1, 2. Lagani 1513 B.C.E. ai, Sinai tanona dekenai Israela taudia be dahaka dika idia davaria diba bona Iehova ese edena bamona idia ia hagoadaia?

 LAGANI 1513 B.C.E. ai, Israela taudia be Sinai tanona dekenai idia vareai neganai, dika idia davaria diba. Idia vairanai ia noho laolaona be gari gauna, badina unai tano be “taunimanima lasi gabuna badana mai garina dekenai umui ia hakaua, unuseniai poisini gaigai bona doadoa” amo ia honu. (Deuteronomi 8:15) Danu, idia davaria diba dika ta be edia inai taudia ese idia tuari henidia diba. Iehova ese ena taunimanima be unai dika lalonai ia hakaudia vareai. Ia be edia Dirava dainai, idia do ia naria, a?

² Iehova ese idia ia hagoadaia, ia gwau: “Aigupito taudia dekenai lau karaia karana umui itaia vadaeni. Lau ese umui be lau dekenai lau abia mai dalana umui itaia, ugava be ena apena amo ena natudia ia huaia bamona.” (Esodo 19:4) Iehova ese ena taunimanima ia hadibaia lou idia be Aigupito taudia amo idia ia hamauria, bona ugava ia herevalaia, idia ese gabu namona dekenai idia ia huaia lao bamona. To badina ma haida dainai ‘ugava manu ena apena’ ese Dirava ena gimaia karana ia laulaulaia be maoro.

3. Dahaka dainai ‘ugava manu ena apena’ ese Dirava ena gimaia karana ia laulaulaia be maoro?

³ Ugava ese ena hanina badana bona goadana be ataiai ia roho totona ia gaukaralaia sibona lasi. Dina siahu negadiai, ugava sinana ese ena apena ia kehoa damaru bamona—ena hanina rua edia bada be mita rua bamona—unai amo ena natuna maragidia be dina ena siahu amo ia koudia diba. Ma nega haida ai, lai kerumana amo ia naridia totona, ena hanina amo ena natudia ia koudia. Ugava ese ena natudia ia naria hegeregerena, Iehova ese Israela besena matamatana ia naria bona gimaia. Hari tano gagaena dekenai, bema iena taunimanima ese ia idia abidadama henia, iena hanina goadana be edia heau mauri gabuna  ai do ia lao diba. (Deuteronomi 32:9-11; Salamo 36:7) To hari negai ita gwau diba, Dirava ese ita do ia gimaia be maoro, a?

4, 5. Dahaka dainai Iehova ese ita do ia gimaia gwauhamatana ita abidadama henia momokani diba?

⁴ Iehova be ia hegeregere momokani iena hesiai taudia ia gimaia totona. Ia be “Siahu Ibounai Diravana”—unai dagi ladana ese ia hahedinaraia iena siahu be bada herea. (Genese 17:1) Ia aru noho ranuna ita koua diba lasi hegeregerena, Iehova ese ena siahu ia gaukaralaia dalana be ita koua diba lasi. Iena ura hegeregerena gau ibounai ia karaia diba dainai, reana ita henanadai, ‘Iehova be mai ena ura ida ena siahu ia gaukaralaia iena taunimanima ia gimaia totona, a?’

⁵ Haere be, oibe! Iehova ese ita ia hamaoroa ena taunimanima do ia gimaia. Salamo 46:1 ia gwau: “Dirava be iseda heau mauri gabuna bona goada abia gabuna, Metau negadia ai ia noho hegaegae heduru henia totona.” Dirava ia “koikoi diba lasi” dainai, ita do ia gimaia totona ia karaia gwauhamatana, ita abidadama henia momokani diba. (Tito 1:2) Iehova ese ena gimaia karana ia hahedinaraia totona ia gaukaralaia laulau herevadia haida, mani ita laloa.

6, 7. (a) Baibel negadiai, mamoe naria tauna ese edena bamona ena mamoe ia gimaia? (b) Baibel ese edena dala ai ia hahedinaraia Iehova ia ura bada ena mamoe ia gimaia bona naria?

