Iesu ia gwau “orea maragi” sibona be guba Basileia lalonai do idia vareai. (Luka 12:32) To namo lasi unai hahenamo idia laloa maragi. Iesu ia hahedinaraia, bema ta be unai Basileia lalonai do ia vareai, gau badana be lalohadai maorona ia dogoatao.

Unai dainai Iesu ese ena hahediba taudia ia hadibaia iena lou mai totona do idia hegaegae. Ia gwau: “Gaukara dabua umui atoa bona umui hegaegae, bona emui lamepa do idia araia noho. Bona namona be edia biaguna be headava aria amo ia lou mai idia naria noho hesiai taudia bamona umui karaia. Biaguna ia mai bona iduara dekenai ia pidipidi neganai, karaharaga do idia kehoa. Biaguna ia mai bona ia davaria idia gima noho hesiai taudia be do idia moale!”​—Luka 12:35-37.

Hahediba taudia be Iesu ena parabole idia lalopararalaia. Ia herevalaia hesiai taudia be idia hegaegae, bona edia biaguna idia naria. Iesu ia gwau: “Bema biaguna be gima negana iharuana [9:00 p.m. amo ela bona malokihi] eiava ihatoina [malokihi amo ela bona 3:00 a.m.] ai ia ginidae bona ia davaria idia hegaegae, do idia moale!”​—Luka 12:38.

Iesu be hesiai taudia do idia gaukara goada karana ia herevalaia sibona lasi. Taunimanima ena Natuna, Iesu, be parabole ai sibona ia herevalaia dalana amo unai ia hedinarai. Iena hahediba taudia ia hamaoroa: “Umui danu, umui noho hegaegae, badina umui laloa lasi horana ai taunimanima ena Natuna do ia mai.” (Luka 12:40) Vaira nega ai Iesu do ia mai. Ia ura iena murinai idia raka taudia—“orea maragi” taudia danu—idia noho hegaegae.

Petero ia ura Iesu ena hereva ia lalopararalaia dainai, ia henanadai: “Lohiabada e, unai parabole be ai sibona dekenai eiava ibounai dekenai oi gwauraia danu?” Iesu be maoromaoro Petero ia haere henia lasi, to parabole ma ta ia gwauraia: “Ruma ia naria tauna mai ena kamonai, aonega tauna unai, ena biaguna ese ia abia hidi iena hesiai taudia ma haida do ia naria, bona nega korikori ai edia aniani do ia henia tauna be daika? Bema ena biaguna ia mai bona ia itaia ia be unai bamona ia karaia noho, unai hesiai tauna be do ia moale! Umui lau hamaoroa momokani, biaguna ese do ia abia hidi iena kohu ibounai ia naria totona.”​—Luka 12:41-44.

Parabole ginigunana ai, “biaguna” be Iesu, taunimanima ena Natuna. Bona “ruma ia naria tauna” be “orea maragi” taudia, idia dekenai Iesu ese Basileia do ia henia. (Luka 12:32) Iesu ese ia hahedinaraia, unai orea taudia haida ese ena “hesiai taudia” dekenai ‘nega korikori ai aniani do ia henia.’ Unai dainai Petero bona hahediba taudia ma haida, Iesu ese ia hadibaia bona Dirava ena Hereva amo ia ubua taudia unai, idia laloparara taunimanima ena Natuna be vaira nega ai do ia mai. Unai nega ai, Iesu ena murinai idia raka taudia, Biaguna ena “hesiai taudia” unai, be Dirava ena Hereva amo do ia ubudia.

Iesu ese ena hahediba taudia idia gima noho bona edia kara idia naria namonamo ena badina ma ta ia gwauraia. Ia hamaorodia bema idia gima lasi, edia tadikaka taihu idia dagedage henia diba. Ia gwau: “To bema unai hesiai tauna be ena kudouna ai ia gwau, ‘Egu biaguna be ia mai haraga lasi,’ bena hesiai tatau bona hahine ia dadabaia matamaia, bona ia aniani, ia inuinu, bona ia kekero. Inai hesiai tauna ia laloa lasi dinana bona ia diba lasi horana ai ena biaguna do ia mai, bona ia dekenai panisi aukana momokani do ia henia bona kamonai  lasi taudia ida davana do ia henia.”​—Luka 12:45, 46.

Iesu ia gwau “tanobada ai lahi karaia totona” ia mai. Bona unai ia vara, Iesu ese ia gwauraia herevadia ese heiriheiri ia havaraia, bona unai be hegeregere hahediba koikoidia bona sene taravatudia be lahi ese ia araia. Guna idia lalotamona taudia ia hapararaia danu, “tamana ese mero do ia badu henia bona mero ese tamana do ia badu henia, sinana ese kekeni do ia badu henia bona kekeni ese sinana do ia badu henia, bona ravana hahine ese ravana kekeni do ia badu henia bona ravana kekeni ese ravana hahine do ia badu henia.”​—Luka 12:49, 53.

Unai hereva be iena hahediba taudia totona. Bena Iesu be hutuma ia itaia. Idia momo idia abia dae lasi ia be Mesia, unai dainai ia hamaorodia: “West kahana ai ori koremana umui itaia neganai, maoromaoro umui gwau, ‘Medu badana bona lai goadana ia mai noho,’ bona unai ia vara. Bona saut kahana amo lai ia toa neganai, umui gwau, ‘Gabu be do ia siahu bada herea,’ bona unai ia vara. Koikoi taudia e, tanobada bona guba edia toana umui diba, to dahaka dainai inai nega ai idia vara gaudia edia anina umui diba lasi?” (Luka 12:54-56) Unai ese ia hahedinaraia idia hegaegae lasi.