Iesu be Farisea tauna ena ruma ai ia aniani noho lalonai, hutuma be murimuri ai idia naria. Galilea ai ia vara bamona. (Mareko 1:33; 2:2; 3:9) Iudea ai, momo idia ura ia idia itaia bona kamonai henia. Idia be Iesu ida idia aniani Farisea taudia bamona lasi.

Iesu ese iena hahediba taudia dekenai ia gwauraia herevana be mai anina bada, ia gwau: “Farisea taudia edia isti dainai do umui naria namonamo, unai be edia koikoi karadia.” Iesu be guna unai hereva ia gwauraia, to aniani neganai ia itaia karana ese ia hahedinaraia unai hadibaia hereva be mai anina bada. (Luka 12:1; Mareko 8:15) Farisea taudia idia ura edia tomadiho kara koikoidia amo edia kara dika idia hunia, to edia kara ese dika ia havaraia diba. Iesu ia gwau: “Idia koua namonamo gaudia ibounai be do idia hedinarai, bona idia hunia hereva ibounai be taunimanima do idia diba.”​—Luka 12:2.

Reana Iesu idia hagegea taudia momo be Iudea taudia, bona guna Galilea ai ia hadibaia neganai idia kamonai lasi. Unai dainai guna ia gwauraia hereva badadia ia gwauraia lou. Kamonai taudia ibounai ia hagoadaia: “Tauanina idia alaia bona unai murinai gau ma ta idia karaia diba lasi taudia dekenai do umui gari lasi.” (Luka 12:4) Guna ia karaia bamona, Iesu ese ena hahediba taudia ia hamaoroa, namona be idia abia dae Dirava ese idia do ia naria. Danu, namona be taunimanima ena Natuna idia abia dae bona idia laloparara Dirava ese idia do ia durua.​—Mataio 10:19, 20, 26-33; 12:31, 32.

Bena hutuma huanai tau ta ese Iesu dekenai ena lalohekwarahi ia gwauraia: “Hadibaia Tauna e, mani egu kakana oi hamaoroa emai tamana ena kohu ibounai be ai ruaosi huanai do ia haria.” (Luka 12:13) Taravatu ia gwau vara guna natuna be ahuna rua do ia abia, unai dainai idia hepapahuahu be anina lasi. (Deuteronomi 21:17) To toana be unai tauna ia ura ahuna ma haida ia abia. Iesu be mai aonega ida ia kara. Ia henanadai: “Tau e, daika ese lau ia abia hidi emui diadi eiava kohu haria tauna ai lau lao totona?”​—Luka 12:14.

Bena ibounai ia sisiba henia, ia gwau: “Umui gima noho bona mataganigani karadia idauidau ibounai umui dadaraia, badina ena be tau ta ena kohu be momo, to ena kohu ese ia dekenai mauri do ia henia lasi.” (Luka 12:15) Ena be ta be taga tauna, to ia mase neganai ena kohu ibounai do ia rakatania, ani? Unai hereva habadaia totona, Iesu ese parabole ta amo Dirava ida ladana namona abia karana ia hahedinaraia.

“Taga tauna ta be ena uma amo aniani momo herea ia gogoa. Vadaeni sibona dekenai ia gwau, ‘Hari dahaka do lau karaia, badina egu aniani haboua gabuna be lasi?’ Bena ia gwau, ‘Inai do lau karaia: Egu aniani haboua rumadia do lau kokia bona badadia do lau haginia, bena unuseniai egu witi bona kohu ibounai do lau haboua. Bona sibona dekenai do lau gwau: “Lagani momo totona gau momo lau haboua vadaeni, hari do lau laga-ani, aniani, inuinu, bona moale.”’ To Dirava be ia dekenai ia gwau, ‘Kavakava tauna e, inai hanuaboi ai emu mauri do idia kokia. Vadaeni daika ese oi haboua gaudia do ia abia?’ Sibona totona dava bada kohu ia haboudia, to Dirava ena matanai ia ogogami tauna dekenai unai bamona do ia vara.”​—Luka 12:16-21.

Iesu ena hahediba taudia bona idia kamonai taudia ma haida be kohu tahua o haboua  karana dekenai idia moru diba. Eiava mauri ena lalohekwarahi gaudia ese idia ia koua diba Iehova idia hesiai henia totona. Unai dainai Iesu ese lagani ta mai kahana gunanai, Ororo Harorona ai ia henia sisibana ia gwauraia lou.

“Emui mauri lalohekwarahilaia karana umui hadokoa. Hegeregere dahaka do umui ania eiava emui tauanina dekenai dahaka dabua do umui hahedokilaia. . . . Galo manudia umui laloa: Idia be uhe idia hadoa lasi, anina idia gogoa lasi, bona aniani haboua rumana be lasi, to Dirava ese idia ia ubua. To, umui be manu umui hereaia, ani? . . . Lili edia tubu dalana umui laloa: Idia gaukara lasi bona dabua idia turia lasi, to umui lau hamaoroa, Solomona ena hairai ibounai ese unai flaoaflaoa edia hairai ia hereaia lasi. . . . Unai dainai dahaka do umui ania eiava dahaka do umui inua umui lalohekwarahilaia lasi, . . . emui Tamana be ia diba unai gaudia umui abia be namo. . . . Iena Basileia do umui tahua noho, bena Dirava ese unai gaudia be umui dekenai do ia henia.”​—Luka 12:22-31; Mataio 6:25-33.

Daidia ese Dirava ena Basileia do idia tahua noho? Iesu ese ia hahedinaraia “orea maragi” taudia mai edia abidadama sibona ese unai do idia karaia. Gabeai, ia hedinarai edia namba be 144,000 sibona. Idia be dahaka do idia karaia? Iesu ese ia hamaorodia: “Emui Tamana be ia moale umui dekenai Basileia do ia henia.” Idia be do idia gaukara goada lasi tanobada ena kohu haboua totona, badina henaohenao taudia ese idia henao diba. To do idia gaukara goada ‘guba ai idia haboua dava bada kohu’ totona, unuseniai Keriso ida do idia lohia.​—Luka 12:32-34.