⁶ Iehova be iseda Mamoe Naria Tauna bona “ita be iena taunimanima bona ita be ia naria mamoe oreana.” (Salamo 23:1; 100:3) Mamoe be animal momo bamona lasi, sibodia idia naria diba lasi. Baibel negadiai mamoe naria tauna ia gari lasi be namo, badina ena mamoe be laiona, uda sisia, bea, bona henaohenao taudia amo do ia gimaia. (1 Samuela 17:34, 35; Ioane 10:12, 13) To nega haida, mamoe ia gimaia negadiai mai hebogahisi ida ia kara henidia. Bema mamoe ta be mamoe serina amo ia raka oho bona ia mara, mamoe naria tauna ese unai mamoe sinana ena hekwarahi negana lalonai do ia  gimaia bona ia goada lasi mamoe natuna maragina do ia abia isi bona mamoe serina dekenai do ia abia lao.

⁷ Iehova ese ia sibona be mamoe naria tauna ida ia hahegeregerea, unai amo ita itaia diba Iehova ia ura momokani ita ia gimaia. (Esekiela 34:11-16) Inai buka ena Karoa 2 dekenai, Isaia 40:11 ita herevalaia, unai siri ese Iehova ia gwauraia dalana mani oi itaia, ia gwau: “Mamoe naria tauna bamona, ia ese ena mamoe oreana do ia naria. Iena imana amo mamoe natudia do ia haboua, bona iena kemena dekenai idia do ia rosia.” To dahaka ia vara bena mamoe naria tauna be ena “kemena dekenai” mamoe natuna maragina ia rosia—ena ataiai dabuana lalonai ia udaia? Reana mamoe maragina be mamoe naria tauna dekenai ia lao bona ena aena ia daua toho. To, mamoe naria tauna ia igo diho be namo, mamoe ia abia isi bona ena ataiai dabuana amo ia kumia namonamo bena do ia rosia. Unai ese ia hahedinaraia, iseda Mamoe Naria Tauna Badana ese ita ia lalokau henia bada dainai ia ura bada ita do ia gimaia!

8. (a) Dirava ia gwauhamata daidia do ia gimaia, bona Aonega Herevadia 18:10 ese edena bamona unai ia hahedinaraia? (b) Dirava ena ladana dekenai hahemauri ita davaria totona, dahaka ita karaia be namo?

⁸ Dirava ia gwauhamata ia kahirakahira idia lao taudia sibona do gimaia. Aonega Herevadia 18:10 ia gwau: “Iehova ena ladana be kohoro goadana. Kara maoromaoro tauna ia heau vareai bona ia mauri.” Baibel negadiai, nega haida tano gagaena dekenai kohoro idia haginia, unuseniai taunimanima idia heau mauri diba. To dika ia davaria tauna ia mase lasi totona, ena maduna be unuseniai do ia heau lao. Dirava ena ladana dekenai hahemauri ita davaria totona, unai bamona ita karaia danu. Dirava ena ladana be meamea herevana ta lasi, unai dainai ita gwauraia loulou sibona lasi; to kara ma haida ita karaia danu. Namona be unai ladana ia abia Tauna ita diba bona ita abidadama henia bona ena kara maoromaoro taravatudia ita badinaia. Iehova be mai ena hebogahisi ida ita ia hagoadaia, bema mai abidadama ida ia dekenai ita lao, ia be kohoro aukana ta bamona ita do ia gimaia!

9. Iehova be ita do ia naria ena gwauhamata sibona ia karaia lasi, to dahaka danu ia karaia?

⁹ Iehova be ita do ia naria ena gwauhamata sibona ia karaia lasi. Baibel negadiai, hoa daladia ai ia hahedinaraia ia be ia hegeregere ena taunimanima ia gimaia totona. Israela taudia edia sivarai ese ia hahedinaraia, Iehova ese nega momo ena “imana” goadana amo edia inai taudia ia koudia. (Esodo 7:4) To, Iehova ese taunimanima ta ta gimaia totona ena siahu ia gaukaralaia danu.

10, 11 Baibel lalonai edena sivarai ese idia hahedinaraia, Iehova ese taunimanima ta ta totona ena gimaia siahuna ia gaukaralaia?

¹⁰ Heberu memero matamatadia toi—ladadia be Sataraka, Misaka bona Abetenigo—be King Nebukanesa ena golo kaivakukuna vairanai idia igo diho lasi neganai, king ia badu dikadika bona ia gwau lahi siahu hereana lalonai do ia negedia vareai. Nebukanesa, tanobada dekenai siahu bada herea pavapavana ese ia kirikirilaidia ia gwau: “Edena dirava ese egu imana amo umui do ia hamauria?” (Daniela 3:15) Unai tatau matamatadia toi be Dirava ese idia do ia gimaia siahuna idia abidadama henia, to idia laloa lasi ia be unai bamona do ia karaia. Unai dainai, idia haere idia gwau: “Bema unai bamona oi karaia, ai hesiai henia Diravana ese ia araia noho lahi badana bona emu imana amo ai ia hamauria diba.” (Daniela 3:17) Momokani, unai lahi be nega 7 amo idia hasiahua, to siahu ibounai Diravana dekenai unai be hekwakwanai gauna lasi. Ia ese idia ia gimaia, bona ena be king ia ura lasi ia hereva to ia gwau: “Dirava ese idia ia hamauria dalana be dirava ma ta ese ia karaia diba lasi.”​—Daniela 3:29.

