LESENI 19
Iehova Ena Witnes Taudia be Keristani Korikoridia, A?
Ai Iehova ena Witnes taudia ai abia dae ai be Keristani korikoridia. Dahaka dainai? Badina ai abia dae gaudia bona ai abia ladana dainai ai be idau, bona ta ta ai lalokau henia.
1. Iehova ena Witnes taudia idia abia dae gaudia be dahaka amo?
Iesu ia gwau: “[Dirava ena] hereva be momokani.” (Ioane 17:17) Iesu hegeregerena, Iehova ena Witnes taudia be hanaihanai idia abia dae gaudia be Dirava ena Hereva hegeregerena. Hegeregere, Iehova ena Witnes taudia edia histori lalonai, guna idia gwauraia Bible Student taudia mani oi laloa. Lagani 1870 bamona ai, Bible Student orea ta be Baibel ena hereva ia tahua namonamo matamaia. Idia abia dae gaudia be Baibel ida idia hahegeregerea, ena be unai gaudia be dubu ena hahediba herevadia amo idia idau. Bena idia dibaia Baibel ena hereva momokanidia be ma haida dekenai idia hadibaia matamaia. a
2. Dahaka dainai ai gwau ai be Iehova ena Witnes taudia?
Iehova ese ia idia tomadiho henia taudia ia gwauraia iena witnes taudia, badina idia ese ia idia gwauraia hedinarai. (Heberu 11:4–12:1) Hegeregere idaunegai, Dirava ese ena taunimanima ia hamaoroa: “Umui be egu hereva hamomokania taudia.” (Isaia 43:10 duahia.) Iesu idia gwauraia “Hereva Hamomokania Tauna mai Ena Kamonai.” (Apokalupo 1:5) Unai dainai lagani 1931 ai, inai ladana Iehova Ena Witnes Taudia ai abia. Unai ladana ai abia dainai ai moale bada.
3. Edena dala ai Iehova ena Witnes taudia ese Iesu ena lalokau idia tohotohoa?
Iesu ese ena hahediba taudia ia lalokau henidia bada dainai ena famili bamona ia kara henidia. (Mareko 3:35 duahia.) Unai hegeregerena, tanobada ibounai ai Iehova ena Witnes taudia be ruma bese badana ta bamona mai lalotamona ida idia noho. Unai dainai ta ta ai gwauraia tadikaka bona taihu. (Filemona 1, 2) Danu inai hahegani ai badinaia: “Tadikaka oreana ibounai umui lalokau henia.” (1 Petero 2:17) Iehova ena Witnes taudia ese dala idauidau ai unai lalokau idia hahedinaraia, hegeregere tanobada ibounai ai emai tadikaka taihu be heduru idia ura neganai idia ai durua.
DIBA MA HAIDA ABIA
Iehova ena Witnes taudia edia sivarai oi stadilaia, bona hamomokania gaudia ma haida amo do oi diba ai be Keristani korikoridia.
Keristani korikoridia ese idia abia dae gaudia be Baibel amo bona ma haida ida unai idia herevalaia
4. Ai be Baibel ia herevalaia gaudia ai abia dae
Iehova ia peroveta, Baibel ena hereva momokani lalopararalaia karana do ia hedinarai namonamo. Daniela 12:4 duahia, bena inai henanadai herevalaia:
-
Dirava ena taunimanima ese Baibel idia tahua namonamo lalonai, dahaka be “do ia bada herea”?
Bible Student taudia, idia ta ena ladana be Charles Russell, ese Dirava ena Hereva idia stadilaia dalana oi itaia. VIDIO itaia, bona henanadai herevalaia.
-
Vidio ai, edena dala ai Charles Russell bona ia idia bamoa Bible Student taudia ese Baibel idia stadilaia?
Inai oi diba, a?
Nega haida, ai abia dae gaudia haida ai haidaua. Dahaka dainai? Dina ia daekau karana ese metairametaira gabu ia hadiaria hegeregerena, Dirava ese taunimanima ia durua metairametaira ena Hereva idia lalopararalaia totona. (Aonega Herevadia 4:18 duahia.) Unai dainai ena be Baibel ena hereva ia idau lasi, to ai lalopararalaia namonamo neganai, ai abia dae gaudia ai haidaua.
