1, 2. Dahaka dainai taunimanima momo ese taravatu idia laloa bada lasi, to Dirava ena taravatu be edena bamona ita laloa be namo?

 “TARAVATU be guri dobu masemasena ta bamona, ia ese . . . gau ibounai ia hadonoa.” Unai hereva be lagani 1712 ai idia halasia bukana ta lalonai idia torea. Unai buka ia torea tauna ese kota idia karaia dalana ia gwauraia dika, nega haida hekwakwanai ta be lagani momo lalonai kota dekenai idia hepapahuahulaia dainai kota amo hahemaoro goeva idia tahua taudia ese edia moni ibounai idia haorea. Tano momo ai, taravatu bona kota ena gaukara daladia lalo-pararalaia be ia auka, idia be kara gageva bona ta ena maoro idia laloa lasi bona idia lalo-tamona lasi, unai dainai gabu momo ai taunimanima ese taravatu idia laloa bada lasi.

² To lagani 2,700 gunanai idia torea herevana mani oi laloa, ia gwau: “Lau ese emu taravatu lau ura henia bada!” (Salamo 119:97) Dahaka dainai salamo torea tauna ese taravatu ia ura henia bada? Badina ia abia isi taravatuna be tanobada gavamanina ta amo ia mai lasi, to Iehova Dirava amo ia mai. Iehova ena taravatu oi stadilaia neganai, salamo torea tauna ia abia hemamina do oi abia danu. Unai bamona stadi amo, guba bona tanobada ena Taravatu ia Henia Tauna badana ena lalohadai do oi diba.

3, 4. Edena dala idauidau ai Iehova ia hahedinaraia ia be Taravatu Henia Tauna?

³ Baibel ese ita ia hadibaia: “Taravatu Henia Tauna bona Hahemaoro Tauna be tamona.” (Iamesi 4:12) Momokani, Iehova sibona be Taravatu Henia Tauna korikorina. Guba ai idia noho gaudia edia heau dalana biagua totona, “guba gaudia idia biagua taravatudia” ia atoa danu. (Iobu 38:33) Iehova ese ena taravatu amo aneru helagadia milioni momo ia biagudia, idia be orea ta ta lalonai idia noho bona Iehova ena oda henunai ena hesiai gaukara idia karaia.​—Salamo 104:4; Heberu 1:7, 14.

 ⁴ Iehova ese taunimanima dekenai taravatu ia henia danu. Ita ta ta be mai iseda lalomamina, unai ese Iehova ena hahemaoro goeva ia hahedinaraia. Lalomamina be ita lalonai ia noho taravatu ta bamona, ita ia durua kara maoro bona kara dika edia idau ita itaia totona. (Roma 2:14) Iseda tama sina ginigunadia edia lalomamina be goevadae dainai, taravatu haida sibona idia abia. (Genese 2:15-17) To, goevadae lasi tauna be taravatu momo ia abia be namo, unai amo taravatu ese ia hakaua diba Dirava ena ura ia karaia namonamo totona. Bese kwarana taudia hegeregere Noa, Aberahamo, bona Iakobo be Iehova Dirava amo taravatu idia abia bona edia ruma bese dekenai idia henia. (Genese 6:22; 9:3-6; 18:19; 26:4, 5) Iehova ese Mose amo Israela besena dekenai Taravatu ia henia neganai, Ia be dala idauna ai Taravatu Henia Tauna ai ia lao. Unai taravatu amo Iehova ena hahemaoro goeva karana ita dibaia namonamo.

5. Mose ena Taravatu be metau bona badinaia totona be auka, a? Dahaka dainai unai bamona oi haere?

⁵ Taunimanima momo idia laloa Mose ena Taravatu be metau bona badinaia totona be auka. Unai be momokani lasi. Unai Taravatu lalonai taravatu 600 mai kahana idia noho. Toana be unai be taravatu momo herea, to mani inai oi laloa: Lagani 1900 ena dokonai, United States gavamani ena taravatu ese taravatu bukadia edia rau 150,000 idia hahonua. Lagani rua rua lalonai taravatu 600 ma haida idia atoa kau! Unai dainai taunimanima edia taravatu edia momo ese Mose ena Taravatu ena momo ia hanaia. To, Dirava ena Taravatu ese mauri ena kahana ibounai dekenai Israela taudia ia hakaua, hari idia noho taravatu be unai bamona lasi. Unai Taravatu ena hereva badadia mani ita laloa.

