1, 2. (a) Oi ura Dirava dekenai dahaka henanadai oi henia? (b) Mose be Dirava dekenai dahaka henanadai ia henia?

 DIRAVA ida oi herevahereva karana be oi laloa diba, a? Unai oi laloa neganai oi hoa bada—guba bona tanobada ena Lohia Badana be oi danu ia herevahereva noho! Maoromaoro oi hereva lasi, to gabeai oi haere henia. Ia kamonai, ia haere, bona oiemu gari mamina ia kokia dainai oi laloa bada henanadai ta oi henia diba. Vadaeni, ia dekenai dahaka henanadai do oi henia?

² Idaunegai, tau ta dekenai unai ia vara. Iena ladana be Mose. To, Dirava dekenai ia henia henanadai dainai reana do oi hoa. Ia sibona ena mauri, ena vaira negana, eiava taunimanima edia hekwakwanai dainai ia henanadai lasi. To, Dirava ena ladana totona ia henanadai. Reana oi laloa unai be kara idauna, badina Mose be Dirava ena ladana ia diba vadaeni. Vadaeni, reana ena henanadai be mai ena anina dobuna. Oibe, Mose ese ia henia henanadai be mai ena anina bada. Ena haere be mai anina ita ibounai dekenai. Oi ia durua diba Dirava kahirakahira oi lao totona. Edena dala ai? Mani edia herevahereva karana ita laloa.

3, 4. Dahaka ia vara dainai Mose be Dirava ida ia herevahereva, bona dahaka idia herevalaia?

³ Mose ena mauri lagani be 80. Ia be ena bese Israela taudia, Aigupito ena igui henunai idia noho taudia unai, amo idia lulua bona lagani 40 lalonai idau gabu ai ia noho. Dina ta, ena ravana ena mamoe serina ia naria noho lalonai, hoa gauna idauna ta ia itaia. Au ginigini ta be lahi ese ia araia, to ia gabua ore lasi. Lahi ia araia noho sibona, toana be ororo dorina ai idia noho bona sisima edia dala ia hahedinaraia lamepa bamona, ia diaridiari. Mose be unai ia itaia namonamo totona ia raka kahirakahira lao. Unai lahi amo gado ta be ia dekenai ia hereva neganai, reana ia hoa bada herea! Dirava be iena hereva ia halasia aneruna ta amo, Mose ida nega daudau lalonai ia kiki. Bona, reana oi diba vadaeni, Dirava ese Mose ia hagania ena mauri namona do  ia rakatania bona Aigupito dekenai do ia giroa lao, Israela taudia be igui amo ia ruhaia totona.​—Esodo 3:1-12.

⁴ Unai nega ai, Mose be Dirava dekenai henanadai idauidau ia henia diba. To, mani oi itaia dahaka henanadai ia henia: “Bema Israela taudia dekenai lau lao bona idia dekenai lau gwau, ‘Emui sene taudia edia Dirava ese umui dekenai lau ia siaia,’ bona lau dekenai idia gwau, ‘Iena ladana be daika?’ Idia dekenai dahaka do lau gwau?”​—Esodo 3:13.

5, 6. (a) Mose ena henanadai amo dahaka mai anina bada hereva momokani ita dibaia? (b) Dirava ena ladana be edena bamona idia hadikaia? (c) Dahaka dainai Dirava ese ena ladana be taunimanima dekenai ia hahedinaraia be mai anina bada?

⁵ Unai henanadai amo ita dibaia gau ginigunana be Dirava be mai ena ladana. Namona be unai hereva momokani ita laloa bada. To, momo ese unai idia laloa bada lasi. Idia hahanaia Baibel momo herea amo Dirava ena ladana idia kokia bona ena gabu ai dagi ladadia haida, hegeregere “Lohiabada” bona “Dirava” idia atoa. Unai be tomadiho ena ladanai idia karaia lalohisihisi bona kara dika badana ta. Tau ta oi hedavari henia neganai, oi karaia kara ginigunana be dahaka? Iena ladana totona oi henanadai, ani? Dirava ita dibaia matamaia danu be unai bamona. Ia be mai ena ladana, ia ita dibaia bona lalopararalaia diba. Dirava be ita amo ia daudau lasi. Ena be ia ita itaia diba lasi, to ia be Ia noho, bona ia be mai ena ladana—Iehova.

⁶ Ma danu, Dirava ese ena ladana ia gwauraia hedinarai neganai, moale bada gauna ta do ia vara. Ia ese ita ia boiria noho ia ita dibaia totona. Ia ura iseda mauri lalonai abia hidi namona ita karaia—ia kahirakahira do ita lao. To Iehova ese ita dekenai iena ladana sibona ia gwauraia lasi. To, iena ladana amo ena kara Ia hahedinaraia danu.

