1, 2. Peroveta tauna Isaia ese dahaka matahanai ia abia, bona unai amo ita diba Iehova be edena bamona Diravana?

 ISAIA be Dirava amo ia abia matahanaina dainai, ia hoa bada bona mai hemataurai ida Dirava ia gari henia. Toana be ia itaia gauna be ia vara momokani bamona! Isaia be unai sivarai ia torea neganai, ia gwau, “Iehova lau itaia” ena terona latanai ia helai noho. Ierusalema dekenai ia noho dubu badana be Iehova ena dabua latana amo ia honu.​—Isaia 6:1, 2.

² Isaia ia kamonai gauna dainai ia hoa danu—ane be mai siahu ida idia abia dainai, dubu bona ena badina idia marere. Unai ane be dagi bada lauma taudia, serapi ese idia abia. Unai ane hereadaena mai siahuna, ena hereva namodia be inai: “Tuari oreadia edia Iehova be helaga, helaga, helaga. Tanobada ibounai be ena hairai amo ia honu.” (Isaia 6:3, 4) Ane lalonai inai hereva “helaga” be nega toi idia abia, unai ese ia hahedinaraia helaga be mai anina bada bona unai be maoro badina helaga karana dekenai Iehova be hereadae. (Apokalupo 4:8) Iehova ena helaga karana be Baibel ibounai lalonai idia gwauraia. Siri momo lalonai ena ladana idia noho gabudia ai, inai hereva “helaga” ia noho danu.

3. Edena dala ai, Iehova ena helaga karana idia laloa kerere taudia momo be Dirava kahirakahira idia lao lasi to ia amo idia raka siri?

³ Ia hedinarai goevagoeva, Iehova ia ura ia dekenai ita lalo-pararalaia gauna badana ta be inai, ia be helaga. To hari momo be unai lalohadai ese ia hagaridia. Taunimanima haida idia laloa kerere, idia laloa helaga be sibona gwauraia maoromaoro karana eiava Dirava badinaia koikoi karana. Sibodia idia laloa maragi taudia be Dirava ena helaga karana ese edia lalona ia veria lasi to idia ia hagaria. Reana idia mamia idia hegeregere lasi unai helaga Diravana kahirakahira idia lao totona. Dirava ena helaga karana dainai, momo be ia amo idia raka siri. To  madi unai be maoro lasi badina Dirava ena helaga karana be ia kahirakahira ita ura ita lao ena badina badana. Dahaka dainai? Unai henanadai ita do haerelaia lasi neganai, namona be helaga ena anina korikorina ita herevalaia.

4, 5. (a) Helaga ena anina be dahaka bona ia be dahaka lasi? (b) Iehova be edena mai anina bada daladia rua amo ia “parara”?

⁴ Ita gwau lasi Dirava ia helaga anina be ena diba ia laloa bada, ia hekokoroku, eiava ma haida ia laloa maragi. Lasi, to ia ese unai bamona kara ia inai henia. (Aonega Herevadia 16:5; Iamesi 4:6) Vadaeni, inai hereva “helaga” ena anina korikorina be dahaka? Baibel idia torea Heberu gado ai, idia gaukaralaia herevana be hereva ta ena anina “parara” amo idia abia. Tomadiho karadia lalonai, inai hereva “helaga” be dina ta ta ai idia gaukaralaia gaudia amo idia hapararaia gaudia, eiava idia hahelagaia gaudia, ia herevalaia. Helaga karana ena anina ma ta be goeva karana. Iehova ita laloa neganai, unai hereva ena anina be dahaka? Ena anina be ia be goevadae lasi taudia amo ia “parara” bona ita amo ia daudau, a?

⁵ Lasi vaitani. Iehova be “Israela ena Helaga Diravana,” ia be iena bese taudia ia hamaoroa ia be edia huanai ia noho, ena be idia be goevadae lasi taudia. (Isaia 12:6; Hosea 11:9) Unai dainai, ena be ia be helaga Diravana, to ita amo ia noho daudau lasi. Vadaeni, edena dala ai ia “parara”? Mai anina bada daladia rua amo. Ginigunana be inai, ia havaraia gaudia ibounai amo ia parara badina ia be Atai Momokani Diravana. Ia be goeva momokani bona unai bamona do ia noho ela bona hanaihanai. (Salamo 40:5; 83:18) Iharuana be inai, Iehova be kara dika ibounai amo ia parara momokani bona unai ese ita ia hagoadaia. Dahaka dainai?

