Saiens taudia momo be dahaka idia gwau? Biologist bona saiens taudia momo idia laloa DNA bona ena instraksen be lagani milioni momo lalonai idia vara kava. Idia gwau molekiul lalonai, infomeisen ia abia bona siaia dalana bona ena gaukara idauidau totona be palani ta ia noho lasi.¹⁷

Baibel be dahaka ia gwau? Baibel ia gwau iseda tauanina ena kahana ta ta ibounai idia matamaia dalana bona idia vara ena nega ena instraksen be Dirava ese buka ta ai ia torea bamona. Dirava ena lauma helaga ena heduru amo King Davida ia gwau: “Egu sinana ena bogana ai lau vara matamaia neganai, lau oi itaia. Ena be egu tauanina ena kahana ta ta idia do vara lasi bona idia vara ena dina ia do abia lasi, to oi ese buka dekenai oi torea vadaeni.”​—Salamo 139:16.

Hamomokania gaudia ese dahaka idia hahedinaraia? Bema evolusen be momokani, bona gau haida idia vara kava amo DNA ia vara, namona be hamomokania gaudia ia noho. To, bema Baibel be maoro, DNA ese do ia hamomokania, ia be aonega tauna ta ese ia havaraia.

Auka lasi dalana ai DNA ena sivarai ita herevalaia neganai, ena anina ita lalopararalaia diba bona ia be hoa gauna. Sel lalonai ita loaloa lou. Hari be taunimanima ena sel lalonai do ita vareai. Mani oi laloa, oi be miusiam ta dekenai oi lao, unai miusiam dekenai sel ta ena gaukara dalana ia hadibaia. Unai miusiam be taunimanima edia sel ta hegeregerena, bema nega 13,000,000 amo idia habadaia neganai, ena bada be spot steidiam bamona, bona taunimanima 70,000 mai kahana idia helai diba.

Miusiam dekenai oi vareai neganai, oi hoa badina oi diba lasi gaudia idauidau momo oi itaia. Unai sel huanai, nucleus ia noho, ia be kuboru bona 20 stori rumana ta bamona. Unai ruma dekenai oi raka lao.

Unai nucleus ena kopina (membrane) ai ia noho iduara dekenai oi vareai bona unai gabu lalonai idia noho gaudia oi itaia noho. Unai daiutu lalonai, chromosome badadia 46 idia gini. Rua rua idia gini hebou bona edia lata be idauidau, to oi kahirakahira dekenai idia gini chromosome rua edia lata be 12 stori rumana ta hegeregerena (1). Unai chromosome rua edia huana be ia maragi, toana be tosisi bamona, to edia bada be au ena gabana badana hegeregerena. Laulau dekenai oi itaia kwanau be chromosome ia hagegea. Kahirakahira oi lao neganai, oi itaia unai kwanau be ta ta latanai idia noho. Unai kwanau edia isena dekenai, laini kwadogidia ta ta idia gini hebou (2). To, unai gaudia be buka, a? Lasi; unai be turituri varona hegeregerena. Unai turituri varo ta oi veria neganai ia raka lasi. Oi hoa badina oi itaia unai turituri varo ia lokua bona ia lalonai ma coil momo idia noho (3), bona ta ta be idia atoa namonamo. Unai coil momo lalonai be varo lata hereana bamona ia noho. Unai varo be dahaka?

Unai varo bamona gauna be chromosome ena kahana ta. Ena lababa be 2.6 sentimita bamona. Bona ena coil maragimaragidia be kuboru gaudia idia kumia hegege (4), unai amo edia toana be coil ta ese coil ma ta ia kumia. Bena inai coil be scaffold bamona gauna ese ia dogoatao auka. Oi itaia saini ta ese ia hahedinaraia, unai varo ibounai idia lokua bona haboua namo herea. Bema oi ese unai chromosome rua dekena amo unai kwanau ta ta oi veridia oho, bona ta ta oi konek kwanau tamona ai idia lao totona, ena lata be 26,000 kilomita mai kahana! a

Saiens buka ta ia gwau, unai varo idia lokua bona haboua karana be “ensinia tauna ena aonega bada ia hahedinaraia.”¹⁸ To, bema haida idia laloa ensinia tauna ese unai ia karaia lasi, oi laloa unai be maoro, a? Bema unai miusiam be mai ena sitoa badana bona hoihoi gaudia idauidau milioni momo idia noho, bona unai gaudia idia atoa namonamo emu ura gauna do oi davaria haraga. Oi laloa unai gaudia ia atoa namonamo tauna ia noho lasi, a? Lasi momokani! To sel ena gaukara dalana ese unai gaukara ia hereaia momokani.

