1, 2. Edena negai Iesu ia badu bona dahaka dainai?

 TAUNIMANIMA idia itaia Iesu ia badu—bona badina namona dainai. Reana oi laloa Iesu be unai bamona do ia badu lasi, badina ia be dagedage tauna lasi. (Mataio 21:5) Kara maoromaoro dalanai ia badu dainai, ena kara ia biagua namonamo. a To dahaka ese unai maino ia ura henia tauna ia habadua? Kara gageva badana ta dainai ia badu.

² Iesu be Ierusalema dekenai ia noho dubuna ia laloa bada. Tanobada ibounai lalonai, unai gabu tamona sibona be ena guba Tamana tomadiho henia gabuna helagana. Iuda taudia be tano idauidau amo nega daudau idia raka, unuseniai idia tomadiho totona. Dirava idia gari henia Idau Bese taudia danu idia mai, bona idia totona idia hegaegaelaia dubu ena ariara lalonai idia vareai. To Iesu ena hesiai gaukara ena matamanai, dubu lalonai ia vareai bona kara dika badana ta ia itaia. Madi, unai gabu ena toana be maketi ta bamona, to tomadiho rumana ta bamona lasi! Ia lalonai hoihoi taudia bona moni senisia taudia momo herea idia noho. Edia kara gageva be dahaka? Unai taudia idia laloa Dirava ena dubu be taunimanima idia koia—edia moni idia henaoa gabuna. Edena dala ai?​—Ioane 2:14.

3, 4. Dahaka mataganigani karadia be Iehova ena ruma lalonai idia karaia, bona Iesu ese dahaka ia karaia unai ia hamaoromaoroa totona?

³ Tomadiho gunalaia taudia idia gwau, moni toana tamona sibona do idia gaukaralaia dubu ena takisi idia henia totona. Vadivadi taudia ese edia moni idia senisia unai bamona moni idia abia totona. Unai dainai, moni idia senisia taudia ese edia teibolo  be dubu lalonai idia atoa bona moni idia senisia neganai, taunimanima ese idia dekenai davana idia karaia. Animal hoihoilaia karana amo moni bada idia abia danu. Idia ura boubou idia karaia vadivadi taudia, be hanua ena hoihoi tauna ta amo animal idia hoia diba, to dubu lalonai idia gaukara taudia ese edia boubou gaudia do idia abia dae lasi. To, dubu lalonai idia hoia boubou totona animal idia abia dae. Taunimanima be dala lasi dainai, hoihoi taudia ese nega haida animal edia davana idia habadaia momokani. b Unai kara ese bisinesi kara dikadia ia hanaia momokani. Unai be henaohenao karana!

⁴ Iesu be unai bamona kara gageva ia haheaukalaia diba lasi. Inai be ena Tamana ena ruma! Kwadia kwanauna ta ia karaia bona dubu amo boromakau bona mamoe ia luludia. Bena moni idia senisia taudia dekenai ia raka lao bona edia pata ia giroa. Mani oi laloa, unai moni be gabu ibounai dekenai idia lao! Pune idia hoihoilaia taudia ia hereva henia mai goada ida, ia gwau: “Inai gaudia be iniseni amo umui abia siri!” (Ioane 2:15, 16) Toana be tau ta ese inai gari lasi tauna ia koua diba lasi.

5-7. (a) Iesu ena guba maurina ese ena lalohadai hahemaoro goeva dekenai be edena bamona ia durua, bona iena haheitalai ita stadilaia amo dahaka ita dibaia? (b) Edena dala ai Iesu ese Satani ena hereva do ia hakoikoia, bona vaira nega ai edena bamona unai do ia karaia?

⁵ Oibe, gabeai unai hoihoi taudia idia giroa lou. Lagani toi bamona murinai, Iesu ese unai kara gageva tamona ma ia hamaoromaoroa lou, Iehova ese ia gwauraia herevadia, ena ruma be “henaoahenao taudia edia kohua” ai idia halaoa herevadia amo, idia ia gwau henia. (Ieremia 7:11; Mataio 21:13) Oibe, Iesu ia itaia unai kara gageva taudia be mai mataganigani ida taunimanima edia moni idia abia bona Dirava ena dubu idia hamiroa neganai, ena hemami be ena Tamana ena bamona. Unai ita hoalaia  lasi! Badina lagani milioni momo lalodiai, Iesu be ena guba Tamana ese ia hadibaia. Unai dainai, hahemaoro goeva dekenai Iehova ena lalohadai ia abia. Unai amo inai hereva, Natuna mero be tamana bamona be Iesu ese ia hahedinaraia momokani. Unai dainai bema ita ura Iehova ena hahemaoro goeva ita diba namonamo, dala hereadaena be Iesu Keriso ena haheitalai ita lalohadailaia.​—Ioane 14:9, 10.