7. (a) Dirava ena ladana ena anina be dahaka? (b) Mose be Dirava ena ladana totona ia henanadai neganai, ia ura momokani dahaka ia diba?

⁷ Iehova ese ia sibona ena ladana ia abia hidi, unai ladana be mai ena anina bada. “Iehova” ena anina be “Do Lau Halaoa.” Iunives lalonai Ia be hereadae, badina ia ese gau ibounai ia havaraia.  Ia be ena ura ibounai do ia hagugurua, bona iena goevadae lasi hesiai taudia ia gaukaralaia diba ena ura gauna ia hagugurua totona. Unai ita laloa neganai ita hoa bada. To, Dirava ena ladana ena anina korikori be unai sibona, a? Mose ia ura gau momo ia dibaia. Mose ia diba Iehova be gau ibounai ia havaraia, bona Dirava ena ladana ia diba. Momokani, Dirava ena ladana be matamata lasi. Taunimanima ese lagani handred momo lalonai unai ladana idia gaukaralaia vadaeni. Ita daradara lasi, Mose be Dirava ena ladana totona ia henanadai neganai, ia ura unai ladana ia abia Tauna ia dibaia namonamo. Hegeregere, Mose ia gwau: ‘Oiemu taunimanima, Israela taudia dekenai dahaka do lau hereva, unai amo oi do idia abidadama henia, bona do idia abia dae momokani oi ese idia do oi hamauria?’

8, 9. (a) Edena dala ai Iehova ese Mose ia haere henia? Bona nega momo ena haere be edena dala ai idia hahanaia kerere? (b) Inai hereva, “Dahaka ai Lau Ura Sibona Lau Halaoa be Do Lau Halaoa” ena anina be dahaka?

⁸ Iehova ena haere amo, ena kara hereadaena ta ia gwauraia hedinarai, unai ese ena ladana ena anina ia hahedinaraia. Mose ia hamaoroa, ia gwau: “Dahaka ai Lau Ura Sibona Lau Halaoa be Do Lau Halaoa.” (Esodo 3:14) Idia hahanaia Baibel momo ese unai hereva be inai bamona idia gwauraia: “Lau inai lau noho.” To idia hahanaia namonamo Baibel ese Dirava ia noho karana ia hamomokania sibona lasi, to Mose—bona ita ibounai—ia hadibaia Ia be ia ura ‘dahaka ai ia sibona ia halaoa’ ena gwauhamata ia hagugurua totona. J. B. Rotherham ese ia hahanaia Baibel ia gwau: “Lauegu ura hegeregerena Lau Sibona Do Lau Halaoa.” Heberu gado Baibel ia diba momo tauna ta ese unai Baibel ena hereva be inai bamona ia gwauraia: “Herevana dahaka hekwakwanai ia vara . . . , Dirava be unai hekwakwanai hanamoa tauna ai do ia ‘lao’ diba.”

⁹ Unai ena anina Israela taudia dekenai be dahaka? Herevana idia vairanai dahaka koua gauna ia noho eiava dahaka hekwakwanai idia davaria, to Iehova be ia abia hidi gauna ai ia lao diba, idia be igui hesiai amo idia ia ruhaia bona Gwauhamata Tanona dekenai ia hakaudia lao diba. Momokani, unai ladana  dainai Dirava idia abidadama henia. Hari, unai ladana dainai ita danu ese Iehova ita abidadama henia diba. (Salamo 9:10) Dahaka dainai?

10, 11. Edena dala ai Iehova ena ladana ese ita ia durua, ia be gaukara idauidau karaia tauna bona Tamana hereadaena ta bamona ia ita laloa? Haheitalai gwauraia.

¹⁰ Haheitalai ta be inai: Tama sina idia diba edia natudia idia naria totona, gaukara idauidau karaia diba taudia ai idia lao be namo. Dina tamona lalonai, tama eiava sina ta be nesi, nanadu tauna, tisa, matahakani henia tauna, diadi, bona gaukara ma haida karaia tauna ai ia lao diba. Momo idia laloa idia hegeregere lasi unai gaukara idauidau idia karaia totona. Tama sina idia itaia edia natudia maragidia be idia dekenai idia tabekau momokani, idia abidadama momokani edia Tama eiava Sina ese edia hisihisi do idia hanamoa, hekwakwanai do idia hamaoromaoroa, edia gadara gaudia do idia hanamoa, bona edia henanadai momo do idia haerelaia. Tama sina haida idia laloa idia be hegeregere lasi bona nega ta ta ai gau haida idia karaia diba lasi dainai idia moale lasi. Mai lalohisihisi ida idia laloa idia hegeregere lasi unai gaukara momo idia karaia totona.