Unai miusiam ena kohu oi itaia neganai saini ta ese oi ia hadibaia unai varo oi abia bona do oi itaia namonamo (5). Emu imana ai oi atoa neganai, oi diba ia be varo idauna momokani. Inai varo rua idia mogea hebou. Unai varo rua be vadavada ena kahana rua bamona bona huanai moia kau gaudia idia noho. Unai vadavada be ia giroagiroa bamona (6). Bena oi laloparara: Oi be DNA ena molekiul oi dogoatao noho. Unai be mauri ena hehuni gauna ta!

DNA molekiul tamona, mai ena varo bona kuboru gaudia maragimaragi iboudiai be chromosome ta. Vadavada ena moia kau gaudia be idia gwauraia base pairs (7). Edia gaukara be dahaka? Inai gaudia ibounai ena badina be dahaka? Saini ta ese unai ia hahedinaraia.

Saini ia gwau DNA ena anina korikorina dibaia totona, unai vadavada ena moia kau gaudia stadilaia be gau badana. Inai oi laloa, unai vadavada ena kahana rua idia parara bona ena moia kau ta ta idia parara danu. Kahana ta ta dekenai moia kau edia lata be idauidau. Unai moia kau toadia be mai edia kahana 4 sibona. Saiens taudia ese unai kahana ta ta idia gwauraia A, T, G, bona C. Saiens taudia idia hoa badina idia laloparara unai leta 4 idia haboua daladia idauidau be hegeregere infomeisen ta ta.

Reana oi diba vadaeni, lagani 1800 mai kahana lalonai ta ese Morse Code eiava hereva siaia dalana matamatana ia karaia bona unai code idia gaukaralaia taudia be telegraph amo, hereva idia siaia diba. Unai code ena “leta” be rua sibona​—dot bona dash. To, unai leta rua gaukaralaia karana amo sivarai momo idia siaia diba. Unai hegeregerena, DNA lalonai leta 4 eiava code idia noho. Unai leta 4​—A, T, G, bona C​—idia gaukaralaia “hereva ta” eiava codons idia hahedinaraia totona. Bena unai codons idia atodia dalana be “sivarai” bamona, idia be gene. Unai gene ta ta ibounai lalonai leta 27,000 bamona idia noho. Unai gene bona idia huanai idia noho pada idia haboudia bona buka ta ena karoa haida bamona ai idia lao​—idia be chromosome ta ta. Chromosome 23 idia haboua neganai, “buka” ta ai ia lao, unai be idia gwauraia genome bona ia lalonai mauri gauna ta ena infomeisen ibounai idia noho. b

Unai genome tamona be buka bada hereana ta bamona. Unai buka be infomeisen hida ia dogoatao diba? Momokani, taunimanima edia tauanina ena genome be DNA ena vadavada dekenai idia noho moia kau gaudia eiava base pairs be 3 bilioni bamona.¹⁹ Inai oi laloa, encyclopedia buka ena volium ta ta edia rau ibounai be 1,000 idia hanaia. To, taunimanima ta ena genome ena infomeisen be unai buka 428 bamona do ia hahonua diba. Bena sel ta lalonai ia noho genome ena kopi ma ta idia haboua neganai, unai anina be unai genome tamona be buka 856 bamona do ia hahonua diba. Bema oi sibona be genome lalonai ia noho infomeisen ibounai do oi taipia, unai be gaukara bada herea momokani​—oi laga-ani diba lasi​—ela bona lagani 80 idia ore!

To, unai taipia gaukara badana oi karaia be emu tauanina ia durua lasi. Badina, edena bamona unai buka badadia 100 momo be emu 100 trilioni sel maragimaragi ta ta ibounai dekenai do oi atoa diba? Unai ita karaia totona dala be lasi.