⁶ Satani ese Iehova Dirava be koikoi tauna ia gwauraia bona Iena lohia dalana ia hepapahuahulaia neganai, Iehova ena lalokau Natuna tamona ia noho. Iehova ena ladana ia hadikaia momokani! Gabeai Satani ia gwau, ta be lalokau dainai Iehova do ia hesiai henia lasi neganai, Natuna ese unai ia kamonaia danu. Unai hereva koikoidia ese Natuna ena kara maoromaoro kudouna ia hahisia bada. Ia diba ia be unai koikoi herevadia do ia hamaoromaoroa neganai, reana ia moale bada! (2 Korinto 1:20) Edena bamona unai do ia karaia?

⁷ Karoa 14 ai ita itaia bamona, Satani ia gwau Iehova ena hesiai taudia ese hahetoho idia davaria neganai Dirava do idia badinaia noho lasi, to Iesu ese unai hereva koikoina ena haere maorona bona korikorina ia henia. Iesu ese dala ia kehoa, Iehova Dirava ena ladana helagana bona ena lohia dalana idia gwauraia dika hereva koikoidia ia hamaoromaoroa. Iesu be Iehova ese ia abia hidi Gunalaia Tauna dainai, guba bona tanobada lalonai Dirava ena hahemaoro goeva do ia havaraia. (Kara 5:31) Tanobada dekenai iena mauri dalana ese Dirava ena hahemaoro goeva ia hahedinaraia. Iehova ese Iesu be inai bamona ia gwauraia: “Ia dekenai egu siahu do lau henia bona bese idauidau dekenai hahemaoro maoromaoro ena anina do ia hahedinaraia.” (Mataio 12:18) Iesu ese unai hereva be edena dala ai ia hamomokania?

8-10. (a) Edena dala ai Iuda tomadiho gunalaia taudia edia uduna amo idia gwauraia taravatudia ese Iuda lasi taudia bona hahine idia hadikaia? (b) Uduna amo idia gwauraia taravatudia ese edena dala ai Iehova ena Sabati taravatuna ia hametaua?

⁸ Iesu be Iehova ena Taravatu ia ura henia bona unai taravatu  hegeregerena ia noho. To ena nega lalonai idia noho tomadiho gunalaia taudia ese Taravatu idia mogea bona idia badinaia kerere. Iesu be idia dekenai ia gwau: “Taravatu hadibaia taudia bona Farisea taudia, koikoi taudia e, dika do umui davaria! . . . Taravatu ena hereva badadia umui dadaraia, hegeregere hahemaoro goeva, hebogahisi bona abidadama.” (Mataio 23:23) Oibe, unai Dirava ena Taravatu idia hadibaia taudia ese hahemaoro goeva ena anina idia hahedinaraia goevagoeva lasi. To, Dirava ena hahemaoro goeva idia hunia toho. Edena dala ai? Haheitalai haida mani ita itaia.

⁹ Iehova ese ena taunimanima ia hagania, idia badinai idia noho kaivakuku tomadiho henia besedia amo idia gini siri. (1 King Taudia 11:1, 2) To, tomadiho gunalaia taudia haida ese taunimanima idia hagoadaia Iuda lasi taudia idia inai henia totona. Mishnah lalonai inai taravatu ia noho danu: “Boromakau be Idau Bese taudia edia ruma dekenai umui rakatania lasi, badina idia be reana animal sihari henia taudia.” Unai bamona lalo-dika kava herevana Iuda lasi taudia ibounai dekenai be maoro lasi, bona Mose ena Taravatu ese unai ia hadibaia lasi. (Levitiko 19:34) Taunimanima ese idia karaia taravatu ma haida ese hahine idia hadikaia. Uduna amo idia gwauraia taravatu ia gwau, hahine be ena tau badinai lasi to ena murinai do ia raka. Tau ta be taunimanima vairanai hahine ta do ia hereva henia lasi, ena adavana danu. Hahine be hesiai taudia bamona, maoro idia henia lasi kota dekenai idia hereva totona. Guriguri ta danu ia noho, unai guriguri lalonai tatau ese Dirava idia tanikiu henia idia be hahine lasi dainai.