6, 7. (a) Dahaka dainai Mose ena Taravatu be taravatu ma haida amo ia idau, bona Taravatu ena hahegani badana be dahaka? (b) Israela taudia ese edena dala ai idia hahedinaraia diba Iehova ena lohia siahuna idia abia dae?

⁶ Taravatu ese Iehova ena lohia siahuna ia abia isi. Unai dainai, Mose ena Taravatu be taravatu ma ta ida ita hahegeregerea diba lasi. Ena taravatu badana be inai: “Israela taudia e, umui kamonai: Iehova iseda Dirava be Iehova tamona. Namona be Iehova emui Dirava umui lalokau henia mai emui kudouna ibounai,  mai emui mauri ibounai, bona mai emui goada ibounai.” Dirava ena taunimanima be edena bamona do idia hahedinaraia ia idia lalokau henia? Ia do idia hesiai henia bona ena lohia siahuna henunai do idia noho.​—Deuteronomi 6:4, 5; 11:13.

⁷ Israela taudia ta ta ese edia hakaua taudia idia kamonai henia karana amo, idia hahedinaraia Iehova ena lohia siahuna idia abia dae. Tama sina, iduhu lohiadia, hahemaoro taudia, hahelaga taudia, bona king taudia, idia ibounai ese Iehova ena lohia siahuna idia hahedinaraia. Iehova dekenai, unai taudia gwau-edeede henia karana be hegeregere Ia idia gwau-edeede henia bamona. To, bema unai taudia ese ena taunimanima idia kara dika henia, eiava bema mai hekokoroku ida idia kara henidia, Iehova ena badu idia davaria diba. (Esodo 20:12; 22:28; Deuteronomi 1:16, 17; 17:8-20; 19:16, 17) Unai dainai mai edia siahu taudia bona unai siahu henunai idia noho taudia, ese Dirava ena lohia siahuna idia badinaia be namo.

8. Taravatu ese edena dala ai Iehova ena helaga karana ia abia isi?

⁸ Taravatu ese Iehova ena helaga karana ia abia isi. Inai hereva “helaga” be nega 280 bamona Mose ena Taravatu lalonai idia torea. Taravatu ese Dirava ena taunimanima ia durua dahaka be goeva bona dahaka be miro edia idau idia itaia totona. Ia ese gau idauidau 70 ia gwauraia, unai gaudia dainai Israela tauna be tomadiho dalanai ia miro diba. Taravatu ese tauanina dalanai goeva karana, aniani, bona kukuri kokia daladia ia herevalaia. Unai bamona taravatu ese gorere ia koua. a To unai taravatu be mai ena gaukara badana ta—taunimanima ia durua Iehova ena lalo-namo idia abia, bona idia badinai idia noho besedia edia kara dika idauidau amo idia gini siri totona. Haheitalai ta mani ita itaia.

9, 10. Taravatu be dahaka ia gwau mahuta hebou bona natuna havaraia karana dekenai, bona unai taravatu ese dahaka namo ia havaraia?

⁹ Taravatu ia gwau idia mahuta hebou taudia—headava taudia danu—bona natuna idia havaraia hahinena be dina haida  lalonai idia miro. (Levitiko 12:2-4; 15:16-18) Unai taravatu ese unai harihari gaudia goevadia Dirava amo ia hadikaia lasi. (Genese 1:28; 2:18-25) To, unai taravatu ese Iehova ena helaga karana ia abia isi, unai amo ia idia tomadiho henia taudia be idia miro lasi. Namona be ita laloatao, Israela badinai idia noho besedia ese edia tomadiho karana be mahuta hebou bona natuna momo havaraia ena kastom ariadia ida idia karaia hebou. Kanana taudia edia tomadiho lalonai, ariara karadia idia karaia tatau bona hahine idia noho. Matabodaga karadia idia karaia bona unai kara ia bada ia lao. To, Taravatu dainai, Iehova tomadiho henia karana lalonai mahuta hebou karadia idia karaia lasi. b Taravatu badinaia karana ese namo ma haida ia havaraia danu.

¹⁰ Unai taravatu idauidau ese mai anina bada hereva momokanina ta idia hadibaia. c Edena dala ai Adamu ena kara dika be uru ta amo ia hanaia lao uru ma ta dekenai? Ia be mahuta hebou bona natuna havaraia karana amo ia hanaia, ani? (Roma 5:12) Oibe, Dirava ena Taravatu ese ena bese taudia ia hadibaia idia be mai edia kara dika. Ita ibounai be mai eda kara dika danu ita vara. (Salamo 51:5) Dirava ese iseda kara dika ia gwauatao bona mauri davana ia henia dalana amo, ita be iseda Dirava helagana kahirakahira ita lao diba.