Molecular biology bona kompiuta saiens ena profesa ta ia gwau: “DNA ena gram ta ia kaukau neganai ena bada be kiubik sentimita tamona bamona, bona ia lalonai infomeisen be CD [compact disc] 1 trilioni idia hahonua diba.”²⁰ Unai ena anina be dahaka? Inai oi laloatao,  DNA lalonai gene momo idia noho bona tauanina ena kahana ibounai havaraia totona idia be mai edia instraksen. Sel ta ta lalonai inai instraksen idia noho. DNA lalonai infomeisen momo herea idia noho, unai dainai, bema DNA be sipuni maragina ta ai ita hahonua, unai instraksen momo ese hari idia mauri noho taunimanima ibounai edia namba be nega 350 mai kahana idia havaraia diba! Hari inai negai taunimanima 7 bilioni bamona be tanobada ai idia mauri noho, bona idia iboudiai edia DNA be unai sipuni maragina latanai ia noho kahu sisina bamona.²¹

Ena be taunimanima be gau maragidia dekenai infomeisen momo idia atoa diba, to DNA lalonai ia noho palani milioni milioni momo be taunimanima idia karaia gaudia ia hereaia momokani. Compact disc ena haheitalai oi laloa lou: Ena kopina be hairai, bona idia karaia dalana ita hoalaia, bona ita diba aonega taudia ese idia karaia. Unai disc dekenai, infomeisen idia noho​—idia be instraksen maorodia bona unai amo masini ena kahana ta ta ibounai idia karaia, naria bona hanamoa totona. Unai infomeisen ese disc ena metau bona ena bada do ia haidaua lasi, ani? Momokani, unai disc be gau badana lasi, to ia dekenai idia noho infomeisen be mai anina bada. Unai instraksen dainai, do oi laloparara aonega bada tauna ese unai gaukara ia karaia, ani? Toretore be mai ena torea tauna, ani?

Ita daradara lasi, DNA be compact disc eiava buka ida ita hahegeregerea diba. Momokani, genome ena sivarai ia torea buka ta ia gwau: “Genome be buka ta bamona ita haheitalaia sibona lasi. To ia be buka momokanina ta. Kompiuta dekenai buka ta ena infomeisen idia torea diba . . . Genome danu be unai bamona.” Buka torea tauna ma ia gwau: “Genome be mai ena aonega bada bukana, badina dala ia noho neganai sibona ena hereva ia kopi hanai diba bona sibona ena hereva ia duahia diba danu.”²² Unai be DNA ena mai anina bada karana ma ta ia hahedinaraia.

Regerege lasi gabunai oi gini neganai, reana oi laloa sel ena nucleus be regerege lasi danu, miusiam lalonai bamona. Gabeai, miusiam ena kohu ma ta oi itaia. Galasi maua ta lalonai DNA vadavada ena kahana sisina ia noho, bona maua ataiai saini ta ia gwau: “Button oi presia haheitalai oi itaia totona.” Vadaeni, button oi presia bona rekodi dekenai sivarai gwauraia tauna ena hereva oi kamonai, ia gwau: “DNA be mai anina bada gaukara rua ia karaia. Ginigunana be sibona ia vara loulou diba. Ia vara loulou totona, sel lalonai idia noho infomeisen be DNA molekiul matamatadia ai idia kopi hanai. Mani emu kara unai galasi maua dekenai do ia vara gauna oi itaia.”

Unai galasi maua ena kahana ta ena iduara ai, mai ena kahana momo masini ia vareai. Ena toana be roboti ena orea ta bona idia gaukara hebou. Unai masini be DNA dekenai ia lao bona ia kamokau, bena DNA ena vadavada ia gaukaralaia ia be trein ta ena track latanai ia heau lao hegeregerena. Ia heau haraga dainai, oi itaia namonamo diba lasi dahaka ia karaia, to oi itaia ia murinai DNA varo tamona lasi, to DNA varo ena kahana rua idia noho.

