Siahu negana ia matamaia. Bona Iosepa ena famili, turadia, bona varavara be idia hegaegae Ierusalema dekenai idia lao totona. Lagani ta ta unuseni idia lao, Pasova aria totona, unai be Taravatu hegeregerena. (Deuteronomi 16:16) Nasareta amo ia lao Ierusalema ena daudau be kilomita 120 bamona. Unai be moale bada negana. Iesu ena mauri lagani be 12 bona ia ura bada inai aria dekenai ia lao, badina dubu helaga do ia vadivadi henia lou.

Iesu bona ena famili dekenai Pasova aria be mai anina bada, ia be dina tamona ai do idia karaia gauna sibona lasi. Pasova dinana ia ore murinai, Isti Lasi Paraoa Ena Aria be dina 7 lalonai idia moalelaia. (Mareko 14:12) Bona idia gwau, unai be Pasova aria ena kahana ta. Edia hanua Nasareta idia rakatania, Ierusalema ai idia noho, bona Nasareta dekenai idia giroa lou negana ena daudau be wiki rua bamona. To inai lagani ai, Iesu dekenai ia vara gauna dainai idia noho daudau. Oibe, idia be Ierusalema amo idia giroa lou neganai, gau ta ia vara.

Idia laolao noho lalonai, Iosepa bona Maria idia laloa Iesu be varavara bona turadia huanai ia noho. To, hanuaboi ai laga-ani totona gabu ta dekenai idia stopu neganai, Iesu idia itaia lasi. Vadaeni edia bamodia huanai Iesu idia tahua matamaia, to idia davaria lasi! Oibe, edia natuna ia noho lasi! Vadaeni Iosepa bona Maria be Ierusalema dekenai idia giroa lou, Iesu idia tahua totona.

Dina ibounai lalonai Iesu idia tahua, to idia davaria lasi. Murina dinana ai danu Iesu idia do davaria lasi. To dina ihatoina ai, dubu helaga mai ena daiutu momo dekenai edia natuna idia davaria. Iesu be Iuda ena hadibaia taudia haida huanai ia helai. Ia kamonai noho bona henanadai momo ia henia, bona idia be Iesu ena laloparara karana dekenai idia hoa.

Maria ia henanadai: “Natugu e, dahaka dainai ai dekenai inai bamona oi karaia? Lau bona emu tamana be mai lalohekwarahi bada ida oi ai tahua noho.”​—Luka 2:48.

Iesu ia hoa badina ena tama sina idia diba lasi edeseniai ia do idia davaria. Unai dainai ia gwau: “Dahaka dainai lau umui tahua? Umui laloparara lasi lau be egu Tamana ena ruma dekenai lau noho be namo, a?”​—Luka 2:49.

Bena Iesu idia davaria murinai, ia be Iosepa bona Maria ida Nasareta dekenai ia giroa lou bona idia henunai ia noho. Iesu ia tubu daekau bona ena aonega ia bada ia lao. Herevana ia be mero matamata, to Dirava bona taunimanima ese ia idia lalonamo henia. Oibe, Iesu ia maragi  negana amo, ia be haheitalai namona, badina Dirava ena ura ia tahua guna bona ena tama sina ia matauraia.