¹¹ Iehova ese ena Natuna tamona sibona ena mauri be guba amo ia kokia bona Iuda haneulatona, Maria, ena bogana lalonai ia atoa neganai, dala hereadaena amo ena gimaia siahuna ia hahedinaraia unai. Aneru ta ese Maria ia hamaoroa, “oi be do oi rogorogo bona natuna mero ta do oi havaraia.” Aneru ia gwau: “Lauma helaga be oi latanai do ia diho, bona Ataiai Momokani Diravana ena siahu ese oi do ia koua.” (Luka  1:31, 35) Toana be Dirava ena Natuna ese dika do ia davaria lasi. Iesu ena tanobada sinana be ia goevadae lasi dainai, Iesu be goevadae lasi tauna ai do ia lao, a? Unai Natuna ia do vara lasi neganai Satani ese ia do ia alaia, a? Lasi momokani! Iehova ese Maria ia gimaia dainai gau ta—kara dika ta, siahu dikana ta, ala-ala tauna ta, eiava demoni ta—ese Maria ena bogana lalonai ia tubu natuna ia hamasea diba lasi. Iesu be ia mero neganai, Iehova ese ia do gimaia noho. (Mataio 2:1-15) Gau ta ese Dirava ena lalokau Natuna ia hadikaia lasi, ela bona Dirava ese ia abia hidi negana ia ginidae.

12. Baibel negadiai, dahaka dainai Iehova ese hoa dalanai taunimanima haida ia gimaia?

¹² Dahaka dainai Iehova ese hoa dalanai taunimanima haida ia gimaia? Nega momo Iehova ese taunimanima ia gimaia badina unai amo mai anina bada gauna: iena ura do ia hagugurua. Hegeregere, Iesu ia beibi neganai ia mauri noho be mai anina bada Dirava ena ura ia guguru totona, badina unai ese taunimanima ibounai dekenai namo do ia mailaia. Iehova ese ena gimaia siahuna ia gaukaralaia sivaraidia momo be Toretore Helagadia ena kahana ta, “ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:4) Oibe, unai haheitalai ese iseda abidadama karana iseda siahu ibounai Diravana dekenai ia hagoadaia. To hari Dirava ese edena dala ai ita ia gimaia diba?

13. Nega ibounai Iehova be ita totona hoa karadia do ia karaia, a? Gwauraia hedinarai.

¹³ Dirava ia gwauhamata ita do ia gimaia, to ita gwau lasi unai ena anina be ita ia naria totona hoa karadia do ia karaia. Lasi, Dirava ia gwauhamata lasi inai tanobada dikana lalonai hekwakwanai do ita davaria lasi. Iehova ena kamonai hesiai taudia momo ese metau dikadia idia davaria hegeregere ogogami, tuari, gorere bona mase. Iesu ese ena hahediba taudia ia hamaorodia edia abidadama dainai idia mase diba. Unai dainai, Iesu ia hahedinaraia gau badana be ita haheauka noho ela  bona dokona. (Mataio 24:9, 13) Bema Iehova ese nega ibounai hoa dalanai ena taunimanima ia hamauridia, reana Satani be momokani Iehova do ia kirikirilaia bona Dirava ita badinaia momokani eiava lasi do ia hepapahuahulaia.​—Iobu 1:9, 10.

14. Edena haheitalai ese idia hahedinaraia, Iehova ese ena hesiai taudia ibounai be dala tamona dekenai ia gimadia lasi?

¹⁴ Baibel negadiai danu, Iehova ese ena gimaia siahuna ia gaukaralaia lasi iena hesiai taudia ta ta be mase amo ia gimaia totona. Hegeregere lagani 44 C.E. ai, Heroda ese aposetolo Iamesi ia hamasea; to daudau lasi murinai, Iehova ese Petero be “Heroda ena imana amo” ia ruhaia. (Kara 12:1-11) Bona Iamesi ena tadina Ioane be ia mauri sisina daudau, to Petero bona Iamesi be idia mase guna. Ia hedinarai goevagoeva, Iehova ese ena hesiai taudia ibounai be dala tamona dekenai ia gimadia lasi. Badina, taunimanima ibounai “dekenai dika be nega idauidau ai idia vara kava.” (Hadibaia Tauna 9:11) Vadaeni, Iehova ese hari ita be edena bamona ia gimaia diba?