Sivarai ia gwauraia tauna ma ia gwau: “Hari, DNA ia kopi hanai dalana sisina ai herevalaia, to ia karaia gaukara momo herea ita hahedinaraia diba lasi. Molekiul edia masini, ladana enzyme be DNA ena vadavada latanai idia lao noho, bona edia gaukara ginigunana be unai DNA be kahana rua dekenai idia hapararaia, idia be varo rua bamona ai idia lao totona. Bena varo tamona idia abia bona idia kopi hanai, DNA vadavada matamatana ta karaia totona. Dala be lasi unai gaukara ibounai ai haheitalaia totona​—hegeregere DNA ena kopi ia karaia masini vairanai ia lao masini maragina ta ese DNA ena kahana ta ia utua sisina, bona unai amo ia giroagiroa diba bona ia kumia auka lasi. Danu ia hahedinaraia diba lasi, nega hida unai masini ese DNA sel ena kopi ia ‘sekea’ namonamo. Momokani, bema DNA matamatadia be mai edia kerere, unai masini be idia itaia bona idia hamaoromaoroa, unai be hoa bada gauna.”​— Rau 16 bona 17 ena diagram itaia.

Sivarai ia gwauraia tauna ma ia gwau: “Ai ese oi dekenai unai masini ena heau haraga ai hahedinaraia diba. Unai roboti oi itaia vadaeni ia heau haraga, ani? Unai enzyme masini be DNA vadavada latanai ia heau lao neganai, moia kau 100 ia hanaia sekeni ta lalonai.²³ Momokani, bema unai DNA vadavada be trein ena ‘track’ hegeregerena, unai enzyme ‘masini’ be hora tamona ai kilomita 80 do ia heau. To, bakteria sel lalodiai, unai kopi hanai masini maragimaragidia edia heau be hora tamona ai kilomita 800 idia heau diba! Taunimanima edia sel lalonai, unai kopi hanai masini handred momo be DNA vadavada (‘track’) latanai idia heau lao bona DNA ena vadavada ena gabu idauidau ai idia gaukara. Idia ese hora 8 lalonai genome bukana ena sivarai ibounai idia kopi hanai.”²⁴ (Rau 20 ena maua “ Idia Duahia Bona Kopi Hanai Diba Ena Molekiul Ta,” itaia.)

DNA idia kopi hanai roboti be unai gabu idia rakatania. Bena enzyme masini ma ta ia mai. Ia danu be DNA vadavada latanai ia lao, to ia heau haraga lasi. Oi itaia DNA vadavada be unai masini lalonai ia vareai, to masini murina kahana amo ia raka-lasi neganai ena toana be ia idau lasi. Unai masini ena kahana ma ta amo varo ta ia raka-lasi noho, ia be varo matamatana ta, iuna latana bamona. Dahaka ia vara noho?

Sivarai ia gwauraia tauna ese anina ia gwauraia: “DNA ena gaukara iharuana be gene sivaraidia ia abia. DNA ese nucleus ena seif gabuna ia rakatania lasi. Vadaeni, DNA ena gene—unai be protein idauidau idia karaia emu tauanina ia mauri noho totona—be edena bamona unai gaukara ia karaia diba? Inai bamona ia karaia, nucleus murimurinai idia noho kemikol ese DNA ena gene ta idia kehoa bona enzyme masini be unai gabu dekenai ia vareai lao. Bena unai masini be RNA (ribonucleic acid) molekiul ta ia gaukaralaia, unai gene sivaraidia ia abia totona. RNA ena toana be DNA ena varo ta bamona, to ia be idau. Iena gaukara be gene edia sivarai herevadia ia abia. RNA be enzyme masini lalonai ia do noho neganai, unai sivarai ia abia, bena murinai nucleus ia rakatania bona ia abia sivarai herevadia be ribosome ta dekenai ia henia protein ta ia karaia totona.”

Unai masini ruaosi edia gaukara oi itaia noho lalonai, oi hoa bada. Inai miusiam bamona gabuna oi itaia neganai, oi hoa bada bona oi diba unai masini idia palania bona karaia taudia edia aonega be bada. Inai oi laloa, taunimanima ena sel lalodiai gau idauidau tausen momo be nega tamona ai idia gaukara, unai be hegeregere miusiam dekenai masini iboudiai be nega tamona ai idia gaukara hebou! Unai be hoa gauna momokanina, ani?

Oi laloparara, hari emu tauanina lalonai 100 trilioni sel ta ta lalonai masini idauidau maragimaragi mai edia kahana momo be unai gaukara momo idia karaia! Emu DNA idia duahia, bena instraksen idia henia, unai amo emu tauanina dekenai protein idauidau handred tausen momo idia karaia​—idia be enzymes, tissues, organs, bona gau ma haida. Hari emu DNA idia kopi hanai bona idia sekea noho gau ta ia kerere garina, bena murinai emu sel matamata ta ta ibounai be mai edia instraksen matamatadia, do idia kopi hanai namonamo diba totona.

