1, 2. Dirava ena kara namo ena bada be edena bamona, bona Baibel ese unai kara be edena bamona ia gwauraia?

 DINA diho ena hairai ai, nega daudau lalonai idia hetura taudia haida be murimuri ai idia aniani hebou, idia kiri, herevahereva bona dina diho ena hairai idia moalelaia. Gabu ma ta dekenai, biru tauna ta be ena uma ia itaia bona ia moale badina guba ia korema bona ia diho matamaia medu ese ena uma aniani do ia haparia. Ma gabu ta dekenai, tau ta bona ena adavana idia moale badina idia itaia edia natuna maragina be metairametaira ia raka matamaia.

² Herevana unai taudia idia diba eiava lasi, to idia ibounai be Iehova Dirava ena kara namo amo hahenamo idia abia noho. Tomadiho taudia haida be nega momo inai hereva, “Dirava be namo” idia gwauraia loulou. To Baibel be mai goada ida unai ia herevalaia. Ia gwau: “Iena kara namo be bada herea!” (Sekaraia 9:17) To toana be hari inai negai, taunimanima haida sibona ese unai hereva ena anina korikorina idia diba. Iehova Dirava ena kara namo be dahaka, bona edena dala ai unai kara be mai anina ita ta ta dekenai?

3, 4. Kara namo be dahaka, bona dahaka dainai kara namo be Iehova ena lalokau ia hahedinaraia?

³ Gado momo ai inai hereva, “kara namo” be taunimanima ese gau momo totona idia gaukaralaia. To, Baibel ese ia hahedinaraia kara namo be unai bamona hereva ta sibona lasi. Kara namo ese kara maoromaoro badinaia karana ia hahedinaraia. Vadaeni, ita gwau diba Iehova ena kara ibounai lalonai kara namo ia hahedinaraia. Iena kara ibounai—ena siahu, hahemaoro goeva, bona aonega—be namo sibona. To, kara namo be Dirava ena lalokau ia hahedinaraia. Dahaka dainai?

 ⁴ Kara namo be tau ta ese ma ta dekenai ia hahedinaraia karana. Aposetolo Paulo ia hahedinaraia, taunimanima edia kara namo ese edia kara maoromaoro ia hereaia. (Roma 5:7) Kara maoromaoro tauna be taravatu ia badinaia auka diba, to kara namo tauna be unai sibona ia karaia lasi. Dala ia tahua ma haida ia durua totona. Do ita itaia, Iehova be unai dala dekenai ia namo momokani. Oibe, Iehova ena lalokau bada dainai unai bamona kara namo ia hahedinaraia.

5-7. Dahaka dainai Iesu ia ura lasi ia idia gwauraia “Hadibaia Tauna Namona,” bona unai amo dahaka hereva momokani badana ia hadibaia?

⁵ Kara namo hahedinaraia karana dekenai Iehova be hereadae. Nega sisina ia do noho bena Iesu do ia mase neganai, tau ta be ia dekenai ia lao henanadai ta ia henia totona, bona Iesu ia boiria “Hadibaia Tauna Namona.” To Iesu ia haere: “Dahaka dainai lau oi gwauraia namo? Tau ta be ia namo lasi, to Dirava sibona.” (Mareko 10:17, 18) Vadaeni, reana ena haere dainai oi daradara. Dahaka dainai Iesu ese unai tauna be unai bamona ia haere henia? Iesu be “Hadibaia Tauna Namona” lasi, a?

⁶ Ia hedinarai goevagoeva, unai tauna ese inai hereva “Hadibaia Tauna Namona” be dagi ladana ta bamona ia gaukaralaia. Iesu be unai hanamoa ia henia ena guba Tamana dekenai, badina ia sibona be namo herea momokani. (Aonega Herevadia 11:2) To unai amo Iesu ese hereva momokani badana ta ia hamomokania danu. Iehova sibona be namo ena badina. Ia sibona be mai ena maoro dahaka be namo bona dahaka be dika ia gwauraia totona. Adamu bona Heva idia gwau-edeede bona kara namo bona kara dika hadibaia auna ena huahua idia ania neganai, unai maduna idia huaia toho. To Iesu be idau, ena Tamana ia rakatania dahaka be namo bona dahaka be dika ia abia hidi totona.

