Saiens taudia momo be dahaka idia gwau? Idia momo idia abia dae fossil haboua gaukarana ese ia hamomokania, mauri gaudia be gau tamona amo idia vara. Danu, idia gwau mauri gaudia iboudiai be mai edia DNA eiava “kompiuta program” dainai, unai ena anina be, idia iboudiai be gau tamona amo idia vara.

Baibel be dahaka ia gwau? Genese buka lalonai ia gwau, tubutubu gaudia, davara ena mauri gaudia, tanobada ena animal, bona idia roho gaudia be “edia orea ta ta hegeregerena” idia vara. (Genese 1:​12, 20-​25) Unai ese ia hahedinaraia, ena be edia “orea” ta ta hegeregerena idia vara, to unai orea be ta ta amo idia idau, to orea idaudia ai idia lao diba lasi. Danu, Baibel ese havaraia gaudia ia herevalaia ena sivarai hegeregerena mauri gaudia matamatadia be fossil ai idia hedinarai, bona edia toana iboudiai idia noho.

Hamomokania gaudia ese dahaka idia hahedinaraia? Hamomokania gaudia ese Baibel ena sivarai ia durua, a? Eiava Darwin ena lalohadai be ia maoro, a? Idia hanaia lagani 150 lalodiai, idia davaria gaudia ese dahaka idia hahedinaraia?

Hari inai nega lalonai, saiens taudia ese mai edia sel tamona mauri gaudia idauidau momo bona tubutubu gaudia bona animal danu edia DNA program idauidau idia hahegeregeredia. Unai dainai idia laloa, Darwin ena “mauri auna” hegeregerena, mauri idia matamaia ena lalohadai idia hamomokania diba. To, ema bona hari unai idia hamomokania diba lasi.

Edia stadi amo dahaka ita dibaia? Lagani 1999 ai, biologist tauna, Malcolm S. Gordon ese inai ia torea: “Reana gau idauidau amo mauri gaudia idia vara matamaia. Mauri gaudia iboudiai edia orea idauidau be mauri auna ena ramuna tamona amo idia vara diba lasi.” Darwin ia abia dae lalohadaina be mai ena hamomokania gaudia, a? Gordon ma ia gwau: “Hari ita diba mauri gaudia edia orea ta ta lalodiai, unai idaunegai ena hahediba ena hamomokania gaudia be lasi. Bona reana unai phyla oreadia momo, eiava ibounai lalonai, hamomokania gauna ta be lasi danu.”²⁹ a

Hari, edia stadi amo idia ese Darwin ena hahediba—mauri gaudia be gau tamona amo idia vara—idia hamomokania diba lasi. Hegeregere, lagani 2009 ai, magasin ta ladana New Scientist lalonai, evolusen ia abia dae saiens tauna, Eric Bapteste ena hereva idia torea, ia gwau: “Hamomokania gaudia ese unai mauri auna ena sivarai idia hamomokania diba lasi.”³⁰ Unai magasin ese evolusen ia abia dae biologist tauna Michael Rose ena hereva danu idia torea, ia gwau: “Hari, unai mauri auna ena hahediba herevana ai abia dae lasi, badina ai diba unai lalohadai be maoro lasi. Ena be momo idia ura lasi, to iseda lalohadai iboudiai biology dekenai do ita haidaua be namo.”³¹ b

Saiens taudia momo idia gwau, fossil haboudia gaukarana ese ia hahedinaraia mauri gaudia be gau tamona amo idia vara matamaia. Hegeregere idia gwau, idaunegai fossil idia stadilaia neganai, ia hedinarai gwarume be amphibians ai idia lao, bona reptile be mammal ai idia lao. To, hamomokania gaudia ese dahaka idia hahedinaraia?