15, 16. (a) Dahaka ese ia hamomokania Iehova ese ia idia tomadiho taudia be orea ta bamona ia gimaia? (b) Dahaka dainai ita diba momokani Iehova ese hari bona “hisihisi badana” lalonai ena hesiai taudia do ia gimaia?

¹⁵ Gau ginigunana be inai, tauanina dalanai Iehova ese ita ia gimaia dalana mani ita laloa. Ita be Iehova tomadiho henia taudia dainai, Iehova ese orea ta bamona ita ia gimaia diba. Bema lasi, Satani ese ita do ia hadikaia haraga diba. Mani inai oi laloa: Satani, “inai tanobada ena lohia,” ia ura bada tomadiho momokani ia hadikaia ore. (Ioane 12:31; Apokalupo 12:17) Tanobada dekenai mai edia siahu bada gavamani haida ese iseda haroro gaukara idia taravatua bona idia ura ita idia hadikaia ore momokani. To, Iehova ena taunimanima idia gini goada bona hesiku lasi ida idia haroro noho! Dahaka dainai bese goadadia ese inai Keristani orea maragina, sibodia idia gimaia diba lasi taudia unai, edia gaukara idia hadokoa lasi? Badina Iehova ese iena hanina goadana amo ita ia gimaia!​—Salamo 17:7, 8.

¹⁶ Ia mai noho hisihisi badana lalonai, Iehova ese ita do ia  gimaia, a? Dirava ena hahemaoro negana ita gari henia lasi. Badina, “Iehova ese hahetoho amo ia idia badinaia taudia ia hamauria dalana ia diba, to kara maoromaoro lasi taudia ia guidia, ena hahemaoro dinana ai ia hadikadia ore totona.” (Apokalupo 7:14; 2 Petero 2:9) To hari, gau rua ita abia dae momokani diba. Ginigunana be inai, Iehova ese ena kamonai hesiai taudia do ia gimadia dainai, tanobada ai ena taunimanima hamasea ore karana do ia koua. Iharuana be, abidadama taudia be ena kara maoromaoro tanobadana ai mauri hanaihanai do idia abia—toreisi lou taudia danu. Oibe, Dirava ena lalohadai dekenai idia noho taudia be gabu namona ai idia noho.​—Ioane 5:28, 29.

17. Iehova ese edena dala ai iena Hereva amo ita ia gimaia?

¹⁷ Hari danu, Iehova ese iena “hereva” amo ita ia gimaia noho, unai buka be mai ena siahu taunimanima edia kudouna ia hanamoa bona edia mauri ia haidaua totona. (Heberu 4:12) Iena hakaua herevadia ita badinaia neganai, tauanina dalanai dika haida do ita davaria lasi. Isaia 48:17 ia gwau, “Lau, Iehova, be . . . umui lau hadibaia noho, namo umui davaria totona.” Ita daradara lasi, Dirava ena Hereva ita badinaia neganai iseda tauanina do ia goada bona do ita mauri daudau diba. Hegeregere, Baibel ena sisiba ita badinaia diba bona matabodaga karadia bona tauanina hamiroa karadia ita dadaraia dainai, Dirava badinaia lasi taudia ese idia karaia kara dikadia bona mirodia amo idia vara dika idauidau ita abia lasi. (Kara 15:29; 2 Korinto 7:1) Ita moale bada badina Dirava ena Hereva ese ita ia gimaia!

18. Edena dala ai Iehova ese lauma dalanai ita ia gimaia?

¹⁸ Mai anina bada gauna be inai, Iehova ese lauma dalanai ita ia gimaia. Lauma dalanai dika ita abia lasi totona, iseda lalokau Diravana ese durua gaudia ia henia, unai amo hahetoho ita haheaukalaia diba bona iseda hetura karana ia ida ita gimaia diba. Iehova ese kara haida ia karaia ita ia hamauria totona, lagani haida sibona lalonai lasi, to ela bona hanaihanai. Iehova ese lauma dalanai ita ia gimaia totona ia henia gaudia haida mani ita laloa.

