HENANADAI 5
Baibel Ena Hereva Ita Abidadama Henia be Maoro, A?
Nega ta, oi be ta dekenai lalohadai kererena oi abia, a? Reana haida amo iena sivarai o ia gwauraia herevana oi kamonai. Unai dainai reana ia oi ura henia lasi, to gabeai ia oi dibaia matamaia, bona oi laloparara haida ese ia totona idia gwauraia sivaraidia be koikoi. Taunimanima momo ese Baibel dekenai unai bamona lalohadai idia abia.
Sikuli badana idia lao taudia haida ese Baibel ena hereva idia laloa maragi. Unai ena badina oi diba, a? Nega momo inai bamona idia laloa, Baibel ena hereva dekenai badina maorona be lasi, saiens ida ia hegeregere lasi, eiava ia kerere. Edia lalohadai be maoro lasi, ani?
Inai buklet oi duahia neganai, Baibel be saiens dalanai ia hegeregere karana oi dibaia dainai oi hoa, a? Momo be unai bamona idia mamia. Badina idia itaia tomadiho momo ese idia abia dae gaudia be Baibel ese ia herevalaia lasi. Hegeregere, haida idia gwau, Dirava ese dina siks ena hora 24 lalonai iunives ia karaia be Baibel ena hahediba hereva. To, Baibel ia gwau lasi saiens taudia ese iunives o tanobada ia noho ena daudau idia herevalaia dalana be kerere. a
Danu, Baibel ai Dirava ese tanobada dekenai mauri ia havaraia matamaia dalana ia herevalaia, unai ese saiens taudia dekenai dala ia kehoa edia tahua gaukarana idia karaia bona diba idia abia. Baibel ia gwau Dirava ese mauri gaudia ibounai be “edia orea ta ta hegeregerena” ia havaraia. (Genese 1:11, 21, 24) Unai hereva be reana saiens taudia edia lalohadai amo ia idau, to edia tahua gaukara ida ia hegeregere. Saiens ena histori ese ia hahedinaraia saiens taudia edia laloparara be idia idauidau; to hamomokania gaudia be idia idau lasi.
To, taunimanima momo be tomadiho dekenai idia moale lasi dainai idia ura lasi Baibel ena hereva idia tahua namonamo. Idia itaia tomadiho oreadia ese koikoi, korapsen bona dagedage idia havaraia. To unai taudia edia kara dainai do ita gwau Baibel ena hereva be kerere, a? Taunimanima momo bona saiens taudia haida danu, idia hoa badina haida be mai dagedage ida evolusen lalohadaina idia gaukaralaia edia inai heheni karana idia durua totona. Evolusen lalohadaina dekenai unai bamona ita karaia be maoro, a? Momokani, saiens taudia ese idia gwauraia gaudia ita tahua namonamo bona hamomokania gaudia ida ita hahegeregerea be namo.
Baibel dekenai unai oi karaia be namo. Reana tomadiho oreadia momo edia hahediba herevadia be Baibel amo ia idau dalana oi dibaia dainai do oi moale. Oibe, Baibel ese tuari bona inai heheni karadia ia herevalaia lasi, to ia gwau Dirava ena hesiai taudia ese tuari bona inai heheni dagedage karadia do idia dadaraia. (Isaia 2:2-4; Mataio 5:43, 44; 26:52) Baibel ia gwau, ita abidadama totona hamomokania gaudia bona laloa namonamo karana be mai anina bada, unai ese Dirava hesiai henia gaukarana lalonai ita do ia durua. (Roma 12:1; Heberu 11:1) Namo lasi daradara dainai oi lalomanoka, badina Baibel be ita ia hagoadaia taunimanima ese idia henia henanadai badadia edia haere ita tahua totona.
Hegeregere, nega ta inai bamona oi laloa, ‘Bema Dirava ta ia noho, dahaka dainai kara dika ia koua lasi?’ Baibel ese unai bamona henanadai bona henanadai ma haida danu ia haerelaia. b Oi ai hagoadaia hereva momokani oi tahua noho totona. Oi davaria haere idauidau dainai do oi hoa, bona do oi abia dae badina idia be haere maorodia mai edia hamomokania gaudia. Baibel lalonai unai ibounai idia noho.
a Hereva ma haida totona, Iehova ena Witnes taudia ese idia karaia buklet ladana, Was Life Created? itaia.
b Baibel be Dahaka Ia Hadibaia? bukana ena karoa 11 itaia, Iehova ena Witnes taudia ese idia karaia.
