Iosepa ese Maria ia hanogaia, gau ta ia hadibaia totona. Iehova ena aneru be nihi ta amo Iosepa dekenai ia hedinarai, ia gwau: “Oi toreisi, natuna maragina bona ena sinana oi abia bona Aigupito dekenai oi heau lao. Bona unuseniai do oi noho ela bona oi lau hamaoroa unai gabu do oi rakatania, badina Heroda ia ura natuna maragina ia tahua ia hamasea totona.”​—Mataio 2:13.

Maoromaoro, Iosepa, Maria bona edia natuna be unai hanuaboi ai idia heau. Unai gabu idia rakatania haraga be maoro, badina Heroda ia laloparara, hisiu stadilaia taudia ese ia idia koia. Matamanai, Heroda ese ia hamaorodia, unai natuna maragina idia davaria neganai, ia do idia hadibaia. To unai idia karaia lasi, bona edia hanua dekenai idia giroa. Heroda ia badu dikadika. Ia ura bada Iesu ia hamasea dainai, oda ia henia Betelehema bona ena badina hanuadia dekenai mauri lagani rua amo ia diho memero ibounai idia hamasea totona. Ist kahana amo idia mai hisiu stadilaia taudia amo ia dibaia hegeregerena, Heroda ia laloa hari Iesu ena mauri lagani be rua.

Memero ibounai hamasea karana be kara dikana momokani! Ita diba lasi memero hida idia hamasea, to sinadia idia taitai badabada karana ese Baibel ena peroveta herevana ia hagugurua—unai be Dirava ena peroveta tauna Ieremia ese ia gwauraia.​—Ieremia 31:15.

Iosepa bona ena famili be Aigupito dekenai idia lao, bona unuseniai idia noho. Bena hanuaboi ta ai, Iehova ena aneru be nihi ta amo Iosepa dekenai ia hedinarai lou. Ia gwau: “Oi toreisi, natuna maragina bona ena sinana oi abia bona Israela tanona dekenai oi lao, badina natuna maragina idia ura alaia taudia be idia mase vadaeni.” (Mataio 2:20) Unai amo Iosepa  ia diba ia bona ena famili be edia tano dekenai idia giroa lou be namo. Unai ese Baibel ena peroveta herevana ma ta ia hagugurua—Dirava ena Natuna Mero be Aigupito amo ia boiria mai.​—Hosea 11:1.

Iosepa ia ura ena famili ida Iudea ai idia noho, reana Betelehema taoni kahirakahira, badina guna unuseniai idia noho, to gabeai Aigupito dekenai idia lao. To, Iosepa ia kamonai Heroda ena natuna dikana, Akelao, be Iudea ena king. Nihi ma ta lalonai, Dirava ese do ia vara gauna be Iosepa ia hadibaia. Unai dainai Iosepa bona ena famili be not kahana idia lao bona Nasareta siti dekenai idia noho, unai be Galilea ai, unai amo Iuda tomadiho karadia do idia badinaia lasi. Iesu be unai siti dekenai ia tubu daekau, unai ese peroveta herevana ma ta ia hagugurua, ia gwau: “Ia do idia gwauraia Nasareta Tauna.”​—Mataio 2:23.