19. Edena dala ai Iehova ena lauma ese ita ia durua diba hahetoho idauidau ita haheaukalaia totona?

 ¹⁹ Iehova be “Guriguri Kamonai Diravana.” (Salamo 65:2) Mauri ena hekwarahi idauidau dainai ita lalohisihisi bada neganai, iseda lalo-hekwarahi be ia dekenai ita gwauraia karana ese iseda lalona ena mamina ia hanamoa bada diba. (Filipi 4:6, 7) Hoa dalanai iseda hahetoho ia kokia lasi, to iseda guriguri do ia kamonai henia bona aonega do ia henia unai hekwakwanai ita haheaukalaia totona. (Iamesi 1:5, 6) To unai ia hereaia gauna be inai, Iehova ese lauma helaga be idia noinoi taudia dekenai ia henia. (Luka 11:13) Unai siahu badana ese ita ia durua diba ita davaria hahetoho eiava hekwakwanai ita haheaukalaia totona. Ita dekenai “taunimanima edia siahu ia hereaia gauna” ia henia diba, unai amo do ita haheauka ela bona Iehova ese hari idia noho hisihisi idia havaraia hekwakwanai ibounai do ia haorea bona tanobada matamatana do ia mailaia.​—2 Korinto 4:7.

20. Edena dala ai iseda tadikaka amo Iehova ese ena gimaia siahuna ia hahedinaraia?

²⁰ Nega haida, Iehova ena gimaia siahuna be iseda tadikaka amo ia hahedinaraia. Iehova ese ena taunimanima tanobada ibounai dekenai be “tadikaka oreana” ta ai ia halaoa. (Roma 12:10; Ioane 6:44) Unai lalokau tadikaka oreana lalonai,  Dirava ena lauma helaga ese edia mauri ia hanamoa taudia ita itaia. Unai lauma ese ita lalonai huahua ia havaraia—huahua namodia hegeregere lalokau, hebogahisi bona kara maoromaoro. (Galatia 5:22, 23) Unai dainai, hisihisi ita davaria bona tadikaka ta be ita ia durua totona sisiba eiava hagoadaia herevadia ia henia neganai, Iehova ita tanikiu henia diba ena gimaia karana dainai.

21. (a) Iehova ese “hesiai tauna mai ena kamonai, bona mai ena aonega” amo dahaka gaudia be nega korikorina ai ia henia? (b) Iehova ese ita ia gimaia totona ia henia gaudia ese edena dala ai oi ia durua?

²¹ Iehova ese gau ma ta ia henia ita ia gimaia totona: nega korikorina ai abidadama hagoadaia gaudia ia henia. Ita dekenai goada ia henia totona, Iehova ese “hesiai tauna mai ena kamonai, bona mai ena aonega” ia hagania ena hereva idia halasia. Unai hesiai tauna mai ena kamonai ese printaia pablikeisen ia gaukaralaia hegeregere, Gima Kohorona bona Noga! magasin, iseda jw.org websait, kongrigeisen heboudia, sekit bona rijinol hebouhebou amo ita dekenai nega korikori ai iseda abidadama hagoadaia gaudia idia henia. (Mataio 24:45) Keristani hebou dekenai gau ta oi kamonai—ta ena haere amo, hereva amo, eiava guriguri amo—bona unai ese oi ia hagoadaia, a? Iseda magasin lalonai idia halasia herevana ta ese oi ia durua, a? Laloaboio lasi, lauma dalanai Iehova ese ita ia gimaia totona, unai gaudia ibounai ia henia.

22. Iehova ese hanaihanai ena siahu be edena dala ai ia gaukaralaia, bona dahaka dainai unai be iseda namo totona?

²² Iehova be “heduru idia tahua taudia ibounai” edia kesi. (Salamo 18:30) Ita diba hari negai, ia ese ena siahu ia gaukaralaia lasi dika ibounai amo ita ia gimaia totona. To, hanaihanai iena siahu ia gaukaralaia iena ura ia hagugurua totona. Unai bamona ia karaia ese gabeai ena taunimanima dekenai namo do ia havaraia. Bema Iehova kahirakahira ita lao bona ena lalokau dekenai ita noho, mauri goevadaena bona mauri hanaihanai ita dekenai do ia henia. Unai helaro dainai, namona be ita laloa inai tanobada ai ita davaria hisihisi be “nega sisina gauna bona ia metau lasi.”​—2 Korinto 4:17.