Evolusen ia abia dae paleontologist tauna, David M. Raup ia gwau, “mauri gaudia be metairametaira idia idau idia lao lasi, Darwin ena negai bona hari inai nega geologist taudia ese unai idia diba vadaeni. Momokani unai mauri gaudia ta ta idia hedinarai haraga, bona idia idau idia lao lasi, bona murinai idia ore.”³²

Momokani, lagani momo lalodiai fossil idauidau idia stadilaia, bena unai amo idia diba mauri gaudia edia orea ta ta edia toana idia idau idia lao lasi. Hamomokania gaudia ese idia hahedinaraia vadaeni, animal ta be animal idauna ta ai ia lao ena hahediba be ia momokani lasi. Unai animal oreadia ta ta edia toadia idauidau be idia vara neganai mai edia palani namodia. Haheitalai, mariboi be mai edia sonar bona echolocation idia gaukaralaia idia roho neganai, to guna idia bamona mauri gauna ta ia noho lasi.

Fossil haboua gaukarana amo, ia hedinarai namonamo, animal ta ta edia orea badadia momo be nega kwadogi lalonai idia hedinarai. Mauri gaudia matamatadia bona idauidau momo be fossil toadia ai idia hedinarai dainai, paleontologist taudia ese unai nega idia gwauraia “Cambrian explosion.” Unai Cambrian negana be edena negai ia matamaia?

Namona be saiens taudia idia gwauraia maoro gaudia ita laloa inai. Bona rau henunai ia noho laulau oi itaia. Inai haheitalai lalonai, soka gadara gabuna ena lata be 100 mita bamona. Unai laulau ena kahana (1). be tanobada ia matamaia negana ia laulaulaia bona ena kahana (2). Unai nega kwadogi lalonai, fossil ena rekodi ai animal badadia idauidau be edena bamona idia hedinarai haraga? Soka gadara gabuna dekenai oi raka diho lalonai, step ta ta oi abia neganai unai animal ta ta idia hedinarai!

Unai nega kwadogi lalonai, mauri gaudia idauidau idia hedinarai haraga dainai, evolusen idia stadilaia saiens taudia haida ese Darwin ena hahediba idia do daradaralaia. Hegeregere, lagani 2008 ai, intaviu lalonai, evolusen ena hahediba ia abia dae bona stadilaia (biologist) tauna Stuart Newman ia gwau, namona be evolusen hamomokania totona, taunimanima be evolusen ena hahediba matamatana ta idia tahua be gau badana, badina unai amo mauri gaudia toadia idauidau idia hedinarai haraga dalana do idia diba. Ia gwau: “Darwin ena hahediba be, mauri gaudia iboudiai be metairametaira idia idau idia lao, to mauri gaudia edia orea badadia edia toadia be idia idauidau (macroevolution) ita diba namonamo murinai, lau laloa reana Darwin ena hahediba be gau badana lasi.”³³

To, edena fossil idia gaukaralaia unai amo idia hahedinaraia gwarume ia senisi bona amphibian ai idia lao, bona reptile animal be idia senisi bona mammal animal ai idia lao? Fossil ese evolusen herevana ia hamomokania eiava lasi? Unai gaudia ita laloa neganai, hekwakwanai haida ia noho.

Hekwakwanai ginigunana be, nega haida sikuli buka lalonai, animal edia laulau idia haidaua bona reptile ena toana be mammal ena toana ai idia lao, to edia bada idia haheitalaia maoromaoro lasi. Animal haida be bada herea, bona ma haida be idia maragi.

Hekwakwanai iharuana be, unai animal fossil ese idia hamomokania diba lasi idia be orea tamona ai idia vara. Fossil idia gaukaralaia dalana amo, ia hedinarai lasi unai fossil ta ta edia huanai reana lagani milioni momo bamona idia hanaia. Animal ia stadilaia (Zoologist) tauna Henry Gee ese unai fossil momo idia parara laganidia ia herevalaia neganai, ia gwau: “Unai idaunegai fossil ta ta edia noho mauri negadia bona edia nega padana be bada herea dainai, idia be edena orea amo idia idau ai idia lao be ai hamomokania diba lasi.”³⁴ c