¹¹ Iehova danu be lalokau Tamana ta. To, Iena taravatu hereadaedia hegeregerena ai ia kara, ia sibona ia ura gauna ai ia lao totona, unai amo ena tanobada natudia ia naria namonamo diba. Unai dainai ena ladana, Iehova, ese ita ia boiria ia be iseda Tamana hereadaena bamona ia do ita laloa. (Iamesi 1:17) Gabeai Mose bona kamonai Israela taudia ibounai idia diba, Iehova be ena ladana hegeregerena ia kara. Mai hoa danu idia raraia noho lalonai, Iehova be ta ese ia hadarerea diba lasi Tuari Biaguna, tanobada bona guba edia siahu gaudia ibounai Biagua Tauna, Taravatu Henia Tauna, Hahemaoro Tauna, Palani Torea Tauna, aniani bona ranu Henia Tauna, dabua bona tamaka Naria Tauna—bona kara ma haida karaia tauna ai ia lao.

12. Edena dala ai Farao ena lalohadai Iehova dekenai be Mose ena amo ia idau?

¹² Unai dala amo, Dirava ese ena ladana ia hahedinaraia, ia ese hoa o kara hereadaedia amo Iena ladana ena anina  ia hahedinaraia, bona ia ese ena hereva amo ia hahedinaraia unai ladana ena anina be momokani. Ita daradara lasi, Dirava ia ura ia ita diba. Dahaka do ita karaia? Mose ia ura Dirava do ia diba. Unai ura bada ese Mose ena mauri dalana ia biagua bona ena guba Tamana kahirakahira momokani dekenai ia hakaua lao. (Numera 12:6-8; Heberu 11:27) Madi, Mose ena negai idia noho taudia haida ese unai bamona ura bada idia hahedinaraia. Mose ese Farao dekenai Iehova ena ladana ia gwauraia neganai, unai hekokoroku Aigupito ena lohia tauna ia gwau: “Iehova be daika?” (Esodo 5:2) Farao ia ura lasi Iehova ia dibaia namonamo. To, hekokoroku dalanai ia hahedinaraia Israela ena Dirava be anina lasi. Hari danu, momo be unai bamona lalohadai idia hahedinaraia. Unai lalohadai ese taunimanima edia lalona ia koua bena mai anina bada hereva momokanina—Iehova be Siahu Ibounai Lohiabadana—idia lalo-pararalaia lasi.

13, 14. (a) Dahaka dainai Baibel lalonai Iehova be mai ena dagi ladadia momo, bona idia haida be dahaka? ( Rau 14 ena maua itaia.) (b) Dahaka dainai Iehova idia gwauraia “Siahu Ibounai Lohiabadana” be maoro?

¹³ Iehova be kara idauidau ia karaia diba dainai, Buka Helaga lalonai dagi ladadia idauidau ia abia. Unai dagi ladadia ese ena ladana korikorina idia hanaia lasi; to, ita dekenai ena ladana ena anina ma haida idia hahedinaraia. Hegeregere, ia idia gwauraia “Siahu Ibounai Lohiabadana Iehova.” Unai dagi ladana hereadaena be Baibel ena toretore ginigunadia lalonai nega handred momo ia hedinarai bona ita dekenai Iehova ena dagi ia hahedinaraia. Ia sibona be mai ena maoro guba bona tanobada ena Lohia Tauna ai ia lao totona. Unai hereva ena badina do ita tahua.

¹⁴ Iehova be idau vaitani badina ia be Havaraia Tauna. Apokalupo 4:11 ia gwau: “Iehova, aiemai Dirava  e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia bona oiemu ura dainai idia noho bona oi havaraia.” Unai hereva namo hereadia be tau ma ta ia herevalaia lasi. Guba bona tanobada dekenai idia noho  gaudia ibounai be Iehova ese ia havaraia! Ita daradara lasi, Iehova ese hemataurai, siahu bona hairai ia abia be maoro, badina ia be Siahu Ibounai Lohiabadana bona gau ibounai ia Havaraia Tauna.