Sibona ita henanadai lou, ‘Edena gabu amo unai instraksen idia mai?’ Baibel ese ia hahedinaraia unai “buka” ena Toretore Tauna be mai ena aonega bada herea bona taunimanima edia aonega ia hereaia. Oi laloa unai be idaunegai lalohadai sibona eiava saiens ese ia hamomokania gaudia lasi, a?

Inai oi laloa: Taunimanima ese unai bamona miusiam idia haginia diba, a? Bema idia karaia toho, hekwakwanai momo herea do idia davaria. Guna amo ema bona hari, taunimanima edia genome bona ena gaukara dalana idia do diba namonamo lasi. Saiens taudia idia ura diba gene be edeseni idia noho bona edia gaukara be dahaka. Bona gene be DNA vadavada ena kahana maragidia haida sibona dekenai idia noho. To, ena kahana latadia ai dahaka dainai gene idia noho lasi? Guna, saiens taudia idia gwau unai be DNA ena momoru. To hari, edia lalohadai idia haidaua sisina. Bona idia gwau, unai kahadia ese gene ena heau dalana bona gaukara karaia dalana ena hetoana ia biagua. Bema saiens taudia ese DNA ena model ta do idia karaia bona ena sivarai idia kopi hanai bona ‘sekea’ masini idia karaia danu, vadaeni, idia ese DNA korikorina ena gaukara dalana idia karaia diba, a?

Ladana bada saiens tauna, Richard Feynman be kahirakahira ia mase neganai blakbod ai inai hereva ia torea: “Lau havaraia diba lasi gauna, lau lalopararalaia diba lasi.”²⁵ Ita moale ena hereva dainai badina ia hedinarai ia be manau tauna, bona ena hereva DNA dekenai be maoro. Saiens taudia be hegeregere lasi DNA ena masini rua edia gaukara, hegeregere sel havaraia loulou bona gene sivaraidia abia gaukarana, idia havaraia totona; bona DNA ia gaukara dalana idia diba namonamo lasi. To, idia haida idia gwau noho, idia diba unai gaudia ibounai idia vara kava. Hamomokania gaudia ese unai lalohadai ia durua, a?

Aonega bada taudia haida edia lalohadai be, hamomokania gaudia ese gau ma ta idia hahedinaraia. Hegeregere, saiens tauna Francis Crick be DNA ena toana be vadavada bamona (double-helix) idia dibaia totona ia durua danu, bona ia gwau unai molekiul ena aonega palani ia vara kava diba lasi. Ia laloa grup ta ese speis amo DNA ia siaia tanobada dekenai, mauri gaudia idia havaraia totona.²⁶

Vanegai sibona, aonega tauna ladana Antony Flew be lagani 50 lalonai ia laloa Dirava ia noho lasi, to gabeai ena lalohadai ia haidaua. Ena mauri lagani be 81 neganai, ia abia dae aonega bada tauna ena gaukara amo mauri ia vara matamaia. Dahaka dainai ena lalohadai ia haidaua? DNA ia stadilaia dainai. Haida idia nanadaia, ena lalohadai matamatana dainai, reana saiens taudia do idia moale lasi, to Flew ia haere: “Unai be herevana. Egu mauri ibounai lalonai . . . hamomokania gaudia lau tahudia, bona unai gaudia ese lau idia hakaua.”²⁷

Dahaka oi laloa? Hamomokania gaudia ese dahaka idia hahedinaraia? Inai haheitalai oi laloa, faktori ta lalonai oi ese kompiuta daiutuna ta oi davaria. Unai kompiuta ena program badana amo faktori ena gaukara ibounai ia karaia noho. Ma danu, unai program ese hanaihanai instraksen ia siaia idia noho masini ibounai karaia bona hanamoa totona. Bona unai program be sibona ia kopi hanai diba, bena murinai unai kopi ma haida ia sekea namonamo danu. Bema unai gaudia oi hamomokanidia diba, dahaka do oi laloa? Oi laloa unai kompiuta bona ena program be sibona idia vara kava, eiava aonega bada taudia edia palani dainai idia vara? Hamomokania gaudia ese unai idia haerelaia.