Iesu be Ierusalema ai ia do noho, Ruma Maragidia o Au Raurau Rumadia Ena Aria totona. Ia moale badina “taunimanima momo ese ia idia abidadama henia.” To tomadiho gunalaia taudia idia moale lasi. Idia ese tatau haida idia siaia Iesu idia dogoatao totona. (Ioane 7:31, 32) To Iesu be idia amo ia hunia lasi.

Ierusalema ai, Iesu be taunimanima vairanai ia haroro, ia gwau: “Lau be nega sisina umui danu do lau noho, bena lau ia siaia Tauna dekenai do lau giroa lou. Lau do umui tahua, to lau do umui davaria lasi, bona lau lao gabuna dekenai umui mai diba lasi.” (Ioane 7:33, 34) Iuda taudia idia laloparara lasi dainai, sibona huanai idia gwau: “Inai tauna be ia ura edeseni ia lao, ma do ita davaria lasi? Reana ia ura Grik taudia huanai idia noho Iuda taudia dekenai ia lao, bona Grik taudia ia hadibaia, a? Iena hereva ena anina be dahaka, ia gwau, ‘Lau do umui tahua, to lau do umui davaria lasi, bona lau lao gabuna dekenai umui mai diba lasi’?” (Ioane 7:35, 36) To, Iesu be ena mase bona do ia toreisi bona guba dekenai do ia daekau karana ia herevalaia, bona ena inai taudia be unuseniai idia lao diba lasi.

Aria ena dina namba 7 ia ginidae. Aria ena daba ta ta ai, hahelaga tauna ta ese Siloama Gohuna amo idia abia ranuna ia bubua, unai amo boubou patana ena badina dekenai ia aru diho diba. Iesu ia ura taunimanima ese unai kara idia laloa dainai, ia gwau: “Bema ta ia ranu mase, lau dekenai ia mai bona ranu ia inua be namo. Lau ia abidadama henia tauna be Toretore Helagadia ese ia herevalaia, ia gwau: ‘Ena lalona momokani amo mauri ranu do ia aru.’”​—Ioane 7:37, 38.

Iesu be Dirava ese lauma helaga amo ena hahediba taudia do ia horoa bona guba maurina do idia abia negana ia herevalaia. Unai be Iesu ena mase murinai do ia vara, lagani 33 C.E. ena Pentekoste dinanai. Unai dina ai, lauma helaga ese ia horoa hahediba taudia be hereva momokani do idia harorolaia, bona unai nega ai mauri ranuna ena sinavai do ia aru matamaia.

 Iesu ena hahediba herevadia dainai, haida idia gwau: “Inai tauna be Peroveta Tauna korikorina,” reana Mose ese ia hereaia peroveta tauna idia laloa. Ma haida idia gwau: “Inai be Keriso.” To haida idia gwau: “Keriso be Galilea amo do ia mai, a? Toretore Helagadia ia gwau Keriso be Davida ena bese amo do ia vara bona Betelehema, guna Davida ia noho hanuana amo do ia mai, ani?”​—Ioane 7:40-42.

Taunimanima be idia lalotamona lasi. Ena be haida idia ura Iesu idia dogoatao, to idia dogoatao lasi. Ofesa taudia be imana kavakava idia giroa neganai, dubu biagudia bona Farisea taudia ese idia nanadaidia: “Dahaka dainai ia umui mailaia lasi?” Idia haere: “Guna tau ta be unai bamona ia hereva lasi.” Dubu gunalaia taudia idia badu bona idia gwau: “Ia ese umui ia hakaua kerere danu, a? Lohia tauna ta eiava Farisea tauna ta be ia dekenai ia abidadama, a? Lasi. To inai hutuma be Taravatu idia diba lasi, bona Dirava ena lalonamo do idia abia lasi.”​—Ioane 7:45-49.

Unai nega ai, Nikodemo, Farisea tauna bona Iuda ena kaunsolo ta, be Iesu totona mai gari lasi ida ia hereva. Lagani rua mai kahana gunanai, Nikodemo be hanuaboi ai Iesu dekenai ia lao bona ia hamaoroa ia dekenai ia abidadama. Vadaeni Nikodemo ia gwau: “Iseda Taravatu hegeregerena, bema ta ita hahemaoro henia, namona be ena hereva ita kamonai guna bona ia karaia gauna ita diba, ani?” Idia be dahaka idia gwau? “Oi danu be Galilea amo, a? Toretore Helagadia oi tahua bona do oi diba, peroveta tauna ta be Galilea amo do ia mai lasi.”​—Ioane 7:51, 52.

Toretore Helagadia ia gwau lasi peroveta tauna ta be Galilea amo do ia mai. To Dirava ena Hereva ese ia hahedinaraia Keriso be unuseni amo do ia mai; ia gwau “diari badana” be “Galilea hanuadia” dekenai do ia hedinarai. (Isaia 9:1, 2; Mataio 4:13-17) Danu, peroveta herevadia hegeregerena, Iesu be Betelehema ai ia vara, bona ia be Davida ena bese tauna. Ena be Farisea taudia be unai idia diba, to sivarai koikoi idia gwauraia loaloa dainai, momo be Iesu dekenai lalohadai kererena idia abia.