Saiens taudia momo edia hereva be dahaka? Evolusen ena hahediba herevadia idia abia dae taudia momo do idia gwau, lagani bilioni momo gunanai, mauri be idaunegai gohuna ta eiava davara ena dobu gabuna ai ia noho gau maragina ta amo ia matamaia. Idia laloa unai bamona gabudia haida ai, kemikol be sibodia idia haboua bubble grup ta ta bamona, unai amo sel lalonai idia noho gau maragimaragidia ladana molekiul idia vara bona sibodia idia vara loulou. Idia abia dae tanobada ena mauri gaudia ibounai be unai sel ginigunana eiava ma haida amo idia vara matamaia.

Evolusen idia abia dae saiens taudia ma haida be unai lalohadai idia abia dae lasi. To idia laloa sel ginigunadia haida eiava edia kahana maragimaragi haida be guba (outer space) amo idia diho mai tanobada dekenai. Dahaka dainai? Badina ena be saiens taudia ese tahua gaukara momo idia karaia, to mauri be molekiul amo sibona ia vara ena hamomokania gauna ta idia davaria lasi. Lagani 2008 ai, Biology ena profesa Alexandre Meinesz ese unai hekwakwanai ia herevalaia.  Ia gwau idia hanaia lagani 50 lalodiai, “tanobada ai mauri gaudia be molekiul soup amo idia vara ena hamomokania gauna ta idia davaria lasi, danu ema bona hari saiens ese mauri be molekiul momo amo ia vara matamaia kava karana idia do hamomokania lasi.”¹

Hamomokania gaudia ese dahaka idia hahedinaraia? Inai henanadai, ‘Beibi be edeseni amo idia mai?’ ena haere be taunimanima momo idia diba, bona idia daradara lasi. Idia diba vadaeni, mauri gaudia sibona amo mauri matamata idia vara diba. To, bema idaunegai idia vara gaudia ita laloa lou, momokani mauri be idia mauri lasi kemikol amo idia vara kava diba be maoro, a? Unai hereva ita abia dae be maoro, a?

Tahua gaukara karaia taudia idia dibaia gauna be sel ta do ia mauri noho totona, complex molekiul idauidau toi do idia gaukara hebou be namo​—DNA (deoxyribonucleic acid), RNA (ribonucleic acid), bona protein idauidau. Hari inai negai, saiens taudia haida idia gwau ia mauri vadaeni sel ta be mauri lasi kemikol idauidau amo do ia vara kava diba. To, RNA eiava protein haida do idia vara kava diba, a? a

Lagani 1953 ai idia karaia eksperimen ta dainai saiens taudia momo idia laloa reana mauri do ia vara kava diba. Unai lagani ai, Stanley L. Miller ese amino acid ia karaia totona elektrisiti be gas idauidau dekenai ia halasia, unai kemikol amo protein idia karaia diba. Haida idia laloa unai gasi be tanobada ena hodahoda lalonai idia noho. Unai nega ai danu, amino acid haida be meteorite nadi ta dekenai idia davaria. Unai gaudia ese idia hahedinaraia mauri gaudia be idia vara kava diba, a?

New York University ena ritaia kemistri profesa ta Robert Shapiro, ia gwau: “Toretore taudia haida idia laloa mauri havaraia gaudia edia kahana iboudiai be meteorite lalodiai idia noho, bona do idia haboudia be auka lasi Miller ena eksperimen bamona. To unai be maoro lasi.”² b

RNA molekiul mani ita laloa. Ia be molekiul maragimaragidia haida amo ia vara, edia ladana be nucleotide. Nucleotide molekiul be idau, bona amino acid molekiul ida ia hegeregere lasi. Shapiro ia gwau, “nucleotide be elektrisiti ena siahu amo idia karaia eksperimen amo idia vara lasi, bona meteorite nadi lalodiai idia davaria lasi danu.”³ Ma ia gwau, RNA molekiul be kemikol sibona amo ia vara loulou kava karana be “reana ia vara lasi, badina bema iunives dekenai unai RNA molekiul tamona oi tahua, reana do oi davaria diba lasi.”⁴