¹⁰ Tomadiho gunalaia taudia be taunimanima ese idia karaia taravatu idauidau momo henunai Dirava ena Taravatu idia hunia. Hegeregere, Sabati taravatuna ese Sabati dinana ai gaukara ia taravatua, unai dina be tomadiho, lauma dalanai hagoadaia heheni, bona laga-ani totona idia atoa. To Farisea taudia ese unai taravatu idia hametaua. “Gaukara” ena anina be dahaka, be idia sibodia ese idia gwauraia. Kara idauidau 39 idia gwauraia gaukara, hegeregere uma aniani gogoa gaukarana eiava labana. Unai ese henanadai momo ia havaraia. Bema tau ta be Sabati dinana ai sei ta ia hamasea, ia labana, a? Bema ta be uiti umana badinai ia raka lao bona uiti anina haida ia kokia bona ia ania, uma aniani ia gogoa  unai, a? Bema gorere tauna ta ia hanamoa, ia gaukara, a? Unai bamona henanadai be taravatu aukadia amo idia haerelaia.

11, 12. Iesu ese edena dala ai Farisea taudia edia sene herevadia, Baibel amo idia mai lasi herevadia ia dadaraia?

¹¹ Unai bamona nega ai, Iesu ese edena dala ai taunimanima ia durua diba, hahemaoro goeva ena anina idia lalopararalaia totona? Ia hadibaia gaudia amo bona ena mauri dalana amo, mai boga auka ida unai tomadiho gunalaia taudia edia hereva ia dadaraia. Mani ena hadibaia herevadia haida ita itaia guna. Idia sibodia ese idia karaia taravatu momo ia gwauraia dika, ia gwau: “Emui sene taudia amo umui abia kastom karana dainai Dirava ena hereva be anina lasi gauna ai umui halaoa.”​—Mareko 7:13.

¹² Iesu be mai ena siahu ida ia gwau Farisea taudia edia hereva Sabati taravatuna dekenai be kerere—idia ese taravatu ena anina korikorina idia lalo-pararalaia lasi. Ia gwau Mesia be “Sabati ena Lohiabada,” unai dainai ia be mai ena maoro Sabati ai taunimanima edia gorere do ia hanamoa. (Mataio 12:8) Unai ia hahedinaraia totona, Sabati ai hoa dalanai gorere taudia ia hanamoa. (Luka 6:7-10) Unai bamona gorere hanamoa karadia be gabeai ena Lagani 1000 Lohia Negana lalonai, tanobada ibounai dekenai do ia karaia karana idia hahedinaraia. Lagani 1000 Lohia Negana be Sabati dinana korikorina, unai nega ai abidadama taudia ibounai be lagani handred momo lalonai idia davaria kara dika bona mase amo laga-ani do idia davaria.

13. Iesu ena tanobada hesiai gaukarana dainai dahaka taravatu ia vara, bona edena dala ai ia be taravatu gunana amo ia idau?

¹³ Danu, Iesu ese hahemaoro goeva ena anina ia hahedinaraia goevagoeva, badina tanobada ai ena hesiai gaukara ia haorea murinai, taravatu matamatana, “Keriso ena taravatu” unai, ia matamaia. (Galatia 6:2) Unai taravatu matamatana be Mose ena Taravatu bamona lasi, ia lalonai taravatu lista latana ta ia noho lasi, to hakaua herevadia idia noho. To, hahegani haida idia noho danu. Idia ta be Iesu ese ia gwauraia “taravatu matamata.” Iesu be ena murinai idia raka taudia ibounai ia hadibaia do idia lalokau heheni, ia ese idia ia lalokau henia hegeregerena. (Ioane 13:34, 35) Oibe, sibona ena namo tahua lasi lalokauna, be “Keriso ena taravatu” idia badinaia taudia edia kara badana.

14, 15. Iesu ese edena dala ai ia hahedinaraia ena siahu ia gaukaralaia kerere lasi, bona dahaka dainai unai ese ita ia hagoadaia?

¹⁴ Iesu be lalokau karana ia hadibaia sibona lasi. “Keriso ena taravatu” be ena noho dalana ai ia hahedinaraia. Unai taravatu be ena mauri daladia ibounai lalonai ia badinaia. Iesu ena haheitalai amo, hahemaoro goeva ena anina ia hahedinaraia daladia toi, mani ita itaia.