⁷ Ma danu, Iesu ia diba Iehova be kara namo ibounai ena Badina korikorina. Ia be “harihari gaudia namodia ibounai bona harihari gaudia goevadia ibounai” ia Henia Tauna. (Iamesi 1:17) Mani ita tahua, edena bamona Iehova ena harihari bada karana ese ena kara namo ia hahedinaraia.

8. Edena dala ai Iehova ese taunimanima ibounai ia kara namo henidia?

⁸ Idia mauri taudia ibounai be Iehova ena kara namo amo namo idia abia vadaeni. Salamo 145:9 ia gwau: “Iehova be taunimanima ibounai dekenai kara namo ia hahedinaraia.” Dahaka gau haida ese idia hahedinaraia taunimanima ibounai ia kara namo henidia? Baibel ia gwau: “Gau namodia ia karaia dainai, umui dekenai ia hahedinaraia ia be daika. Umui dekenai medu bona aniani momo negadia ia henia, vadaeni aniani momo umui abia bona emui kudouna ia hamoalea.” (Kara 14:17) Aniani namona ta oi ania neganai, oiemu lalona ia moale, ani? Iehova ena kara namo ai inai tanobada ia karaia dainai, ranu ia ore diba lasi bona “aniani momo negadia ia henia” dainai, aniani momo idia vara, bona aniani namodia ita ania diba. Iehova ese ia idia lalokau henia taudia sibona dekenai kara namo ia hahedinaraia lasi, to taunimanima ibounai dekenai.  Iesu ia gwau: “Ia ese kara dika taudia bona kara namo taudia latanai dina ena diari ia henia. Bona kara maoromaoro taudia bona kara maoromaoro lasi taudia latanai medu ia siaia diho.”​—Mataio 5:45.

9. Edena dala ai apolo ese Iehova ena kara namo ia haheitalaia?

⁹ Taunimanima be hanaihanai dina, medu bona aniani idia abia, to Dirava ena harihari bada karana idia laloa bada lasi. Hegeregere, apolo mani ita laloa. Ia be tanobada ena keru gabudia momo ai ia tubu. To, ia be mai ena hairai bada, mamina be namo herea, bona ranu bona tauanina durua gaudia amo ia honu. Tanobada hegegemadai, apolo idauidau 7,500 idia noho, edia kala be kakakaka, golo ena kala bamona, ielo, grin bona idia haida edia bada be vivi ena bada hegeregerena bona ma  haida be orensi badadia bamona. Bema apolo ena uhe be maragi momokani ta be emu imana dekenai oi dogoatao, toana be anina lasi. To ia amo au mai hairaina ia tubu. (Solomona Ena Ane 2:3) Siahu matamaia negadia ibounai, apolo auna be flaoaflaoa mai hairaina amo ia honu; keru matamaia negana ibounai huahua ia havaraia. Lagani ta ta ai—lagani ibounai 75 bamona lalonai—apolo auna ta ese ia havaraia huahua be maua 20 bamona ia hahonua diba, bona maua ta ta edia metau be 19 kilogram!

10, 11. Iseda hemami havaraia gaudia ese edena bamona Dirava ena kara namo idia hahedinaraia?

¹⁰ Iehova ena kara namo hereana dainai, iseda tauanina be ‘hoa dalanai ia karaia,’ bona hemami havaraia gaudia ia atoa dainai ia karaia gaudia ita mamia bona ita moalelaia diba. (Salamo 139:14) Inai karoa ena hamatamaia kahana dekenai ita herevalaia gaudia mani oi laloa lou. Unai bamona negadiai, dahaka gaudia idia itaia ese idia ia hamoalea? Natuna ena vairana ese ia hahedinaraia moale toana. Uma gabu latanai ia diho medu. Dina diho ese ia hahedinaraia kala idauidau. Taunimanima edia matana ese kala idauidau handred tausen, eiava reana milioni idia itaia diba! Iseda taiana amo ita lalokau henia tauna ena gado rege idauidau, lai ese au ia odaia ena rege, bona natu maragina ena kiri ita kamonai diba. Dahaka dainai unai gaudia, ita itaia bona kamonai neganai ita moale? Baibel ia gwau: “Ia kamonai taiana bona ia itaia matana, ruaosi be Iehova ese ia karaia.” (Aonega Herevadia 20:12) To inai be iseda tauanina ena hemami havaraia gaudia rua sibona.