Biologist tauna Malcolm S. Gordon ese gwarume bona amphibian edia fossil ia herevalaia neganai, ia gwau unai fossil edia namba be momo lasi, bona “unai fossil ese idaunegai mauri gaudia edia toana idauidau ia hahedinaraia namonamo lasi.” Ma ia gwau: “Ita diba lasi edena dala ai unai idaunegai mauri gaudia be gabeai do idia vara mauri gaudia ida do idia hegeregere eiava lasi.”³⁵ d

Lagani 2004 ai, National Geographic ena atikol ta lalonai idia halasia herevana ta ese fossil haboua gaukarana ia haheitalaia, ia be “muvi piksa bamona, to unai muvi ena laulau 1,000 amo, laulau tamona sibona oi itaia diba badina laulau 999 idia negedia.”³⁶ Unai haheitalai ena anina oi laloa.

Mani, inai haheitalai ma ta oi laloa, bema muvi piksa ta oi ura itaia, to unai piksa ena laulau 100,000 amo, laulau 100 sibona oi itaia diba, oi be edena bamona unai muvi ena sivarai korikorina do oi lalopararalaia diba? Danu, bema unai piksa ena laulau 100 amo 5 sibona oi itaia diba, unai piksa ena laulau 5 amo reana sivarai ta do oi karaia diba, to ia be unai muvi ena sivarai korikorina lasi. Momokani, unai muvi ena sivarai oi diba totona, namona be laulau iboudiai oi itaia be gau badana, ani?

Unai muvi piksa ena haheitalai bona evolusen idia abia dae taudia edia lalohadai fossil haboua gaukarana dekenai be edena bamona ita hahegeregerea diba? Lagani momo lalodiai, fossil idia stadilaia taudia idia hahedinaraia lasi, idaunegai idia mauri fossil momo herea—muvi ena laulau 95 unai—be nega daudau lalonai edia toana be sisina sibona idia idau. Dahaka dainai unai mai anina bada hamomokania gauna idia hunia? Badina reana idia ura henia sivaraina idia tahua toho, buka torea tauna, Richard Morris ia gwau: “Paleontologist taudia be evolusen ena hahediba, unai be mauri gaudia be metairametaira idia idau idia lao be idia dogoatao noho, ena be idia diba vadaeni hamomokania gaudia ese unai idia hahedinaraia lasi. Unai fossil idia stadilaia badina idia ura saiens taudia gunadia edia lalohadai evolusen dekenai idia hamomokania toho.”³⁷

Hari inai negai, evolusen ena hahediba idia abia dae taudia edia lalohadai be dahaka? Reana idia laloa fossil ta ta edia mauri negadia bona edia orea ta ta idauidau idia vara dalana be gau korikoridia ese idia hamomokania be gau badana lasi, to idia dekenai gau badana be evolusen ena hahediba idia abia dae taudia edia lalohadai idia ura hamomokania, ani? e

Dahaka oi laloa? Hamomokania gaudia amo edena be maoro? Namona be ita gwauraia vadaeni hamomokania herevadia ita lalodia lou.

• Tanobada dekenai mauri ginigunadia edia kahana idauidau be momo herea.

• Ia hedinarai namonamo vadaeni, sel ena kahana idauidau momo be idia vara kava diba lasi.

• DNA be sel ena “kompiuta program” eiava instraksen bona ena kahana be momo herea. Unai hamomokania gaudia ita itaia neganai, ita diba aonega bada tauna ese unai ia havaraia bona taunimanima ese idia karaia gaudia ia hereaia vaitani.

• Taunimanima ese animal edia orea ta ta idauidau idia stadilaia neganai, ia hahedinaraia mauri gaudia iboudiai be gau tamona sibona amo idia vara lasi. Ma danu, fossil haboua gaukarana amo animal orea badadia idauidau ta ta be idia hedinarai haraga.

Unai hamomokania herevadia dainai, oi laloa Baibel ese mauri ia matamaia dalana ia herevalaia karana be maoro, a? To, taunimanima momo idia gwau, saiens ese mauri ia vara ia gwauraia dalana be Baibel ena hereva amo ia idau. Unai be momokani, eiava? Baibel ena hereva be dahaka?