Lagani 30 C.E. ai, Iesu be Ierusalema ai Pasova Aria totona ia noho neganai, toa o hoa karadia haida ia karaia. Unai dainai, taunimanima momo ese ia idia abidadama henia. Farisea tauna bona Iuda ena kota badana Sanhedrin ena memba tauna ta, Nikodemo, be Iesu ena kara ese ena lalona ia veria. So ia ura gau ma haida ia diba dainai, hanuaboi ai Iesu dekenai ia lao. Unai bamona ia karaia badina Iuda tomadiho gunalaia taudia haida ese ia do idia itaia bona gwauraia dika garina.

Nikodemo ia gwau: “Rabi e, ai diba oi be Dirava amo oi mai hadibaia tauna, badina bema Dirava ese tau ta ia durua, ia ese oi karaia hoa karadia ia karaia diba.” Iesu ese Nikodemo ia hamaoroa Dirava ena Basileia lalonai ia ura vareai tauna ia “vara lou” be namo.​—Ioane 3:2, 3.

Nikodemo ese Iesu ia nanadaia: “Bema tau ta ia bada vadaeni, edena bamona ia vara lou diba? Nega iharuana ena sinana ena bogana lalonai ia vareai, bena do ia vara lou, a?”​—Ioane 3:4.

Lasi. Vara lou ena anina be unai lasi. Iesu ia gwau: “Bema ta be ranu bona lauma helaga amo ia vara, ia be Dirava ena Basileia lalonai ia vareai diba.” (Ioane 3:5) Iesu ia bapatiso bona lauma helaga be ia latanai ia diho neganai, ia be “ranu bona lauma helaga amo ia vara.” Unai nega ai guba amo gado ta ia boiboi: “Inai be egu Natuna, egu lalokau, ia lau lalonamo henia.” (Mataio 3:16, 17) Unai dala amo, Dirava ese ia hahedinaraia Iesu be iena lauma natuna ai ia halaoa vadaeni, bona guba Basileia lalonai do ia vareai diba. Gabeai Pentekoste 33 C.E. ai, lauma helaga be bapatiso taudia ma haida latanai do ia diho, bena do idia vara lou, unai amo Dirava ena lauma natudia ai do idia lao danu.​—Kara 2:1-4.

Iesu ese Nikodemo dekenai Basileia gaudia ia hadibaia neganai, Nikodemo ese ia lalopararalaia be auka. Unai dainai, Iesu ese hereva ma haida amo ia hahedinaraia, ia be Dirava ena Natuna bona ia be mai ena gaukara badana. Iesu ia gwau: “Taunimanima lasi gabuna ai Mose ese gaigai be au dekenai ia abia isi hegeregerena, taunimanima ese taunimanima ena Natuna do idia abia isi. Unai amo ia idia abidadama henia taudia ibounai ese mauri hanaihanai do idia abia.”​—Ioane 3:14, 15.

Idaunegai, Israela taudia be gaigai ese idia ia koria neganai, namona be kopa gaigai ena laulau do idia itaia, idia mauri totona. (Numera 21:9) Unai hegeregerena, taunimanima be mase ena igui amo idia roho mauri bona mauri hanaihanai idia abia totona, Dirava ena Natuna idia abidadama henia be namo. Iesu ese Iehova ena lalokau ia hahedinaraia namonamo totona, Nikodemo dekenai ia gwau: “Dirava ese tanobada ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iesu ena haroro gaukara be hua siks lalonai ia karaia vadaeni, bona hari Ierusalema ai, Iesu ese ia hahedinaraia ia be taunimanima hamauria dalana.

Bena Iesu ese Nikodemo ia hamaoroa: “Dirava ese ena Natuna be tanobada dekenai ia siaia, tanobada ia hahemaoro henia totona lasi.” Unai ese ia hahedinaraia Iesu be taunimanima ia hahemaoro henia bona hadikaia ore totona ia mai lasi. To ia gwau, ia be Dirava ese ia siaia  “tanobada taudia be ia amo mauri idia abia totona.”​—Ioane 3:17.

Nikodemo be ia gari dainai hanuaboi ai Iesu dekenai ia lao. Unai dainai Iesu ena hereva dokonai, ia gwau: “Oibe, diari be tanobada dekenai ia mai vadaeni, to taunimanima be diari idia dadaraia bona dibura idia ura henia, badina edia kara be ia dika, unai dainai hahemaoro do idia abia. Kara dika ia karaia tauna be diari ia inai henia bona diari dekenai ia mai lasi, badina diari ese ena kara kereredia ia hahedinaraia garina. To kara maoromaoro ia karaia tauna be diari dekenai ia mai, unai amo do ia hedinarai ia karaia gaudia be Dirava ena ura hegeregerena.”​—Ioane 3:19-21.

Farisea bona Iuda taudia edia hahediba tauna, Nikodemo, ese ia kamonai gaudia bona Iesu ena gaukara Dirava ena ura lalonai do ia lalohadailaia namonamo be namo.