15. Dahaka dainai Iehova idia gwauraia “noho hanaihanai King”?

¹⁵ Iehova sibona ese ia abia dagi ladana ma ta be, “Noho Hanaihanai King.” (1 Timoteo 1:17) Unai ena anina be dahaka? Iseda lalona be ia hegeregere lasi unai ita lalopararalaia totona, to Iehova be idaunegai momokani amo ia noho daudau vadaeni bona vaira negai danu do ia noho hanaihanai. Salamo 90:2 ia gwau: “Unai nega amo ela bona hanaihanai, oi be Dirava.” Unai dainai Iehova be mai ena matamana lasi; ia be hanaihanai ia noho Diravana. Ia be dagi ladana ma ta ia abia danu, “Idaunegai Ia Noho Diravana”—tanobada eiava guba dekenai tau ta eiava gau ta ia do vara lasi neganai, ia be idaunegai momokani ia noho vadaeni! (Daniela 7:9, 13, 22) Dirava be Siahu Ibounai Lohiabadana ena dagi ia abia, be daika ese ia henanadailaia diba?

16, 17. (a) Dahaka dainai Iehova ita itaia diba lasi, bona dahaka dainai unai dekenai ita hoa lasi be namo? (b) Edena dala ai ita diba Iehova be ia noho, bona ita itaia eiava daua toho gaudia amo ia idau?

¹⁶ To haida be Farao bamona, Iehova ese unai dagi ia abia ena maoro idia henanadailaia. Hekwakwanai ia havaraia gauna ta be inai, goevadae lasi taudia be edia matana amo idia itaia gaudia idia abidadama henia bada. Siahu Ibounai Lohiabadana ita itaia diba lasi. Ia be lauma tauna, taunimanima edia matana amo idia itaia diba lasi. (Ioane 4:24) Bona danu bema taunimanima ta be Iehova Dirava vairana momokani dekenai ia gini, do ia mase. Iehova ese Mose ia hamaoroa, ia gwau: “Oi ese egu vairana do oi itaia diba lasi, badina lau ia itaia tauna be do ia mauri diba lasi.”​—Esodo 33:20; Ioane 1:18.

¹⁷ Unai dekenai ita hoa lasi be namo. Gwaukau aneruna ta amo Mose ese Iehova ena hairai sisina sibona ia itaia. Vadaeni, dahaka ia vara? Unai murinai Mose ena vairana be nega sisina lalonai “ia diaridiari.” Israela taudia idia gari dainai idia ura lasi Mose ena vairana idia itaia. (Esodo 33:21-23; 34:5-7, 29, 30)  Momokani, taunimanima ta be ia hegeregere lasi Siahu Ibounai Lohiabadana mai ena hairai ibounai ia itaia totona! Ita itaia diba lasi bona ita daua toho diba lasi dainai, anina be ia noho momokani lasi, a? Lasi, ena be gau haida hegeregere lai, reidio ena siahu, bona ta ena lalohadai ita itaia diba lasi, to ita abia dae unai gaudia idia noho. Ma danu, herevana lagani bilioni momo herea do idia hanaia, to Iehova be do ia noho hanaihanai! Unai dainai ia be ia noho momokani Diravana, ita itaia eiava daua toho gaudia ta bamona lasi, badina tanobada gaudia be idia gunana bona idia dika diba. (Mataio 6:19) Vadaeni, oi laloa Dirava be tau korikorina lasi, to sibona ia havaraia siahuna ta sibona, a? Mani ita itaia.

18. Esekiela be dahaka matahanai ia abia, bona Iehova kahirakahira idia noho “mauri gaudia” edia vairana foa ese dahaka idia hahedinaraia?

¹⁸ Ena be Dirava ita itaia diba lasi, to Baibel ena siri haida ese guba idia herevalaia dainai, guba ena lalona toana sisina ita itaia. Esekiela ena karoa ginigunana lalonai unai bamona haheitalai ta ia noho. Esekiela be matahanai ta amo Iehova ena guba oreana ia itaia, ia be guba kariota badana ta bamona. Baibel ese Iehova badinai idia gini hegege lauma taudia goadadia edia toana ita hoalaia. (Esekiela 1:4-10) Unai “mauri gaudia” be Iehova ida idia gaukara hebou, bona edia toana ese idia hesiai henia Diravana ena kara badana ta ita dekenai idia hahedinaraia. Idia ta ta edia vairana be foa—boromakau ena, laiona ena, ugava bona taunimanima ena. Unai vairana foa ese Iehova ena kara badadia foa ia hahedinaraia.​—Apokalupo 4:6-8, 10.

19. Edena kara be inai gaudia ese ia laulaulaia (a) boromakau ena vairana? (b) laiona ena vairana? (c) ugava ena vairana? (d) taunimanima ena vairana?