¹⁵ Ginigunana be, Iesu ese kara gageva ia dadaraia momokani. Reana oi itaia vadaeni, goevadae lasi taudia idia hekokoroku bona edia siahu idia gaukaralaia kerere neganai, kara gageva ia vara. Iesu be unai bamona ia karaia lasi. Nega ta, tau ta be Iesu dekenai ia lao bona ia gwau: “Hadibaia Tauna e, mani egu kakana oi hamaoroa emai tamana ena kohu ibounai be ai ruaosi huanai do ia haria.” Iesu ena haere be dahaka? Ia gwau: “Tau e, daika ese lau ia abia hidi emui diadi eiava kohu haria tauna ai lau lao totona?” (Luka 12:13, 14) Iesu ena kara ita hoalaia, ani? Iesu ena diba, ena hahemaoro karana, bona Dirava ese ia dekenai ia henia siahuna, be tanobada taudia ibounai edia ia hanaia; to, Iesu ia ura lasi unai tauna ia hahemaoro henia, badina Iehova amo siahu ia abia lasi unai bamona do ia karaia totona. Iesu be nega ibounai unai dala ai ia manau, lagani tausen momo lalodiai guba dekenai ia noho neganai, unai bamona ia karaia danu. (Iuda 9) Ia hedinarai, Iesu be mai manau ida Iehova ia tabekau henia dahaka be maoro ia abia hidi totona.

16, 17. (a) Iesu ese edena dala ai Dirava ena Basileia ena sivarai namona harorolaia gaukarana amo hahemaoro goevana ia hahedinaraia? (b) Iesu ese edena dala ai hahemaoro goeva be mai ena hebogahisi danu ia hahedinaraia?

¹⁶ Iharuana be, Iesu ese Dirava ena Basileia ena sivarai namona ia harorolaia dalana amo, hahemaoro goeva ia hahedinaraia. Taunimanima edia toana ia laloa lasi. To, ia hekwarahi taunimanima ibounai ia durua totona, herevana idia be taga eiava ogogami taudia. To Farisea taudia be idau, idia ese ogogami taudia eiava hanua taudia idia dadaraia, idia gwauraidia ʽam-ha·ʼaʹrets, anina be “tano taudia.” Iesu be mai gari lasi ida unai kara gageva ia hamaoromaoroa. Taunimanima dekenai sivarai namona ia hadibaia—eiava idia ida ia aniani, ia ubudia, edia gorere ia hanamoa, eiava ia hatoredia  isi lou—neganai, Dirava ena hahemaoro goeva dalana ia badinaia, Dirava ena ura be “taunimanima idauidau do ia hamauria.” c—1 Timoteo 2:4.

¹⁷ Ihatoina be, Iesu ena hahemaoro goeva be hebogahisi bada dalanai ia hahedinaraia. Kara dika taudia ia durua totona ia hekwarahi bada. (Mataio 9:11-13) Sibodia idia durua diba lasi taudia be mai ena ura bada ida ia durudia. Hegeregere, dubu gunalaia taudia ese Idau Bese taudia abidadama henia lasi herevana idia hadibalaia, to Iesu ese unai hereva ia durua lasi. Mai ena hebogahisi ida idia haida ia durua bona hadibaia, ena be Iuda taudia sibona hadibaia totona ia mai. Ia ese hoa dalanai Roma ami ofesa tauna ena gorere ia hanamoa, ia gwau: “Israela dekenai inai bamona abidadama goadana ia hahedinaraia tauna ta lau itaia lasi.”​—Mataio 8:5-13.

18, 19. (a) Edena dala ai Iesu ese hahine matauraia karana ia hahedinaraia? (b) Iesu ena haheitalai ese edena bamona ita ia durua, boga auka bona hahemaoro goeva idia gaukara hebou dalana ita itaia totona?

¹⁸ Unai hegeregerena, Iesu ese unai negai hahine idia kara henia lalohadaina, ia abia dae lasi. To, mai ena gari lasi ida kara maorona ia karaia. Idia abia dae lalohadaina ta be, Samaria bona Idau Bese hahine be idia miro. To, Iesu be Sukara ranu guri dekenai Samaria hahinena ia haroro henia. Momokani, Iesu ese unai hahine dekenai ia hahedinaraia goevagoeva ia be idia gwauhamatalaia Mesia, guna ta dekenai unai bamona ia hereva lasi. (Ioane 4:6, 25, 26) Farisea taudia idia gwau hahine dekenai Dirava ena Taravatu do idia hadibaia lasi, to Iesu ese ena nega bona goada bada ia henia hahine ia hadibadia totona. (Luka 10:38-42) Bona edia sene herevadia idia gwau, hahine be kota ai hamomokania herevadia idia gwauraia diba lasi, to Iesu ese hahine haida ia matauraia, badina ia toreisi lou murinai idia dekenai ia hedinarai guna.  Idia ia hamaoroa danu do idia lao bona ena hahediba taudia do idia hadibaia, ia toreisi lou vadaeni!​—Mataio 28:1-10.

