Natanaela be Iesu ena hahediba tauna ginigunana ta ai ia lao, bona dina toi idia ore vadaeni. Iesu bona ena hahediba taudia ginigunadia haida be edia hanua Galilea dekenai idia lao, unai be not kahanai. Idia ura Natanaela ena hanua Kana dekenai idia lao, badina headava aria ta totona idia boiridia. Kana be ororo gabunai ia noho, Iesu ia tubu daekau hanuana, Nasareta, amo ia be not kahanai.

Iesu ena sinana Maria danu be unai headava aria dekenai ia lao. Maria be idia headava matamata taudia edia turana dainai, aria dekenai idia mai taudia ia durua. Unai dainai wain ia ore neganai, Iesu ia hamaoroa: “Edia wain ia ore.”​—Ioane 2:3.

Unai hereva amo Maria ia hahedinaraia ia ura Iesu ese idia ia durua. To Iesu ia haere, ia gwau: “Hahine e, unai be iseda maduna lasi?” (Ioane 2:4) Iesu be Dirava ese ia abia hidi King dainai, do ia karaia gaudia be iena guba Tamana ese ia abia hidi, to iena varavara o turadia lasi. Maria be mai manau ida ena natuna ena imana dekenai unai ia rakatania, bona hesiai taudia ia hamaoroa: “Ena hereva hegeregerena do umui karaia.”​—Ioane 2:5.

Hodu badadia 6 idia noho, idia ta ta be ranu lita 40 bamona idia dogoatao diba. Iesu ese hesiai taudia ia hamaoroa: “Hodu be ranu amo umui hahonudia.” Bena Iesu ia gwau: “Sisina umui seia bona aria biaguna dekenai umui abia lao.”​—Ioane 2:7, 8.

Aria biaguna ese unai wain ena mamina ia ura henia bada, to ia diba lasi unai wain be hoa dalanai ia vara. Vadaeni headava matamata tauna ia boiria bona ia gwau: “Taunimanima ese wain namo hereana idia seia guna, bona taunimanima idia kekero neganai, ia namo sisina wain idia seia. To oi ese wain namo hereana be hari sibona oi seia.”​—Ioane 2:10.

Unai be Iesu ese ia karaia hoa kara ginigunana. Iena hahediba taudia ese unai idia itaia neganai, edia abidadama Iesu dekenai ia goada. Unai murinai, Iesu, ena sinana, bona ena tadikakadia be Kaperanauma dekenai idia lao, unai be Galilea Gohuna ena notwest kahanai.