Protein molekiul be edena bamona? Idia be amino acid 50 eiava tausen haida amo idia haboua diba, bona mai edia oda korikorina. Sel tamona lalonai protein molekiul ta be mai ena amino acid 200 idia noho. Unai sel be mai edia protein molekiul idauidau tausen momo idia noho. To bema Protein molekiul tamona lalonai amino acid 100 sibona idia noho, reana do ia vara kava diba lasi, badina unai be hegeregere milioni bilioni gaudia lalodiai gau tamona sibona do oi tahua bamona.

Evolusen ena hahediba ia abia dae tauna Hubert P. Yockey, ia gwau: “Bema ‘protein molekiul sibodia idia noho guna,’ dala be lasi mauri gaudia iboudiai idia vara totona.’ ”⁵ Protein molekiul karaia totona RNA ia noho be gau badana, bona RNA karaia totona, protein molekiul danu idia gaukara hebou. Reana do ia vara lasi, to bema protein bona RNA molekiul be gabu tamona bona nega tamona ai idia noho kava be edena bamona? Edena bamona do idia gaukara hebou sibodia idia vara loulou, unai amo idia mauri noho totona? Dr. Carol Cleland c, National Aeronautics and Space Administration’s Astrobiology Institute ena memba ta, ia gwau, “reana dala be lasi (protein bona RNA be sibodia mauri gaudia edia molekiul idauidau momo) idia karaia kava totona.” Bona ma ia gwau, “to, saiens taudia momo idia laloa bema protein bona RNA be sibodia edia hamatamaia dalana korikorina idia dibaia neganai, ruaosi edia gaukara hebou karana do idia diba danu.” Hari, haida edia lalohadai mauri edia kahana maragimaragi idia vara kava dalana ia herevalaia neganai, unai hahine ia gwau: “Idia ta ese edena dala amo unai ia vara idia hamomokania diba lasi.”⁶

Dahaka dainai momokani gaudia ita diba be namo? Unai saiens taudia idia laloa mauri gaudia be idia vara kava, to idia karaia gaukara mani ita laloa. Idia ese amino acid haida be idia mauri sel lalodiai idia davaria. Edia laboratori ai, idia ese eksperimen idia hegaegaelaia namonamo bona molekiul idaudia idia karaia. Idia ura gabeai sel ena mauri kahana iboudiai do idia karaia. Unai be hegeregere saiens tauna ta be tano bona hodahoda amo oxygen, iron bona gasi ia abia, bona auri, plastic, silicone, bona wire ai ia halaoa, bona unai gaudia amo roboti ta ia karaia. Bena unai roboti lalonai program ia atoa unai amo unai roboti sibona ese roboti ma haida ia karaia diba. Unai kara amo dahaka ia ura hamomokania? Do ia hamomokania gauna be, aonega tauna ta sibona ese masini namona ta ia karaia diba.

Unai hegeregerena, bema saiens taudia ese sel ta do idia karaia diba, unai be hoa gauna momokanina. To unai amo idia hamomokania sel be sibona ia vara kava, a? Lasi.

Dahaka oi laloa? Ia mai bona hari, saiens ena diba ibounai ese ia hahedinaraia, ia noho vadaeni mauri gauna sibona amo, mauri gauna ma ta ia vara diba. Bema ta ia abia dae ia mauri sel be mauri lasi kemikol amo ia vara kava diba, unai hamomokania dalana ta be lasi.

Unai gaudia oi diba dainai, oi ura unai hahediba herevana oi abia dae, a? Unai henanadai oi do haerelaia lasi neganai, namona be sel ia vara dalana oi tahua namonamo. Unai ese oi do ia durua bona do oi diba saiens taudia haida edia lalohadai, mauri be edeseni amo ia mai be ia maoro eiava lasi. Danu, edia lalohadai be hegeregere tama sina ese edia natudia dekenai gori sivaraina ta idia gwauraia bamona, beibi be edeseni amo idia mai idia herevalaia totona.