoadaia totona.

Bena ta ese Mareta ia hamaoroa Iesu ia mai noho, bona maoromaoro ia lao Iesu hedavari henia totona. Bena Iesu dekenai dina 4 lalonai ia bona Maria ese idia lalohadailaia gauna ia gwauraia: “Lohiabada e, bema oi be iniseniai oi noho, egu taihuna be do ia mase lasi.” To namo lasi ita gwau Mareta be ia abidadama lasi. Badina ia gwau: “Lau diba, herevana Dirava amo dahaka oi noia, Dirava ese oi dekenai do ia henia.” (Ioane 11:21, 22) Ia diba Iesu ese ena tadikaka do ia hatorea isi lou.

Iesu ia haere: “Emu taihuna do ia toreisi lou.” Mareta ia laloa Iesu be gabeai tanobada ai do ia vara toreisi louna ia herevalaia, Aberahamo bona ma haida ese idia naria gauna. Unai dainai ia gwau: “Lau diba dina dokona ai do ia toreisi lou.”​—Ioane 11:23, 24.

To Iesu be unai nega ai heduru do ia henia, a? Mareta ia hamaoroa Dirava ese siahu ia henia mase do ia haorea, ia gwau: “Lau ia abidadama henia tauna, ena be ia mase, to do ia mauri lou. Bona idia mauri noho bona lau idia abidadama henia taudia ibounai be do idia mase diba lasi.”​—Ioane 11:25, 26.

Unai amo Iesu ia hahedinaraia iena hahediba taudia be do idia mase. Ia danu be do ia mase, iena aposetolo taudia ia hamaoroa hegeregerena. (Mataio 16:21; 17:22, 23) To do idia mase hanaihanai lasi. Ia idia abidadama henia taudia be mauri hanaihanai do idia abia. Idia momo be idia mase vadaeni, to do idia toreisi lou bona do idia mauri hanaihanai. To idia abidadama noho taudia be inai nega oromana ena dokonai mauri hanaihanai do idia abia. Oibe, Iesu idia abidadama henia taudia ibounai be do idia mase lou lasi.

To Iesu ia gwau, “toreisi lou be lau bona mauri be lau” dainai, ia ese dina haida lalonai ia mase tauna, Lasaro, ia hatorea isi lou diba, a? Iesu ese Mareta ia nanadaia: “Unai oi abia dae, a?” Mareta ia haere: “Oibe Lohiabada, lau abia dae oi be Keriso, Dirava ena Natuna, tanobada dekenai do ia mai tauna.” Mareta ia abidadama Iesu be unai dina ai gau ta ia karaia diba, unai dainai ruma dekenai ia lao haraga bona hehuni ai ena tadina ia hamaoroa, ia gwau: “Hadibaia Tauna be ia mai vadaeni bona ia ura oi ia hereva henia.” (Ioane 11:25-28) Vadaeni Maria be ruma ia rakatania, bona momo be ia murinai idia lao, badina idia laloa Lasaro ena guria gabuna do ia lao.

To Maria be Iesu dekenai ia lao, mai taitai danu ena aena badinai ia goru diho, bona guna ena kakana ese ia gwauraia herevana  ia gwauraia: “Lohiabada e, bema oi be iniseniai oi noho, egu taihuna be do ia mase lasi.” Iesu be Maria bona ia ida idia mai hutuma idia tai ia itaia neganai, ena lalona ia hisihisi bada bona ia tai. Unai idia itaia taudia idia hoa. To haida idia henanadai: “[Iesu] ese matakepulu tauna ena matana ia kehoa, to inai tauna ena mase ia koua diba lasi, a?”​—Ioane 11:32, 37.