5. Iehova ena sivarai momokanina ai harorolaia
Dahaka dainai inai ladana Iehova ena Witnes taudia ai abia? VIDIO itaia, bona henanadai herevalaia.
-
Dahaka dainai inai ladana Iehova ena Witnes taudia be ladana maorona?
Dahaka dainai Iehova ese taunimanima ia abia hidi iena witnes taudia ai idia lao totona? Unai amo do idia hahedinaraia ia be Dirava momokanina, badina momo ese ia idia sivarailaia koikoi. Mani unai hereva koikoidia rua oi laloa.
Tomadiho haida ese edia dubu taudia idia hadibaia Dirava ia ura edia tomadiho lalonai kaivakuku do idia gaukaralaia. To Levitiko 26:1 duahia, bena inai henanadai herevalaia:
-
Hereva momokani be dahaka? Iehova ese kaivakuku be edena bamona ia lalodia?
Tomadiho gunalaia taudia haida idia hadibaia, Iesu be Dirava. To Ioane 20:17 duahia, bena inai henanadai herevalaia:
-
Hereva momokani be dahaka? Dirava bona Iesu be seim tauna, a?
-
Hari oi diba Iehova ese ena Witnes taudia ia siaidia ia bona ena Natuna edia sivarai momokanidia idia harorolaia dainai, emu hemami be edena bamona?
6. Ta ta ai lalokau henia
Baibel ese Keristani taudia be tauanina ena kahana ta ta ida ia hahegeregerea. Korinto Ginigunana 12:25, 26 duahia, bena inai henanadai herevalaia:
-
Keristani korikoridia be dahaka do idia karaia bema Keristani taudia haida be hisihisi idia davaria?
-
Iehova ena Witnes taudia ese idia hahedinaraia lalokau karana amo dahaka oi dibaia?
Tanobada ena kahana ma ta dekenai Iehova ena Witnes taudia ese hisihisi idia davaria neganai, edia Witnes turadia tanobada ibounai dekenai be karaharaga heduru idia henia. Haheitalai ta oi itaia totona, VIDIO itaia. Bena henanadai herevalaia.
-
Iehova ena Witnes taudia ese disasta negadiai idia henia heduru ese edena dala ai lalokau ia hahedinaraia?
Keristani korikoridia ese heduru idia ura taudia dekenai lalokau idia hahedinaraia
HAIDA IDIA GWAU: “Iehova ena Witnes be tomadiho matamata ta sibona.”
-
Edena nega amo Iehova ese ia idia tomadiho henia taudia ia gwauraia witnes taudia?
POINT BADANA
Iehova ena Witnes taudia be Keristani korikoridia. Tanobada ibounai dekenai ai be ruma bese badana ta bamona ai tomadiho, danu ai abia dae gaudia be Baibel amo bona Iehova ena hereva momokani ai harorolaia.
Riviu
-
Dahaka dainai inai ladana, Iehova Ena Witnes Taudia ai abia?
-
Edena dala ai ta ta ai kara henia?
-
Oi laloa Iehova ena Witnes taudia be Keristani korikoridia, a?
REFERENS ITAIA
Emai histori totona diba ma haida abia.
Iehova Ena Witnes Taudia—Abidadama Idia Hahedinaraia, Kahana 1: Dibura amo Idia Raka-Lasi (1:00:53)
Haheitalai ta oi itaia, edena dala ai Iehova ena Witnes taudia ese tomadiho edia hahediba hereva koikoidia idia hahedinaraia.
Iehova ena Witnes taudia totona oi laloa henanadai edia haere oi abia.
“Momo Edia Henanadai Iehova Ena Witnes Taudia Dekenai” (websait ena kahana ta)
Stephen be bese idau taudia ia inai henia dainai ia dagedage henidia. Iehova ena Witnes taudia dekenai ia itaia gaudia ese iena mauri ia haidaua dalana oi itaia.
“Egu Mauri be Ia Dika Momokani” (Gima Kohorona, October 1, 2015)
a Lagani 1879 amo, Baibel ena hereva hahedinaraia totona Iehova ena taunimanima ese Gima Kohorona magasin idia halasia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
