Roma Basileiana ena lohia, Kaisara Augusto, ese taunimanima ibounai ia oda henia, edia ladana idia rejista totona. Unai dainai Iosepa bona Maria be Iosepa ia vara gabuna, Betelehema dekenai idia lao be namo, unai be Ierusalema ena saut kahanai ia noho siti.

Taunimanima momo be Betelehema dekenai idia lao edia ladana idia rejista totona. Iosepa bona Maria be noho gabuna ta idia davaria lasi dainai, doniki bona animal edia ruma ai idia noho. Unuseniai Iesu ia vara. Maria ese dabua amo Iesu ia kumia, bona animal edia aniani mauana lalonai ia atoa.

Reana Dirava ese Kaisara Augusto ia gaukaralaia ladana rejista ena taravatu ia halasia totona. Dahaka dainai? Badina unai amo Iesu be Betelehema dekenai do ia vara, unai be ena sene tauna King Davida ena hanua. Toretore Helagadia ia peroveta, Dirava ese ia gwauhamatalaia Lohia Tauna be Betelehema ai do ia vara.​—Mika 5:2.

Inai be mai anina bada hanuaboina! Mamoe naria taudia haida be murimuri ai idia noho neganai, diari badana ta ese idia ia hagegea. Unai be Iehova ena hairai! Dirava ena aneru ta be mamoe naria taudia dekenai ia gwau: “Umui gari lasi. Badina lau mai, umui dekenai taunimanima ibounai ese do idia moalelaia bada sivarai namona lau gwauraia totona. Badina hari dina Davida ena siti ai, umui do ia hamauria tauna ia vara vadaeni, ia be Keriso Lohiabada. Bona umui dekenai toa be inai: Do umui itaia, beibi ta be dabua amo idia kumia bona animal edia aniani mauana lalonai ia hekure.” Vadaeni aneru momo herea idia hedinarai, bona idia gwau: “Ataiai momokani ia noho Diravana hanamoa, bona tanobada ai ia lalonamo henia taudia be maino do idia abia.”​—Luka 2:10-14.

Aneru idia lao neganai, mamoe naria taudia be ta ta dekenai idia gwau: “Namona be Betelehema dekenai ita lao bona ia vara gauna ita itaia, Iehova ese ita dekenai ia hadibaia hegeregerena.” (Luka 2:15) Mamoe naria taudia idia lao haraga bona aneru ese ia gwauraia gabuna dekenai beibi Iesu idia itaia. Idia ese aneru ena hereva idia gwauraia neganai, idia kamonai taudia ibounai idia hoa. Maria be unai hereva ibounai ia laloa noho, bona ena kudouna ai edia anina ia laloa dobu.

Hari, momo idia laloa Iesu be December 25 ai ia vara. To Betelehema ai, December be medu bona keru negana. Nega haida sinou ia diho. Unai negadia ai, mamoe naria taudia be hanuaboi ai edia mamoe oreadia ida murimuri ai idia noho lasi. Danu, Roma ena lohia tauna be unai negai taunimanima do ia hamaoroa lasi edia ladana idia rejista totona, badina ia idia gwau-edeede henia taudia be do idia ura lasi keru bada negana lalonai unai do idia karaia totona. Momokani, Iesu be reana siahu negana ai ia vara, reana October lalonai.