Sierra Leone tauna ta ladana Dauda be ia gwau: “Not provinsi dekenai lau mero neganai, lauegu bese bona ma bese ta ese tano ta idia hepapahuahulaia. Unai hepapahuahu hadokoa totona, babalau tauna ta idia boiria. Ia ese tau ma ta dekenai hevarivari ta ia henia, bena dabua kurokurona amo unai tau ia koua, bena unai tau ia heudeheude bona ena varahu ia diho. Hevarivari ia raraia neganai, ia gwau: ‘Tau burukana ta mai ena dabua kurokurona lau itaia, ia raka mai. Ia be tau latana mai ena huina kurokurona, bona iena doruna ia gageva sisina.’

“Lauegu tubuna ena toana ia gwauraia unai! Bena mai ena gari ida ia boiboi, ia gwau: ‘Bema egu hereva umui abia dae lasi, umui mai, emui matana amo umui itaia!’ To aiemai lalona idia goada lasi unai bamona do ai karaia! Bena babalau tauna ese babalau muramurana ia bubua ia latanai, ena lalona hakerua totona.

“‘Tubugu’ ese hevarivari-tauna ena amo ia hereva, ia gwau unai tano be aiemai bese ena. Egu tubuna hahinena ia hamaoroa tano do ia birulaia be namo. Vadaeni, iboudiai ese ena hereva idia abia dae bona edia hepapahuahu idia hadokoa.”

 Unai bamona kara idia vara momo West Africa dekenai. Unuseniai bona tanobada ena kahana momo dekenai, taunimanima milion momo idia laloa mase taudia be lauma gabuna dekenai idia hanai lao bena tanobada taudia idia itadia diba bona idia be mai edia siahu idia dekenai. Unai be momokani eiava? Mase taudia be momokani idia mauri noho, a? Bema lasi, sibodia be mase taudia edia lauma idia gwauraia taudia be daidia? Inai henanadai edia haere maorodia ita diba be mai anina bada.