6. Iehova be kara dika amo ia parara momokani dainai, edena dala ai unai ese iseda lalona ia hagoadaia?

⁶ Ita noholaia tanobadana ai, taunimanima ese helaga karadia idia hahedinaraia momo lasi. Dirava ena amo ia daudau tanobada besena ena kara ibounai be ia miro, mai ena dika bona ia goevadae lasi. Ita ibounai be iseda lalonai ia noho kara dika  ita tuari henia noho. Bona bema ita naria namonamo lasi, kara dika ese ita ia halusia diba. (Roma 7:15-25; 1 Korinto 10:12) Iehova be unai bamona dika ia davaria diba lasi. Kara dika amo ia parara momokani dainai, kara dika maragina ta ese ia do ia hamiroa diba lasi. Unai ese ia hamomokania Iehova be Tamana hereadaena, badina ena anina be Ia ita tabekau henia momokani diba. Tanobada tamadia momo be mai edia kara dika, idia koikoi, idia lebulebu eiava ita idia dagedage henia, to Iehova be unai bamona lasi. Ia be helaga dainai, unai bamona kara ta ia karaia diba lasi. Iehova be nega haida ena helaga karana dekenai gwauhamata ia karaia, bona unai dainai ena gwauhamata herevadia ita abidadama henia momokani diba. (Amosa 4:2) Unai ese iseda lalona ia hagoadaia, ani?

7. Dahaka dainai ita gwau diba helaga karana be vaia Iehova ena kara ta?

⁷ Helaga karana be vaia Iehova ena kara ta. Unai ena anina be dahaka? Haheitalai be inai: Mani inai hereva “taunimanima” bona “goevadae lasi” ita laloa. Taunimanima ita herevalaia neganai nega momo goevadae lasi ita laloa. Iseda kara ibounai be goevadae lasi bona ita karaia gaudia ibounai lalonai ia hedinarai. Hari, mani inai hereva idaudia rua—“Iehova” bona “helaga”—ita laloa. Iehova ena kara ibounai be helaga. Ia karaia gaudia ibounai be goevadae, miro lasi bona maoromaoro. Iehova do ita diba lasi bema inai hereva, “helaga” ena anina ita lalo-pararalaia namonamo lasi.

8, 9. Dahaka ese ia hahedinaraia Iehova ese goevadae lasi taudia ia durua idia helaga totona?

⁸ Iehova ese helaga karana ia hahedinaraia goevagoeva dainai, ita gwau diba ia be helaga ibounai ena badina be maoro. Unai kara namona be ia sibona totona ia hunia lasi; to ma haida dekenai ia henia, bona mai hariharibada ida ia karaia. Oibe, Dirava be aneru ta amo lahi ese ia gabua noho uda amo Mose ia hereva henia neganai, Mose ia gini gabuna be ia helaga badina Iehova be unai gabu dekenai ia hereva!​—Esodo 3:5.

⁹ Iehova ena heduru amo goevadae lasi taudia idia helaga diba, a? Oibe, idia helaga diba. Dirava ese ena taunimanima—Israela  taudia—dekenai dala ia kehoa idia be “bese helagana” ai idia lao totona. (Esodo 19:6) Unai bese taudia ia hanamoa, bona idia dekenai helaga bona goeva tomadiho dalana ia henia. Unai dainai helaga karana be Mose ena Taravatu lalonai idia herevalaia loulou. Oibe, Hahelaga Tauna Badana ena kwara gauna latanai golo gauna ta idia atoa, ibounai idia itaia diba ia diaridiari. Ia latanai be inai hereva idia torea: “Helaga karana be Iehova ena.” (Esodo 28:36) Unai dainai, goeva bona miro lasi karadia ese idia hahedinaraia edia tomadiho, bona mauri dalana be ia idau. Iehova ese idia ia hamaoroa, ia gwau: “Namona be umui helaga, badina lau, Iehova emui Dirava, be helaga.” (Levitiko 19:2) Israela taudia be goevadae lasi taudia idia karaia diba hegeregerena Iehova ena sisiba idia badinaia neganai, idia helaga diba.

10. Helaga karana dekenai, idaunegai Israela besena bona ia badibadinai idia noho besedia edia idau be dahaka?

¹⁰ Unai helaga karadia laloa bada karana be Israela badibadinai idia noho besedia edia tomadiho dalana amo ia idau. Unai kaivakuku tomadiho henia besedia edia dirava be koikoi, dagedage, mataganigani, bona matabodaga diravadia. Gau ibounai dekenai idia helaga lasi. Unai bamona dirava tomadiho henia karana ese taunimanima ia hamiroa. Unai dainai, Iehova ese ena hesiai taudia ia sisiba henia unai kaivakuku tomadiho henia taudia bona edia tomadiho kara mirodia amo do idia gini siri.​—Levitiko 18:24-28; 1 King Taudia 11:1, 2.

