Ruma Maragidia Ena Aria ena dina ginigabena ai, unai be dina namba 7, Iesu be dubu helaga ena kahana ta, “moni maua idia noho gabunai” ia hadibaia noho. (Ioane 8:20; Luka 21:1) Unai gabu be Hahine Edia Ariara dekenai ia noho, unuseniai taunimanima ese edia kontribusen idia udaia.

Aria negana ena hanuaboi ibounai, unai ariara ena diari be bada. Unuseniai lamepa atoa gaudia badadia 4 idia gini, idia ta ta be mai edia disi badadia 4 bona oela amo idia honu. Unai lamepa edia diari ese gabu ibounai ia hadiaria diba. Iesu ese ia gwauraia herevana amo kamonai taudia be unai diari do idia laloa. Ia gwau: “Lau be tanobada ena diari. Lau ia badinaia tauna be dibura ai do ia raka lasi, lasi momokani, to mauri ia henia diari do ia abia.”​—Ioane 8:12.

Farisea taudia be Iesu ena hereva dekenai idia moale lasi bona idia gwau: “Oi be sibona oi herevalaia, to emu hereva be momokani lasi.” Iesu ia haere: “Ena be lau be sibona lau herevalaia, to egu hereva be momokani, badina lau mai gabuna bona do lau lao gabuna lau diba. To umui be lau mai gabuna bona do lau lao gabuna umui diba lasi.” Ma ia gwau: “Umui sibona emui Taravatu ia gwau: ‘Bema witnes taudia be rua, unai hereva do idia hamomokania.’ Lau be sibona lau herevalaia, bona Tamana, lau ia siaia tauna, ese lau ia herevalaia danu.”​—Ioane 8:13-18.

Farisea taudia ese ena hereva idia abia dae lasi, bona idia nanadaia: “Emu Tamana be edeseni?” Iesu be maoromaoro ia haere: “Umui be lau bona egu Tamana umui diba lasi. Bema lau umui diba, egu Tamana do umui diba danu.” (Ioane 8:19) Ena be Farisea taudia idia ura Iesu idia dogoatao, to ta be unai ia karaia lasi.

Iesu ese guna ia gwauraia herevana ia gwauraia lou: “Lau be do lau lao bona lau do umui tahua, to umui be emui kara dika ai do umui mase. Lau lao gabuna dekenai umui mai diba lasi.” Iuda taudia be iena hereva idia lalopararalaia  lasi bona idia laloa: “Ia be sibona do ia hamasea, a? Badina ia gwau, ‘Do lau lao gabuna dekenai umui mai diba lasi.’” Idia laloparara lasi, badina idia diba lasi ia be edeseni amo ia mai. Vadaeni ia gwau: “Umui be henunai amo, lau be ataiai amo. Umui be inai tanobada amo, lau be inai tanobada amo lasi.”​—Ioane 8:21-23.

Iesu ese ia hahedinaraia ia be guna guba dekenai ia noho bona ia be idia gwauhamatalaia Mesiana o Keriso, tomadiho gunalaia taudia ese idia naria tauna. To, mai hemataurai lasi ida idia nanadaia: “Oi be daika?”​—Ioane 8:25.

Idia dadaraia bona dagedage henia dainai, Iesu ia haere: “Egu hereva ena anina umui lalopararalaia lasi dainai, dahaka dainai umui lau hereva henia noho.” Bena iena Tamana ia herevalaia bona Iuda taudia ese Natuna idia kamonai henia ena badina ia hahedinaraia. Ia gwau: “Lau ia siaia Tauna be momokani, bona ia amo lau kamonai gaudia be tanobada taudia dekenai lau gwauraia.”​—Ioane 8:25, 26.

Bena Iesu ese ia hahedinaraia ia be ena Tamana ia abidadama henia, to Iuda taudia be unai idia karaia lasi. Ia gwau: “Umui ese taunimanima ena Natuna umui abia isi murinai, do umui diba lau be daika. Bona lau be sibona egu ura dekenai gau ta lau karaia lasi, to Tamana ese lau ia hadibaia gaudia lau herevalaia. Bona lau ia siaia Tauna be lau ida, ia ese lau ia rakatania lasi, badina hanaihanai ia hamoalea gaudia lau karaia.”​—Ioane 8:28, 29.

To Iuda taudia haida be Iesu idia abidadama henia bona ia hamaorodia: “Bema egu hereva umui badinaia, umui be momokani egu hahediba taudia, bona hereva momokani do umui diba, bona hereva momokani ese umui do ia ruhaia.”​—Ioane 8:31, 32.

To haida be unai hereva idia abia dae lasi. Idia gwau: “Ai be Aberahamo ena natudia bona nega ta tau ta ena igui hesiai gaukara ai karaia lasi. Dahaka dainai oi gwau, ‘Umui do ia ruhaia’?” Iuda taudia idia diba guna idia be idau bese taudia ese idia biagudia, bona idia ura lasi ta ese idia ia gwauraia igui hesiai taudia. To Iesu ese ia hahedinaraia idia be igui hesiai taudia, ia gwau: “Umui lau hamaoroa momokani, kara dika idia karaia taudia ibounai be kara dika ena igui hesiai taudia.”​—Ioane 8:33, 34.

Iuda taudia idia abia dae lasi idia be kara dika ena igui hesiai taudia, unai dainai Iesu ese do ia vara gauna ia gwauraia. Ia gwau: “Igui hesiai tauna be ruma bese lalonai do ia noho hanaihanai lasi, to natuna be do ia noho hanaihanai.” (Ioane 8:35) Igui hesiai tauna be ahuna ta do ia abia lasi, bona biaguna ese gaukara amo ia hadokoa diba. To biaguna ena natuna korikorina eiava ia ubua merona be ruma bese ida do ia “noho hanaihanai,” anina be do ia noho ela bona ena mase dinana.

Unai dainai Natuna ese ia gwauraia hereva momokanina ese kara dika bona mase amo taunimanima ia ruhaia diba. Iesu ia gwau: “Bema Natuna ese umui ia ruhaia, umui do ia ruhaia momokani.”​—Ioane 8:36.