Iesu ia daekau guba dekenai bena dina 10 murinai unai be Pentekoste dinana ai, lauma helaga ia bubua diho, unai nega ai Iesu ia hamomokania ia be guba dekenai ia noho vadaeni. Bona hamomokania gauna ma ta be gabeai ia vara. Stefano be ena abidadama dainai idia do hodoa mase lasi neganai, ia gwau: “Lau itaia guba ia kehoa bona taunimanima ena Natuna be Dirava ena idibana kahanai ia gini noho.”​—Kara 7:56.   

Iesu be guba ai ena Tamana ida ia noho neganai, Baibel ese ia gwauraia hahegani ia naria. Davida be Dirava ena lauma amo inai ia torea: “Iehova be egu Lohiabada [Iesu] dekenai ia gwau, ‘Egu imana idiba kahanai oi helai, ela bona emu inai taudia be emu aena atoa gauna ai lau halaoa.’” Ia naria negana ia ore neganai, do ia ‘ lao iena inai taudia huanai ia lohia.’ (Salamo 110:1, 2) To Iesu be unai ia do karaia lasi neganai, guba amo dahaka do ia karaia?   

Pentekoste 33 C.E. ai, Keristani kongrigeisen ia matamaia. Iesu be guba amo ena horoa hahediba taudia ia lohiaia. (Kolose 1:13) Haroro gaukara ai idia ia hakaua bona vaira negana ena gaukara totona ia hegaegaelaia. Dahaka gaukara do idia karaia? Mai abidadama ida idia mase taudia be do idia toreisi lou bona Iesu ida Basileia ai do idia lohia.

Haheitalai namona ta be Saulo eiava Roma ai ena ladana ta be Paulo. Ia be vaira negana ai king ta ai do ia lao. Ia be Iuda tauna bona Dirava ena Taravatu ia laloa bada, to Iuda tomadiho gunalaia taudia ese idia hakaua kerere dainai Stefano idia hodoa karana ia abia dae. Saulo be Damaseko dekenai ia lao “Lohiabada ena hahediba taudia ia hagaria noho bona ia ura dikadika idia ia alaia.” Hahelaga Tauna Badana Kaiapa ese gwaumaoro ia henia Iesu ena hahediba taudia do ia guia bona Ierusalema dekenai do ia abidia lao. (Kara 7: 58; 9:1) To, Saulo be dala ai ia lao noho lalona, diari ta ia hedinarai bona tano dekenai ia moru.

Gado ta ia gwau: “Saulo e, Saulo e, dahaka dainai lau oi dagedage henia noho?” Saulo ese ia nanadaia, ia gwau: “Tau badana e, oi be daika? Ia gwau: ‘Lau be Iesu, oi dagedage henia noho tauna.’”​—Kara 9:4, 5.

Iesu ese Saulo ia hamaoroa Damaseko siti dekenai do ia vareai, bona hakaua hereva ma  haida totona do ia naria, to diari ese ena matana ia hakepulua dainai ta ese ia hakaua be namo. Matahanai ma ta lalonai Iesu ese Anania, Damaseko ai ia noho hahediba tauna ta dekenai ia hedinarai. Anania ia hamaoroa tau ta ladana Saulo do ia tahua. Anania ia gari, to Iesu ese ia hagoadaia, ia gwau: “Inai tauna be lau abia hidi vadaeni hodu bamona, ia ese bese idauidau, king taudia bona Israela besena dekenai egu ladana do ia gwauraia.” Anania ese Saulo ena matana ia hanamoa, bena Saulo be Damaseko dekenai “Iesu ia harorolaia, ia gwau inai tauna be Dirava ena Natuna.”​—Kara 9:15, 20.

Iesu ena heduru amo, Paulo bona evanelia taudia ma haida ese Iesu ia hamatamaia haroro gaukarana idia karaia. Dirava ese edia gaukara ia hanamoa bada. Iesu be Damaseko ena dala dekenai ia hedinarai negana amo, lagani 25 idia ore murinai, Paulo ia gwau: “Sivarai namona be tanobada hegegemadai idia harorolaia.”​—Kolose 1:23.

Lagani haida murinai, Iesu ese ena lalokau aposetolo tauna, Ioane dekenai matahanai haida ia henia, Baibel bukana Apokalupo ai unai ia noho. Unai matahanai amo Ioane ia itaia Iesu be Basileia ai ia lohia. (Ioane 21:22) “Lauma helaga amo [Ioane] be Lohiabada ena dina lalonai [ia] noho.” (Apokalupo 1:10) Unai be edena negai do ia vara?

Baibel ena peroveta herevadia amo ia hedinarai, “Lohiabada ena dina” be lagani 1914 ai ia matamaia. Unai lagani ai, Tanobada Tuarina Ginigunana ia vara. Unai nega amo ema bona hari, tuari momo, gorere, hitolo, tano mareremarere, bona gau ma haida idia vara. Unai “toana” amo Iesu ese aposetolo taudia dekenai ena “noho negana” bona “nega oromana ena dokona” ia hahedinaraia. (Mataio 24:3, 7, 8, 14) Basileia ena sivarai namona be idia harorolaia noho, Roma ena basileia lalonai sibona lasi, to tanobada ibounai dekenai.

Ioane be lauma helaga ena heduru amo unai ia herevalaia: “Harihari iseda Dirava ese taunimanima dekenai hahemauri ia mailaia, iena siahu ia hedinarai, iena Basileia be ia gini bona iena Keriso ena lohia siahuna be ia matamaia vadaeni.” (Apokalupo 12:10) Oibe Dirava ena guba Basileia, Iesu ese ia harorolaia gauna, be ia vara momokani!

Iesu ena abidadama hahediba taudia ibounai dekenai, unai be sivarai namona. Ioane ena hereva idia abia dae diba, ia gwau: “Unai dainai guba bona guba ai umui noho taudia e, umui moale! Tanobada bona davara, madi o, badina Diabolo be umui dekenai ia diho mai vadaeni, bona ia badu dikadika, badina ia diba iena nega be ia kwadogi.”​—Apokalupo 12:12.

Unai dainai, Iesu be ena Tamana ena idiba kahanai ia helai bona naria lasi. To ia be ia lohia noho, bona kahirakahira ena inai taudia ibounai do ia haorea momokani. (Heberu 10:12, 13) Vaira negana ai dahaka gaudia do idia vara?