11. Iehova ena guba oreana ena helaga karana be edena dala ai ia hedinarai (a) aneru dekenai? (b) serapi dekenai? (c) bona Iesu dekenai?

¹¹ Nega namodia ai danu, Iehova ese ia abia hidi idaunegai Israela besena ese Dirava ena guba oreana ena helaga toana be sisina sibona ia hahedinaraia diba. Mai edia kamonai ida Dirava idia hesiai henia lauma taudia milioni momo be Baibel ese ia gwauraia ena “aneru helagadia tausen momo.” (Deuteronomi 33:2; Iuda 14) Idia ese Dirava ena helaga karadia mai diarina bona mai hairaina idia hahedinaraia goevagoeva. Bona mani Isaia ese ena matahanai dekenai ia itaia serapi ita laloa lou. Idia abia anena ese ia hahedinaraia, inai lauma taudia goadadia ese mai anina bada gaukarana idia karaia, tanobada bona guba ibounai lalonai Iehova ena helaga karana idia  gwauraia hedinarai. To, lauma tauna ta sibona ese idia ibounai ia hereaia—Dirava ena lalokau Natuna tamona unai. Iesu be Iehova ena helaga karana ia hahedinaraia goevagoeva. Unai dainai, Baibel ese Iesu ia gwauraia “Dirava ena Helaga Tauna” be maoro.​—Ioane 6:68, 69.

12, 13. (a) Dahaka dainai Dirava ena ladana idia gwauraia helaga be maoro? (b) Dahaka dainai Dirava ena ladana idia hadikaia herevadia do ia hanamoa be namo?

¹² Dirava ena ladana be edena bamona? Karoa 1 dekenai ita herevalaia bamona, unai ladana be dagi ladana ta sibona lasi. Unai ladana ese Iehova Dirava bona ena kara ibounai ia hahedinaraia. Unai dainai, Baibel ese ita ia hamaoroa ena “ladana be helaga.” (Isaia 57:15) Mose ena Taravatu lalonai, Dirava ena ladana idia hadikaia taudia edia davana be mase. (Levitiko 24:16) Bona guriguri lalonai Iesu ese ia gwauraia gauna ginigunana mani oi itaia: “Aiemai Tamana guba dekenai oi noho, namona be ibounai ese emu ladana idia hahelagaia.”(Mataio 6:9) Gau ta ita hahelagaia ena anina be, unai gauna be helaga gaukara totona ita atoa siri bona ita matauraia, ia be helaga. To dahaka dainai ia goeva momokani gauna, Dirava ena ladana unai, ita hahelagaia be namo?

¹³ Dirava ena ladana helagana be idia matauraia lasi bona koikoi herevadia amo idia hadikaia vadaeni. Eden umana lalonai, Satani ese Iehova ia gwauraia koikoi bona ia gwau Iehova be Lohia Tauna maorona lasi. (Genese 3:1-5) Unai nega amo ema bona hari, Satani—inai helaga lasi tanobadana ena lohia—ese dala ia karaia Dirava gwauraia koikoi karana ia habadaia totona. (Ioane 8:44; 12:31; Apokalupo 12:9) Tomadiho oreadia idia gwau Dirava be ena siahu ia gaukaralaia kerere, taunimanima amo ia noho daudau, eiava ia be dagedage tauna. Edia tuari lalonai rara bada idia bubua, idia gwau Dirava ese idia ia durua. Dirava ia havaraia gaudia namodia dainai ia idia hanamoa lasi, to nega momo idia gwau idia vara kava, eiava evolusen amo idia vara. Oibe, Dirava ena ladana idia hadikaia momokani. Iehova ese ena ladana ia hahelagaia be namo; iena hairai korikorina  ia abia lou be namo. Iehova be iena ladana idia hadikaia karadia ibounai do ia kokia negana ita naria noho. Iena Natuna ese ia lohiaia Basileiana amo unai do ia karaia. Mai moale ida unai gaukara ita durua.

14. Dahaka dainai Dirava ena lauma idia gwauraia helaga, bona dahaka dainai lauma helaga gwauraia dika karana be kerere bada?