¹⁹ Baibel lalonai, nega momo boromakau ese siahu ia laulaulaia, bona unai be maoro badina ia be animal goadana ta. To, laiona be nega momo hahemaoro goevana ia laulaulaia, badina hahemaoro goeva dekenai boga auka be gau badana, bona vaia unai be laiona edia kara. Momo idia diba ugava manudia  edia matana be goada herea, gabu daudau herea amo gau maragidia idia itaia diba. Unai dainai ugava manu ena vairana ese Dirava ena aonega bada ia laulaulaia. Bona taunimanima ena vairana ese dahaka ia laulaulaia? Oibe, Dirava ese taunimanima be ena toana hegeregerena ia karaia, bona idia sibona be Dirava ena kara badana—lalokau—idia hahedinaraia diba. (Genese 1:26) Iehova ena kara idauidau—siahu, hahemaoro goeva, aonega, bona lalokau—be Buka Helaga ese nega momo ia gwauraia, bona ita gwau diba idia be Dirava ena kara badadia.

20. Ita lalo-hekwarahi badina Iehova ese reana ena kara ia haidaua vadaeni, a? Bona dahaka dainai unai bamona oi haere?

²⁰ Do ita lalohekwarahi badina lagani tausen momo idia hanaia dainai, Baibel ese ia gwauraia Diravana be reana ena kara ia haidaua vadaeni, a? Lasi, Dirava ena kara ia idau diba lasi. Ita ia hamaoroa: “Lau be Iehova. Lauegu kara lau haidaua lasi.” (Malaki 3:6) Iehova ese ena kara ia haidaua kava lasi, to idia vara gaudia ta ta ia kara henia dalana amo ia hahedinaraia ia be Tamana hereadaena. Noho daladia ta ta hegeregerena ena kara ta ta ia hahedinaraia. Dirava ena kara foa amo, lalokau be hereadae. Dirava ia karaia gaudia ibounai lalonai lalokau ia hahedinaraia. Ia ese lalokau dalanai ena siahu, hahemaoro goeva, bona aonega ia hahedinaraia. Momokani, Baibel ese dala  hereadaena ai Dirava bona unai kara ia gwauraia hebou. Ia gwau: “Dirava be lalokau.” (1 Ioane 4:8) Mani oi itaia, unai siri ia gwau lasi Dirava be mai ena lalokau eiava Dirava ese lalokau ia hahedinaraia noho. Lasi, to ia gwau Dirava be lalokau. Lalokau be ena kara badana bona unai kara ese ena kara ibounai ia biagua.

21. Iehova ena kara ita diba namonamo neganai, iseda hemami ia dekenai be edena bamona?

²¹ Nega ta natuna maragina ta oi itaia, tamana ia poinia bona mai moale ida ena turadia dekenai ia gwau, “Unai be lauegu tamana”? Badina momo dainai Dirava idia tomadiho henia taudia ese Iehova be unai bamona idia laloa danu. Baibel ia peroveta, nega ta abidadama taudia do idia gwau: “Itaia, inai be iseda Dirava!” (Isaia 25:8, 9) Iehova ena kara oi diba namonamo neganai, do oi mamia momokani Iehova be oiemu Tamana namo hereana.

22, 23. Baibel ese iseda guba Tamana be edena bamona ia gwauraia, bona edena bamona ita diba Ia ura ia kahirakahira ita lao?

²² Herevana kara auka tomadiho taudia bona aonega taudia ese dahaka hereva idia gwauraia, to Dirava be ia kara auka lasi bona daudau ai ia noho Tamana lasi. Ita be unai bamona kara auka Diravana kahirakahira do ita ura lasi ita lao, bona Baibel ese iseda guba Tamana be unai bamona ia gwauraia lasi. To, ia gwau ia be “moale Diravana.” (1 Timoteo 1:11) Ia be mai ena hemami. Tanobada taudia edia namo totona ia atoa taravatudia idia badinaia lasi neganai, iena: “kudouna ia metau.” (Genese 6:6; Salamo 78:41) To ena Hereva hegeregerena ai mai aonega ida ita kara neganai, iena kudouna ita ‘hamoalea.’​—Aonega Herevadia 27:11.

²³ Iseda Tamana ia ura ia kahirakahira ita noho. Iena Hereva ese ita ia hagoadaia ia ‘ita tahua goadagoada, ia do ita davaria diba. To momokani, ia be ita ta ta amo ia daudau lasi.’ (Kara 17:27) To taunimanima be edena dala ai, guba bona tanobada ena Siahu Ibounai Lohiabadana kahirakahira idia lao diba?