¹¹ Iehova ena kara namo ia hamomokania gauna ma ta be, gau idauidau edia bonana ita bonaia diba. Taunimanima edia udu baubau be bonana idauidau momo ia bonaia diba. Idia haida be inai: oi ura henia aniani ena bonana, flaoaflaoa, au raurau, bona lahi ena kwalahu. Daua toho hemamina dainai, lai oi mamia diba emu vairana dekenai, lalokau tauna ese oi ia rosia neganai hagoadaia mamina oi abia danu, bona ia mage huahua ta ena kopina manokana be emu imana amo oi mamia diba. Bona oi koria neganai, ena mamina oi mamia. Unai huahua lalonai idia noho muramura idauidau dainai, oiemu malana dekenai idia noho hemami gaudia ese ena mamina idauidau ia  mamia diba. Oibe, badina momo dainai Iehova be inai bamona ita gwauraia diba: “Emu kara namodia be momo herea! Oi idia gari henia taudia dekenai emu kara namodia oi hahedinaraia.” (Salamo 31:19) To, edena dala ai Iehova be ia idia gari henia taudia dekenai hanamoa bada herea ia henia?

12. Iehova ese ia henia mai anina bada gaudia be dahaka, bona dahaka dainai?

¹² Iesu ia gwau: “Toretore Helagadia ia gwau: ‘Taunimanima be paraoa sibona amo idia mauri lasi, to Iehova ena uduna amo idia mai hereva ibounai amo idia mauri.” (Mataio 4:4) Momokani, Iehova ia henia heduru ese tauanina gaudia idia hereaia, badina mauri hanaihanai dekenai ita idia hakaua lao. Inai buka ena Karoa 8 lalonai ita itaia bamona, Iehova ese ena hanamoa lou siahuna ia gaukaralaia taunimanima ia durua dala maorona ai ia idia tomadiho henia lou totona. Unai ia karaia dalana ta be heduru ia henia ia ita dibaia bona ia kahirakahira ita lao totona.

13, 14. (a) Peroveta tauna Esekiela be matahanai ta lalonai dahaka ia itaia, bona hari inai negai ena anina be dahaka ita dekenai? (b) Iehova ese ena abidadama hesiai taudia totona dahaka mauri havaraia gauna ia henia?

¹³ Baibel ena hanamoa lou peroveta hereva badana ta lalonai, peroveta tauna Esekiela be matahanai ta amo idia haginia lou dubu helaga mai hairaina ia itaia. Unai dubu helaga amo sinavai ta ia aru lao, ia aru lao neganai ia bada bona ia dobu ia lao ela bona sinavai bada herea ai ia lao. Unai sinavai ia aru lao gabudia ibounai dekenai hahenamo ia mailaia. Sinavai badinai au haida idia tubu, idia ese aniani idia havaraia bona gorere idia hanamoa. Bona unai sinavai ese Mase Davarana, mauri gaudia idia noho lasi bona damena amo ia honu davarana dekenai, animal idauidau dekenai mauri ia henia! (Esekiela 47:1-12) To unai ibounai ena anina be dahaka?

¹⁴ Unai matahanai ena anina be Iehova ese ena taunimanima ia durua ia ura henia dalana ai, ia idia tomadiho henia lou totona. Unai matahanai ese ia hahedinaraia sinavaina bamona, Dirava ese ena taunimanima dekenai mauri havaraia  gaudia momo herea ia henia. Iehova ese lagani 1919 ai tomadiho goevana ia haginia lou negana amo ema bona hari, Ia ese mauri havaraia harihari gaudia amo ena taunimanima ia hanamodia noho. Edena dala ai? Baibel, Baibel idia herevalaia bukadia, kongrigeisen hebou, rijinol bona sekit hebouhebou ese taunimanima milioni momo dekenai hereva momokani idia mailaia. Unai dala amo Iehova ese taunimanima dekenai mauri ia henia mai anina bada gauna ia hadibaia—Keriso ena mauri davalaia boubouna unai—ia dainai Dirava idia lalokau henia momokani bona idia gari henia taudia be Iehova vairanai idia goeva diba bona mauri hanaihanai idia abia diba. a Unai dainai, inai nega dokona ai, tanobada taudia be Iehova ena hereva idia kamonai lasi dainai idia hitolo, to Iehova ena taunimanima be edia abidadama hagoadaia gaudia idia abia dainai idia moale.​—Isaia 65:13.

