Sabati dinana ai Iesu be Ierusalema dekenai ia do noho. Ia bona ena hahediba taudia be siti lalonai idia raka noho lalonai, ogogami tauna ta idia itaia, ia be ia vara negana amo ia matakepulu. Hahediba taudia ese Iesu idia nanadaia: “Rabi e, daika ia kara dika, inai tauna eiava ena tama sina, unai dainai ia vara neganai ia matakepulu?”​—Ioane 9:2.

Reana hahediba taudia idia laloa bema ta be sinana ena bogana lalonai ia noho, ia be ia kara dika diba eiava lasi. Iesu ia haere: “Inai tauna eiava ena tama sina idia kara dika lasi, to unai ia vara unai amo taunimanima ese Dirava ia karaia diba gauna do idia itaia.” (Ioane 9:3) Unai tauna o iena tama sina be kara dika ta idia karaia dainai ia matakepulu lasi. To Adamu ena kara dika dainai, ita ibounai ita vara neganai ita be goevadae lasi, unai dainai haida be mai gorere ida idia vara, hegeregere matakepulu. To Iesu ese unai matakepulu tauna ena matana do ia hanamoa karana amo Dirava ena siahu do ia hahedinaraia, nega ma haida ai gorere taudia ia hanamoa bamona.

Iesu ia hahedinaraia unai bamona ia karaia be mai anina bada. Ia gwau: “Namona be lau ia siaia Tauna ena gaukara be dina lalonai ita karaia. Hanuaboi be ia mai noho bona unai negai, tau ta do ia gaukara lasi. Tanobada dekenai lau do noho lalonai, lau be tanobada ena diari.” (Ioane 9:4, 5) Oibe, kahirakahira Iesu do ia mase bona guri ena dibura lalonai ia noho neganai, gaukara ta do ia karaia lasi. To unai ia do vara lasi neganai, ia be tanobada ena diari.

To Iesu ese unai tau do ia hanamoa, a? Bona edena dala ai do ia karaia? Iesu be tano dekenai ia kanudi, bena kopukopu ia karaia. Bena matakepulu tauna ena matana dekenai sisina ia dahua bona ia gwau: “Oi lao Siloama gohuna dekenai emu matana oi huria.” (Ioane 9:7) Iena hereva hegeregerena ia kara. Iena matana ia huria neganai, ia itaia diba! Ia moale dikadika badina unai be ena nega ginigunana ia itaia diba!

Ia idia diba taudia, iena dekena taudia bona ma haida, be idia hoa. Idia henanadai: “Ia be guna iniseniai ia helai bona ia noinoi tauna, ani?” Haida idia haere: “Inai be ia.” To ma haida be idia abia dae lasi, idia gwau: “Lasi, to ia be unai tauna hegeregerena.” Unai tauna ia haere: “Lau be unai tauna.”​—Ioane 9:8, 9.

Unai dainai idia nanadaia: “Vadaeni, edena bamona oi itaia diba?” Ia haere: “Tau ta ladana Iesu ese kopukopu ia karaia bona egu matana dekenai ia dahua bena lau dekenai ia gwau, ‘Siloama dekenai oi lao bona emu matana oi huria.’ Unai dainai lau lao bona egu matana lau huria murinai lau itaia diba.” Bena idia nanadaia: “Unai tauna be edeseni?” Noinoi tauna ia haere: “Lau diba lasi.”​—Ioane 9:10-12.

Taunimanima ese unai tauna be Farisea taudia  dekenai idia hakaua lao, idia danu idia ura diba edena bamona ena matana ia namo. Idia ia hamaoroa: “Ia ese kopukopu be egu matana dekenai ia dahua, bona egu matana lau huria, bena lau itaia diba.” Oi laloa Farisea taudia be unai noinoi tauna ia namo dainai idia moale, a? Lasi. Idia haida ese Iesu idia gwauraia dika. Idia gwau: “Inai tauna be Dirava amo ia mai lasi, badina Sabati ia badinaia lasi.” Ma haida idia gwau: “Edena bamona kara dika tauna ta be unai bamona toa karadia ia karaia diba?” (Ioane 9:15, 16) Vadaeni idia huanai heiriheiri ia vara.

Heiriheiri ia vara dainai, ena matana ia namo tauna idia nanadaia: “Unai tauna ese oiemu matana ia kehoa dainai, oiemu lalohadai be dahaka?” Ia be Iesu dekenai ia daradara lasi, bona maoromaoro ia gwau: “Ia be peroveta tauna.”​—Ioane 9:17.

Farisea taudia be idia ura lasi ena hereva idia abia dae. Reana idia laloa Iesu bona unai tau be dala haida idia karaia taunimanima idia koia totona. Idia laloa unai hamaoromaoroa totona unai noinoi tauna ena tama sina do idia nanadaia, bema edia natuna be ia matakepulu momokani eiava lasi.