11, 12. (a) Hahemaoro goeva karadia dekenai, Taravatu ese edena kara ia abia isi? (b) Hahemaoro goeva hagagevaia lasi totona, Taravatu be dahaka ia gwau?

¹¹ Taravatu ese Iehova ena hahemaoro goevadaena ia abia isi. Mose ena Taravatu ese hahemaoro goeva karana dekenai gau ibounai do idia hegeregere karana ia abia isi. Taravatu ia gwau: “Mauri ena davana be mauri, matana ena davana be matana, isena ena davana be isena, imana ena davana be imana, bona aena ena davana be aena.” (Deuteronomi 19:21) Taravatu utua  karadia dekenai, ta ese ia utua taravatuna hegeregerena panisi ia abia. Dirava ena hahemaoro goeva Taravatuna lalonai unai be mai anina bada, bona hari unai be gau badana Keriso Iesu ena mauri davalaia boubouna ita lalo-pararalaia totona, Karoa 14 ese unai do ia herevalaia.​—1 Timoteo 2:5, 6.

¹² Taravatu lalonai hahemaoro goeva do idia hagagevaia lasi naria herevadia idia noho danu. Hegeregere, samania herevana ta hamomokania totona taunimanima rua idia noho be namo. Kota vairanai koikoi herevana gwauraia karana be mai ena davana metauna. (Deuteronomi 19:15, 18, 19) Kara gageva bona lalo-ani moni abia karadia danu be taravatu. (Esodo 23:8; Deuteronomi 27:25) Dirava ena taunimanima edia bisinesi karadia dekenai danu, Iehova ena hahemaoro goeva taravatudia idia badinaia be namo. (Levitiko 19:35, 36; Deuteronomi 23:19, 20) Unai taravatu namona bona maorona be hahenamo badana ta Israela besena dekenai!

13, 14. Edena dala ai Taravatu ese henaohenao tauna bona ena kohu ia haboioa tauna be dala maorona ai ia kara henidia?

¹³ Mose ena Taravatu be taravatu aukana bona hebogahisi ia hahedinaraia lasi, a? Lasi vaitani! Lauma helaga ena siahu amo King Davida ia gwau: “Iehova ena taravatu be goevadae.” (Salamo 19:7) Ia diba namonamo, Taravatu ese hebogahisi bona maka tamona ai taunimanima ibounai kara henia karana ia abia isi. Unai be edena bamona ia karaia?

¹⁴ Hari tano haida ai, toana be taravatu ese raskol taudia ia panisidia auka lasi bona dika idia davaria taudia ia durua lasi. Hegeregere, henaohenao taudia be reana dibura ai idia noho. Raskol taudia ese edia kohu idia henaoa taudia be edia kohu idia abia lou lasi, to edia takisi moni amo unai raskol taudia idia naria bona ubua. Guna Israela ai, hari idia noho dibura rumadia idia noho lasi. Kerere idia karaia taudia idia abia panisi be mai ena hetoana, edia dika ena bada hegeregerena. (Deuteronomi 25:1-3) Henaohenao tauna be ia henaoa gaudia dainai davana ia karaia be namo. Unai sibona lasi to henaohenao tauna ese gau ma haida danu do ia henia. Do ia henia davana ena bada be edena bamona? Maka ta ita atoa diba lasi.  Badina hahemaoro taudia ese gau idauidau idia tahua namonamo guna, hegeregere unai kara dika tauna ia helalo-kerehai momokani eiava lasi. Unai ese Levitiko 6:1-7 ai henaohenao tauna ese do ia henia davana be maragi, to Esodo 22:7 ese ia gwauraia gauna be bada, ena badina ia hahedinaraia.

15. Aksiden amo ta ia hamasea tauna dekenai, Taravatu ese edena dala ai hebogahisi bona hahemaoro goeva ia hahedinaraia?

¹⁵ Taravatu ia abia dae kara dika haida be idia vara kava. Hegeregere, tau ta ese aksiden amo ma ta ia hamasea neganai, mauri ena davana be mauri do ia henia lasi bema ia be heau mauri hanuana ta dekenai ia heau lao, unai hanua be Israela tanona ibounai ai idia noho. Hanua ena hahemaoro taudia ese unai tauna ena sivarai idia tahua murinai, unai tauna be heau mauri hanuana ai do ia noho ela bona Hahelaga Tauna Badana ia mase. Unai murinai, taravatu ese ia koua lasi bona ia ura gabuna dekenai ia lao diba. Unai dala amo Dirava ena hebogahisi amo namo ia davaria. Danu, unai taravatu ese ia hahedinaraia taunimanima edia mauri be mai anina bada.​—Numera 15:30, 31; 35:12-25.