¹⁴ Iehova ida idia gwauraia gauna ma ta ia noho, nega momo idia gwauraia helaga—iena lauma, eiava gaukara siahuna unai. (Genese 1:2) Iehova ese unai siahu, gau ta ese ia koua diba lasi siahuna unai, ia gaukaralaia ena ura ia hagugurua totona. Dirava ese ia karaia gaudia ibounai be helaga bona goeva dalanai ia karaia, unai dainai ena gaukara siahuna dekenai inai ladana, lauma helaga ia henia be maoro. (Luka 11:13; Roma 1:4) Mai eda ura ida Iehova ena ura ita dadaraia neganai, anina be lauma helaga ita gwauraia dika unai, bona Iehova ese ita do ia gwauatao lasi.​—Mareko 3:29.

15. Dahaka dainai Iehova ena helaga karana be, Dirava ia gari henia eiava hemataurai karana ida ita gwauraia hebou be maoro bona ena anina be dahaka?

¹⁵ Vadaeni, ita laloparara dahaka dainai Baibel ese Dirava ena helaga karana bona matauraia karana, eiava taunimanima ese ia idia gari henia be namo karana ia gwauraia hebou. Hegeregere, Salamo 99:3 ia gwau: “Emu ladana badana idia hanamoa be namo, badina emu ladana be helaga bona idia matauraia be namo.” Unai matauraia karana ena anina be, iena ladana ita hemataurai bada. Unai bamona hemami ita abia be maoro, badina ena helaga karana be hereadae. Ia be goeva momokani bona mai ena hairai bada. To, namo lasi unai ese ita ia hagaria. Lasi, to, Dirava ena helaga karana dekenai lalohadai maorona ita abia neganai, unai ese ita do ia veria ia kahirakahira ita lao totona. Dahaka dainai?

16. (a) Edena dala ai helaga karana be hairai ida idia gwauraia hebou? Haheitalai ta gwauraia. (b) Edena dala ai matahanai ese Iehova ena kara goeva bona diari ia hahedinaraia?

¹⁶ Baibel ese helaga karana be hairai ida ia gwauraia hebou.  Isaia 63:15 ese guba ia gwauraia Dirava ena “helaga bona hairai bada noho gabuna.” Unai hairai ita ura henia bada. Hegeregere, rau 33 dekenai ia noho laulau mani oi itaia. Unai laulau mai hairaina ese emu lalona ia veria, ani? Dahaka dainai unai laulau ese emu lalona ia veria? Mani ranu oi itaia, ia goeva momokani. Reana hodahoda danu be ia goeva, badina guba ena kala be bulu bona ia diaridiari. To, bema unai laulau idia haidaua—sinavai be momoru amo ia honu, ena au bona nadi latanai idia toretore, hodahoda be kwalahu ese ia koua—unai laulau ese iseda lalona do ia veria lasi; do ita ura henia lasi. Nega momo hairai be goeva bona diari ida ita gwauraia hebou. Unai bamona hereva amo Iehova ena helaga karana ita gwauraia diba. Unai dainai, matahanai lalonai Iehova ena toana idia herevalaia dalana ita hoalaia! Ia amo diari ia mai, dava bada nadina bamona ia diaridiari, lahi bamona ia hururuhururu eiava golo bona siliva bamona ia diaridiari—iseda Dirava helagana ena hairai bada be unai bamona.​—Esekiela 1:25-28; Apokalupo 4:2, 3.

17, 18. (a) Isaia be matahanai ia abia neganai, matamanai ena hemami be edena bamona? (b) Iehova ese edena dala ai serapi ta ia gaukaralaia Isaia ia hagoadaia totona, bona unai serapi ia karaia karana ena anina be dahaka?

¹⁷ To, Dirava ena helaga karana dainai ita mamia ita be ia henunai ita noho be namo, a? Haere be, oibe. Badina ita be Iehova ida ita hegeregere lasi momokani. Unai ita diba dainai ia amo ita noho daudau be namo, a? Isaia ia kamonai serapi be Iehova idia gwauraia helaga neganai, iena hereva mani ita laloa. “Bena lau gwau: “Madi, lau be dika momokani! Lau be lau mase vadaeni bamona, badina egu matana ese King, tuari oreadia edia Iehova, ia itaia vadaeni! To egu uduna amo idia mai herevadia be miro, bona lau be miro herevadia idia gwauraia taudia huanai lau noho.’” (Isaia 6:5) Oibe, Iehova ena helaga momokani karana ese Isaia ia hadibaia lou ia be kara dika bona goevadae lasi tauna. Matamanai, unai tauna mai ena abidadama be ia lalohisihisi bada. To Iehova ese ia durua.