15. Keriso ena Lagani 1,000 Lohia Negana ai, edena dala ai Iehova ena kara namo be ia idia kamonai henia taudia dekenai do ia hahedinaraia?

¹⁵ Inai tanobada dikana ia ore neganai, Esekiela ese matahanai lalonai ia itaia sinavaina be do ia aru noho. Keriso ena Lagani 1,000 Lohia Negana ai unai sinavai be do ia aru badabada. Bena, Mesia Basileiana amo, Iehova ese Iesu ena boubou gauna do ia gaukaralaia guguru, kamonai taudia be metairametaira do ia durua ela bona idia goevadae momokani. Momokani, unai negai Iehova ena kara namo dainai do ita moale bada!

16. Baibel ese edena bamona ia hahedinaraia, kara ma haida be Iehova ena kara namo lalonai idia noho, bona idia haida be dahaka?

¹⁶ Iehova ena kara namo be hariharibada karana sibona lasi. Dirava ese Mose ia hamaoroa: “Lau ese oi dekenai laloparara do lau henia, unai amo egu kara namodia do oi itaia, bona oi vairanai egu ladana Iehova do lau gwauraia.” Unai sivarai ma ia gwau: “Iehova be Mose vairanai ia hanaia bona ia gwau: Lau be Iehova, lau Iehova be hebogahisi Diravana, lau badu haraga  lasi, egu lalokau be bada herea bona nega ibounai egu hereva lau hamomokania.” (Esodo 33:19; 34:6, futnout) Unai dainai kara ma haida be Iehova ena kara namo lalonai idia noho danu. Idia rua mani ita itaia.

17. Hebogahisi be dahaka, bona Iehova ese edena dala ai unai kara be goevadae lasi taudia dekenai ia hahedinaraia?

¹⁷ “Hebogahisi.” Unai kara amo, Iehova ese taunimanima ia kara henia dalana ita itaia diba. Nega momo siahu taudia be idia hereva auka, lalokau idia hahedinaraia lasi, bona taunimanima idia biagua auka, to Iehova be idau, ia manada bona hebogahisi ia hahedinaraia. Hegeregere, Iehova be Abram dekenai ia gwau: “Mani emu matana oi negea, bona oi noho gabuna amo not bona saut kahana, bona ist bona west kahana oi itaia.” (Genese 13:14) Baibel momo lalonai inai hereva “mani emu kara” idia kokia. To Baibel idia diba bada taudia idia gwau, idaunegai Heberu gado ai hereva ta ia noho dainai, unai siri ena hereva be oda ta lasi to ia be mai manau ida idia gwauraia noinoi herevana ta. Ma siri haida danu be unai bamona. (Genese 31:12; Esekiela 8:5) Mani oi laloa, guba bona tanobada ia karaia Lohiabadana ese taunimanima dekenai, “mani emu kara,” ia gwauraia! Inai kara auka, dagedage, bona hereva dika amo ia honu tanobadana lalonai, iseda Dirava Iehova, ena kara namo ita lalohadailaia karana ese ita ia hagoadaia, ani?

18. Edena dala ai Iehova be ‘nega ibounai ena hereva ia hamomokania’ bona dahaka dainai unai hereva ese ita ia hagoadaia?

¹⁸ ‘Nega ibounai ena hereva ia hamomokania.’ Hari taunimanima momo be vaia idia koikoi. To Baibel ese ita ia hadibaia: “Dirava be taunimanima bamona lasi, ia hereva koikoi lasi.” (Numera 23:19) Oibe, Tito 1:2 ia gwau: “[Dirava] be ia koikoi diba lasi.” Iehova be kara namo Diravana dainai unai bamona ia karaia diba lasi. Unai dainai, Iehova ena gwauhamata ita abidadama henia momokani diba; ia gwauraia gaudia be hanaihanai idia guguru sibona. Baibel ese Iehova ia gwauraia “kara momokani Diravana.” (Salamo 31:5) Hereva koikoi gwauraia karana ia dadaraia sibona lasi, to hereva momokani momo ia halasia danu. Ia be hereva haida sibona ia gwauraia bona hereva haida ia hunia lasi; to iena aonega be bada herea  dainai, ia ura ena kamonai hesiai taudia dekenai unai diba bona laloparara ia henia. b Idia ia hadibaia danu ia henia hereva momokanina do idia badinaia, unai amo “hereva momokani [idia] badinaia noho.” (3 Ioane 3) Iehova ena kara namo ese ita ta ta be edena bamona ia durua be namo?