¹⁹ Oibe, Iesu ese unai negai idia noho bese idauidau dekenai hahemaoro goeva ena anina ia hahedinaraia. Nega momo unai bamona ia karaia, ena be dika bada ia davaria diba. Iesu ena haheitalai amo ita itaia, hahemaoro goeva momokanina hahedinaraia totona, ta ia boga auka be namo. Unai dainai Baibel ese Iesu ia gwauraia “Iuda iduhu ena Laiona” be maoro. (Apokalupo 5:5) Laloatao, laiona ese hahemaoro goeva ia laulaulaia. Vaira negana ai, Iesu ese hahemaoro goeva be gabu ibounai dekenai do ia mailaia. Anina be “tanobada ai kota maoromaoro” do ia karaia.​—Isaia 42:4.

20, 21. Iseda negai, Mesia Pavapavana be tanobada ibounai bona Keristani kongrigeisen lalonai, edena dala ai hahemaoro goeva ia habadaia?

²⁰ Lagani 1914 ai, Iesu be Mesia Pavapavana ai ia lao neganai, tanobada dekenai hahemaoro goeva ia hadibaia. Edena dala ai? Iena peroveta herevana Mataio 24:14 dekenai, hagugurua gaukarana ia durua noho. Iesu ena murinai idia raka taudia ese Iehova ena Basileia ena hereva momokani, be tano idauidau ai idia noho taudia dekenai idia hadibaia. Iesu bamona, taunimanima edia toana idia laloa lasi, dala idia tahua taunimanima ibounai—matamata eiava buruka, taga o ogogami, tau eiava hahine—dekenai dala idia kehoa hahemaoro goeva Diravana, Iehova, idia diba totona.

²¹ Danu, Iesu be Keristani kongrigeisen ena Kwarana bona ia ese hahemaoro goeva be kongrigeisen lalonai ia hadibaia noho. Peroveta herevana hegeregerena, tatau haida be “harihari gaudia” bamona kongrigeisen dekenai ia henia, bona unai kamonai Keristani elda taudia ese kongrigeisen idia hakaua. (Efeso 4:8-12) Dirava ena mamoe oreana idia naria noho lalonai, unai tatau ese Iesu Keriso ena haheitalai idia tohotohoa bona hahemaoro goeva karana idia habadaia. Hanaihanai idia laloatao Iesu ia ura iena mamoe idia kara namo henidia—herevana idia be dagi bada taudia, ladana bada, taga eiava ogogami taudia.

22. Iehova ese inai tanobada ena kara gageva be edena bamona ia laloa, bona ena Natuna ia abia hidi dahaka do ia karaia totona?

²² Vaira negana ai, Iesu ese dala badana ai tanobada ibounai dekenai  kota maoromaoro do ia karaia. Inai tanobada dikana lalonai kara gageva be ia bada herea. Hitolo amo idia mase natudia ta ta ibounai be kara gageva dainai idia mase, badina moni bona nega bada idia negea tuari kohudia bona moale karadia idia tahua taudia edia ura kava idia hagugurua totona. Lagani ta ta ai idia mase kava natudia milioni momo, be idia vara kara gageva idauidau ena kahana ta sibona, unai ibounai dainai Iehova be kara maoromaoro dalanai ia badu. Ia ese ena Natuna ia abia hidi vadaeni kara maoromaoro tuarina do ia karaia, inai tanobada dikana ena kara gageva ibounai do ia haorea momokani totona.​—Apokalupo 16:14, 16; 19:11-15.

23. Aramagedono murinai, Keriso ese edena dala ai tanobada ibounai lalonai hahemaoro goeva do ia habadaia ela bona hanaihanai?

²³ To, Iehova ena hahemaoro goeva be kara dika hadikaia ore karana sibona lasi. Iena Natuna ia abia hidi danu “Maino Lohiana” bamona ia lohia totona. Aramagedono tuarina murinai, Iesu ena lohia dalana ese tanobada ibounai dekenai maino do ia havaraia, bona “kota maoromaoro” ida do ia lohia. (Isaia 9:6, 7) Bena, Iesu be mai moale ida kara gageva ibounai do ia kokia, unai kara ese tanobada dekenai hisihisi bada ia havaraia vadaeni. Mai ena kamonai ida Iehova ena hahemaoro goevadaena, do ia badinaia ela bona hanaihanai. Unai dainai, hari Iehova ena hahemaoro goeva ita tohotohoa be gau badana. Unai do ita karaia diba dalana mani ita itaia.