16. Taravatu ese edena dala ai taunimanima ta ta edia maoro ia gimaia?

¹⁶ Taravatu ese taunimanima ta ta ena maoro ia gimaia. Abiatorehai taudia edia maoro ia gimaia dalana mani ita itaia. Taravatu ia gwau, heniatorehai tauna be abiatorehai tauna ena ruma ai do ia vareai lasi kohu do ia abia bona unai kohu do ia dogoatao lasi ela bona abiatorehai tauna ese davana ia henia. To, heniatorehai tauna be ruma murimurinai do ia gini, bona abiatorehai tauna be ia dekenai unai kohu ia mailaia. Unai amo tau ta be ma ta ena ruma dekenai ia vareai kava lasi. Bema heniatorehai tauna be abiatorehai tauna ena dabua ia abia, dina ia do diho lasi neganai do ia henia giroa, badina abiatorehai tauna be hanuaboi ai do ia keru garina.​—Deuteronomi 24:10-14.

17, 18. Tuari karadia dekenai, edena dala ai Israela taudia be bese ma haida amo idia idau, bona dahaka dainai?

¹⁷ Tuari karadia dekenai taravatu ia noho danu. Dirava ena taunimanima ese siahu eiava kwalimu abia totona idia tuari lasi, to “Iehova ena tuari” karaia totona idia lao. (Numera 21:14) Nega momo, Israela taudia be do idia tuari henia hanua idia hamaorodia guna edia hanua do idia abia. Bema idia ura lasi unai bamona idia karaia, Israela taudia ese idia tuari henia—to Dirava ena taravatu  hegeregerena idia karaia. Idaunegai amo ema bona hari, tuari taudia momo ese hahine idia hadikaia eiava taunimanima idia hamasedia kava, to Israela ena tuari taudia be unai bamona lasi. Gabu idia hadikaia lasi, edia inai taudia edia huahua havaraia audia idia utua diho lasi. d Tuari taudia ma haida dekenai unai bamona taravatu be lasi.​—Deuteronomi 20:10-15, 19, 20; 21:10-13.

¹⁸ Tano haida ai natudia be tuari totona treinini idia abia ena sivarai oi kamonai neganai oi badu, a? Idaunegai Israela ai, edia mauri lagani be 20 idia do abia lasi memero be tuari taudia ai idia halaoa lasi. (Numera 1:2, 3) Danu bema tau badana ta be ia gari dikadika, tuari lalonai ia vareai lasi. Ia headava matamata tauna be lagani tamona ibounai tuari lalonai ia vareai lasi, unai amo ena mauri ia haboioa diba gaukarana lalonai ia do vareai lasi neganai, ena natuna ena vara do ia itaia diba. Taravatu hegeregerena, unai dala amo unai tau matamatana be “ruma dekenai ia noho bona ena adavana ia hamoalea” diba.​—Deuteronomi 20:5, 6, 8; 24:5.

19. Taravatu ese edena dala ai hahine, natudia, ruma bese, vabu, bona tama sina lasi natudia ia naria?

¹⁹ Taravatu ese hahine, natudia bona ruma bese ia gimadia bona naridia danu. Tama sina ia haganidia hanaihanai edia natudia do idia laloa bada, bona idia dekenai lauma gaudia do idia hadibaia. (Deuteronomi 6:6, 7) Famili taudia sihari heheni karana ia taravatua, unai bamona idia karaia taudia edia davana be mase. (Levitiko, karoa 18) Heudahanai karana ia taravatua danu, nega momo unai kara ese ruma bese ia hapararaia, edia noho namo ia hadikaia bona ia hahemaraidia danu. Taravatu ese vabu bona tama sina lasi natudia ia naria danu, bona hereva aukadia amo unai taudia kara dika henia karana ia taravatua.​—Esodo 20:14; 22:22-24.

20, 21. (a) Dahaka dainai Mose ena Taravatu ese Israela taudia huanai adavana momo adavaia karana ia koua lasi? (b) Headava hadokoa karana dekenai, dahaka dainai Mose ena Taravatu be Iesu ese gabeai ia haginia lou taravatuna amo ia idau?