19, 20. (a) Edena dala ai Satani ia ura Heva ena abidadama Iehova ena kara namo dekenai ia hamanokaia, bona dahaka ia vara? (b) Iehova ena kara namo dainai dahaka ita mamia be namo, bona dahaka dainai?

¹⁹ Satani ese Eden umana lalonai Heva ia koia neganai, ia ese hehuni dalana ai Heva ena abidadama karana Iehova dekenai ia hamanokaia. Iehova be Adamu dekenai ia gwau: “Uma ai idia noho au ibounai edia huahua be emu ura hegeregerena oi ania diba.” Unai uma idia hahairaia au tausen momo amo, Iehova ese tamona sibona ia taravatua. To, Satani ese Heva dekenai ia henia henanadai ginigunana mani oi laloa: “Momokani, Dirava ia gwau uma dekenai idia noho au ibounai ena huahua do umui ania lasi, a?” (Genese 2:9, 16; 3:1) Satani ese Iehova ena hereva ia mogea, unai amo Heva ia laloa Iehova be idia dekenai gau namona ta ia hunia. Madi, Satani ena palani ia kwalimu. Heva be ia dekenai gau ibounai ia henia Diravana ena kara namo ia daradaralaia matamaia, bona ia murinai idia vara tatau bona hahine momo ese unai idia karaia danu.

²⁰ Heva ena daradara karana ese ia havaraia lalohisihisi bona metau bada ita mamia noho. Unai dainai namona be Ieremia 31:12 ena hereva ita laloa bada, ia gwau: “Iehova amo idia mai gau namodia do idia moalelaia.” Oibe, Iehova ena kara namo dainai ita moale be namo. Namo lasi Dirava ena kara ena badina ita daradaralaia, ita diba ena kara namodia be momo herea. Ia ita abidadama henia momokani diba, badina ia idia lalokau henia taudia edia namo ia laloa bada.

21, 22. (a) Iehova ena kara namo dainai, oi ura dahaka oi karaia? (b) Edena kara be karoa gabena dekenai do ita herevalaia, bona edena dala ai ia be kara namo amo ia idau?

 ²¹ Ma danu, ma haida dekenai Dirava ena kara namo ita herevalaia totona dala ia kehoa neganai, ita moale. Salamo 145:7 ese Iehova ena taunimanima be inai bamona ia gwauraia: “Idia ese emu kara namodia do idia herevalaia noho, sinavai ia aru noho bamona.” Ita mauri noho dinadia ta ta lalonai, Iehova ena kara namo amo namo ita davaria. Dina ta ta ai guriguri lalonai Iehova ita tanikiu henia ena kara namo dainai, bona ita moalelaia gaudia ita gwauraia hedinarai be namo, ani? Unai kara namodia ita laloa, dina ta ta Iehova ita tanikiu henia, bona ma haida dekenai ita gwauraia neganai, unai ese ita do ia durua iseda kara namo Diravana ita tohotohoa totona. Bona bema Iehova ia karaia bamona, dala ita tahua kara namo ita hahedinaraia, Ia kahirakahira do ita lao. Ia buruka tauna, aposetolo Ioane, ia gwau: “Egu lalokau turana e, haheitalai dikadia oi tohotohoa lasi, to haheitalai namodia oi tohotohoa. Kara namo ia karaia tauna be Dirava amo. Kara dika ia karaia tauna be Dirava ia itaia lasi.”​—3 Ioane 11.

²² Iehova ena kara namo be kara ma haida ida ia gaukara hebou danu. Hegeregere, Dirava ena “lalokau be bada herea.” (Esodo 34:6) Unai kara be kara namo amo ia idau, badina Iehova ese unai kara be ena abidadama hesiai taudia sibona dekenai ia hahedinaraia. Karoa gabena dekenai unai ia karaia dalana do ita dibaia.