¹⁸ Serapi ta ese unai peroveta tauna ia hagoadaia. Edena dala ai? Unai lauma goadana be boubou patana dekenai ia roho lao, lahi gida ta ia abia bona Isaia ena udu bibina dekenai ia  atoa. Reana ita laloa unai ese Isaia ia hagoadaia lasi to ia hahisia. To laloaboio lasi, inai matahanai be mai ena laulau herevadia momo. Abidadama Iuda tauna, Isaia, be ia diba kara dika gwauatao totona, dina ta ta ai dubu ena pata dekenai boubou idia karaia. Bona unai serapi be mai lalokau ida unai peroveta tauna ia hadibaia lou, ena be ia be goevadae lasi tauna bona ena ‘uduna be miro,’ to Dirava vairanai ia goeva diba. a Iehova ia abia dae unai goevadae lasi tauna be helaga.​—Isaia 6:6, 7.

19. Ena be ita be goevadae lasi taudia, to edena dala ai ita helaga diba?

¹⁹ Hari inai negai unai be momokani. Ierusalema ena boubou patana dekenai idia bouboulaia gaudia ibounai ese gau hereadaena ta ia laulaulaia—Iesu Keriso ese lagani 33 C.E. ai ia henia boubou gauna goevadaena unai. (Heberu 9:11-14) Bema iseda kara dika amo ita helalo-kerehai momokani, iseda dala kererena ita rakatania bona unai boubou gauna ita abidadama henia, iseda kara dika do ia gwauatao. (1 Ioane 2:2) Ita danu be Dirava vairanai ita goeva diba. Unai dainai aposetolo Petero ese ita ia hadibaia lou, ia gwau: “Toretore Helagadia ia gwau: ‘Do umui helaga, badina lau be lau helaga.’” (1 Petero 1:16) Iehova ia  gwau lasi ita be do ita helaga ia hegeregerena. Ita karaia diba lasi gaudia be ita amo ia noia lasi. (Salamo 103:13, 14) To, Iehova ese ita ia hamaoroa do ita helaga, badina ia be helaga. Ita be ena “lalokau natudia” dainai, ena be ita goevadae lasi, to ita hekwarahi ia ita tohotohoa totona. (Efeso 5:1) Unai dainai ita helaga noho totona ita gaukara noho be namo. Lauma dalanai ita goada ita lao lalonai, dina ta ta ai ita gaukara goada ita “helaga noho” totona.​—2 Korinto 7:1.

20. (a) Dahaka dainai iseda helaga Diravana vairanai ita goeva diba karana, ita lalopararalaia be gau badana? (b) Isaia ia laloparara Iehova ese ena dika ia gwauatao neganai, dahaka ia karaia?

²⁰ Iehova be kara maoromaoro bona kara goeva ia ura henia. Ia ese kara dika ia inai henia. (Habakuku 1:13) To ita ia inai henia lasi. Bema ita ese ena lalohadai kara dika dekenai ita abia—kara dikadia ita inai henia, kara namodia ita ura henia—bona bema ita hekwarahi Keriso Iesu ena aena gabudia dekenai ita raka, Iehova ese iseda dika do ia gwauatao. (Amosa 5:15; 1 Petero 2:21) Ita lalo-parara ita be iseda helaga Diravana vairanai ita goeva diba neganai, unai be heduru gauna badana. Laloaboio lasi, matamanai Isaia ese Iehova ena helaga karana ia kamonai neganai, ia laloatao ia be goevadae lasi tauna. Ia boiboi ia gwau: “Madi, lau be dika momokani!” To, ia lalo-parara Iehova ese ena dika ia gwauatao neganai, iena lalohadai ia haidaua. Iehova ese gaukara tauna ta ia tahua neganai, Isaia be mai ena ura ida unai gaukara ia abia dae, ena be ia diba lasi unai be edena bamona gaukara. Ia gwau: “Lau inai! Lau oi siaia!”​—Isaia 6:5-8.

21. Dahaka dainai ita diba momokani helaga karana ita hahedinaraia diba?

²¹ Ita be Dirava helagana ese ena toana hegeregerena ai ita ia karaia, ita dekenai kara goevadia bona lauma gaudia lalopararalaia dibana ia henia danu. (Genese 1:26) Ita ibounai ese helaga karadia ita hahedinaraia diba. Helaga karadia ita hahedinaraia noho lalonai, Iehova be mai moale ida ita do ia durua. Unai bamona ita karaia neganai, iseda helaga Diravana kahirakahira momokani do ita lao. Danu, karoa gabedia lalonai Iehova ena kara ita herevalaia neganai, ia kahirakahira ita lao ena badina namodia momo do ita itaia!