²⁰ To reana haida idia laloa, ‘Dahaka dainai Taravatu ese  adavana momo adavaia karana ia koua lasi?’ (Deuteronomi 21:15-17) Unai bamona taravatu be unai nega ena mauri dalana hegeregerena ita laloa be namo. Mose ena Taravatu be hari nega ena lalohadai bona mauri dalana hegeregerena idia laloa taudia ese do idia lalo-pararalaia lasi. (Aonega Herevadia 18:13) Iehova ese Eden lalonai ia atoa taravatuna ese ia hahedinaraia, headava lalonai tau tamona bona hahine tamona be nega daudau lalonai do idia noho hebou. (Genese 2:18, 20-24) To, Iehova ese Israela taudia dekenai Taravatu ia henia neganai, adavana momo adavaia karana be lagani handred momo lalonai idia karaia vadaeni. Iehova ia diba unai “laloauka taudia” ese hanaihanai ena taravatu do idia makohia, hegeregere kaivakuku tomadiho henia lasi ena taravatu danu. (Esodo 32:9) Unai dainai, mai aonega ida ia itaia unai be nega namona lasi idia karaia headava daladia ia haidaua totona. To, laloaboio lasi, Iehova ese adavana momo adavaia karana ia hamatamaia lasi. Mose ena Taravatu amo Ia ese adavana momo adavaia karana ia biagua, unai amo iena bese taudia be unai kara ena dika amo ia gimadia.

²¹ Unai hegeregerena, Mose ena Taravatu ese maoro ia henia kara dika badadia momo dainai, tau ta ese ena headava ia hadokoa diba. (Deuteronomi 24:1-4) Iesu ia gwau Dirava ese Iuda taudia ia koua lasi unai bamona idia karaia totona, badina idia be “kudouna ia auka” taudia. To, unai bamona dala ia noho hanaihanai lasi. Iesu ese ia murinai idia raka taudia ia hamaoroa, Iehova ese matamana ai ia atoa headava taravatuna idia badinaia be namo.​—Mataio 19:8.

22. Edena dala idauidau ai Mose ena Taravatu ese lalokau karana ia hagoadaia, bona daidia dekenai?

²² Hari inai negai, tano ta ena taravatu ese lalokau karana ia habadaia oi laloa diba, a? Mose ena Taravatu ese gau ibounai amo, lalokau ia abia isi. Heberu gado ai, Deuteronomi ena buka lalonai, inai hereva “lalokau” be nega 20 bona ma haida ia hedinarai. Mose ena Taravatu lalonai, taravatu badana iharuana be: “Emu varavara do oi lalokau henia, oi sibona oi lalokau henia hegeregerena.”  (Levitiko 19:18; Mataio 22:37-40) Dirava ena bese taudia ese unai bamona lalokau be ta ta dekenai do idia hahedinaraia sibona lasi, to edia huanai idia noho idau bese taudia dekenai danu, do idia laloatao idia danu be guna idau bese taudia bamona idia noho. Idia ese ogogami bona hisihisi taudia dekenai lalokau do idia hahedinaraia, tauanina dalanai do idia durudia, bona idia hadikadia lasi. Danu, idia ese metau idia huaia animal do idia kara henidia mai edia hebogahisi ida.​—Esodo 23:6; Levitiko 19:14, 33, 34; Deuteronomi 22:4, 10; 24:17, 18.

23. Salamo 119 ia torea tauna ia ura dahaka ia karaia, bona iseda lalona ita hadaia dahaka ita karaia totona?

²³ Edena bese ma ta be unai bamona taravatu ia abia? Unai dainai salamo torea tauna ia gwau: “Lau ese emu taravatu lau ura henia bada!” To, iena ura be hemami ta sibona lasi. Unai ura ese ia hagoadaia gau haida ia karaia totona, badina ia hekwarahi ena mauri lalonai unai taravatu ia badinaia. Ma danu, ia gwau: “Dina ibounai lalonai unai taravatu lau laloa dobu.” (Salamo 119:11, 97) Oibe, hanaihanai nega ia atoa Iehova ena taravatu ia stadilaia totona. Ita diba momokani unai bamona ia karaia neganai, taravatu ura henia karana ia habadaia. Danu, iena lalokau unai Taravatu ia Henia Tauna, Iehova Dirava, totona be ia habadaia. Dirava ena taravatu oi stadilaia noho lalonai, namona be oi danu be Iehova, Taravatu Henia Tauna Badana, bona hahemaoro goeva Diravana kahirakahira oi lao.