Iesu be Ierusalema kahirakahira ia do noho neganai, Iuda taudia haida be ia dekenai idia lao. Idia haida idia ura ia amo diba idia abia, to ma haida be idia ura ia idia tohoa. Idia ta be Taravatu ia diba momo, ia ese Iesu ia nanadaia: “Hadibaia Tauna e, dahaka lau karaia be namo mauri hanaihanai lau abia totona?”​—Luka 10:25.

Iesu ia diba unai tauna be diba abia totona ia henanadai lasi. Reana ia ura Iesu ese ena haere amo Iuda taudia ia habadua. Iesu ia laloparara unai tauna ena lalohadai be idau. Unai dainai aonega dalanai ia hereva, unai amo unai tauna ena lalohadai ia hahedinaraia diba.

Iesu ia henanadai: “Taravatu dekenai dahaka idia torea? Oi duahia gauna oi lalopararalaia, a?” Unai tauna be Dirava ena Taravatu ia stadilaia, bona unai hegeregerena ia haere. Ia ese Deuteronomi 6:5 bona Levitiko 19:18 edia hereva ia gwauraia lou: “‘Namona be Iehova emu Dirava oi lalokau henia mai emu kudouna ibounai bona mai emu mauri ibounai bona mai emu goada ibounai bona mai emu lalona ibounai ida’ bona ‘emu dekena tauna do oi lalokau henia, oi sibona oi lalokau henia hegeregerena.’” (Luka 10:26, 27) Haere maorona ia henia, a?

Iesu ese ia hamaoroa: “Oiemu haere be maoro, unai bamona do oi karaia noho bena mauri do oi abia.” To edia herevahereva be unuseni ia doko, a? Unai tauna be Iesu ena haere dekenai ia moale lasi; ia ura “hahedinaraia ia be kara maoromaoro tauna,” bona ia ura Iesu be ena hereva ida ia lalotamona, unai amo do ia hahedinaraia ma haida ia kara henia dalana be maoro. Unai dainai ia henanadai: “Egu dekena tauna be daika?” (Luka 10:28, 29) Unai henanadai kwadogina be mai anina bada. Edena dala ai?

Iuda taudia idia abia dae inai hereva “dekena tauna” be Iuda ena sene karadia idia badinaia taudia ia herevalaia, bona toana be Levitiko 19:18 ese unai ia hamomokania. Iuda tauna ia gwau diba, idau bese tauna bamoa karana be “taravatu.” (Kara 10:28) Unai dainai unai tau bona reana Iesu ena hahediba taudia haida idia laloa idia kara maoromaoro, bema edia bese tauna idia kara namo henia. To idau bese tauna idia kara namo henia lasi diba, badina ia be edia “dekena tauna” lasi.

Unai tauna bona Iuda taudia ma haida edia lalona ia hahisia lasi totona, Iesu be edena bamona do ia haere? Ia ese sivarai ta ia gwauraia: “Tau ta be Ierusalema amo Ieriko dekenai ia diho lao neganai, henaohenao taudia ese ena gau ibounai idia henaoa bona idia dadabaia, kahirakahira ia mase, bena idia rakatania.” Ma ia gwau: “Hahelaga tauna ta be unai dala dekenai ia raka diho, to unai tauna ia itaia neganai, dala kahana dekenai ia hanaia lao. Unai hegeregerena, Levi tauna ta be unai gabu dekenai ia mai bona unai tauna ia itaia neganai, dala kahana dekenai ia hanaia lao. To Samaria tauna ta be unai dala dekenai ia lao bona unai tauna ia itaia neganai, ia hebogahisi henia.”​—Luka 10:30-33.

Iesu ia gwauraia sivaraina ia kamonai tauna ia diba hahelaga taudia bona dubu helaga ai idia gaukara Levi taudia momo be Ieriko ai idia noho. Dubu helaga amo idia giroa lou neganai, kilomita 23 bamona do idia laolao. Unai dala ai dika idia davaria diba, badina henaohenao taudia be momo. Bema hahelaga tauna bona Levi tauna idia itaia Iuda tauna be dika ia davaria, do idia durua, a? Sivarai lalonai, Iesu ia gwau  unai idia karaia lasi. To Samaria tauna, Iuda taudia ese idia inai henia taudia unai, ese unai Iuda tauna ia durua.​—Ioane 8:48.

Samaria tauna ese Iuda tauna be edena bamona ia durua? Iesu ma ia gwau: “Ia dekenai ia lao, ena bero dekenai dehoro bona wain ia bubua bona ia kumia. Bena ena doniki latanai ia atoa bona ruma ta dekenai ia abia lao bona ia naria. Daba ai, denario rua ia abia bona ruma biaguna dekenai ia henia, bona ia gwau: ‘Inai tauna oi naria, bona bema ma gau haida edia davana oi karaia, lau giroa mai neganai oi dekenai edia davana do lau henia.’”​—Luka 10:34, 35.

Unai sivarai ia gwauraia murinai, Hadibaia Tauna Badana, Iesu, be lalona veria henanadai ta ia henia: “Oi laloa unai tatau toi amo, henaohenao taudia ese idia haberoa tauna dekenai lalokau ia hahedinaraia tauna be daika?” Reana unai tauna ia ura lasi ia gwau, “Samaria tauna,” unai dainai ia haere: “Ia dekenai hebogahisi ia hahedinaraia tauna.” Bena Iesu ese unai sivarai ena anina ia hahedinaraia, ia gwau: “Oi lao bona unai bamona oi karaia.”​—Luka 10:36, 37.

Unai be hahediba dala namona! Bema Iesu ese unai tau ia hamaoroa idau bese taudia danu be edia dekena taudia, unai tau bona idia kamonai noho Iuda taudia be unai do idia abia dae, a? Reana lasi. To unai sivarai kwadogina amo kamonai taudia be inai henanadai, “Daika be egu dekena tauna?” ena haere idia lalopararalaia. Baibel ena hagania ia badinaia bona lalokau bona hebogahisi ia hahedinaraia tauna be dekena tauna korikorina.