LESENI 37
Baibel Ena Hereva Gaukara Bona Moni Dekenai
Gaukara o moni laloa momo karana dainai oi lalomanoka, a? Momokani, ita sibona totona eda dabu gaudia abia, bona danu, mai kudouna ibounai ida Iehova hesiai henia totona be mai ena hekwarahi. To Baibel ai idia noho sisiba namodia ese ita ia durua diba.
1. Baibel ese gaukara be edena bamona ia herevalaia?
Dirava ia ura iseda gaukara ita moalelaia. Baibel ia gwau, “namona be tau ta [ese] . . . iena hekwarahi amo ia abia gaudia do ia moalelaia.” (Hadibaia Tauna 2:24) Iehova be gaukara goada tauna. Ia ita tohotohoa bona gaukara ita karaia namonamo neganai, ia ita hamoalea bona do ita moale danu.
Gaukara be mai anina bada. To gaukara ese Iehova ita tomadiho henia karana ia koua lasi be namo. (Ioane 6:27) Dirava ia gwauhamata ia hesiai henia gaukarana ita laloa bada neganai, iseda mauri durua gaudia do ia henia.
2. Moni dekenai lalohadai maorona be dahaka?
Baibel ai “moni ese [ita] ia gimaia” ia herevalaia, to danu ita ia sisiba henia, moni sibona ese ita do ia hamoalea lasi. (Hadibaia Tauna 7:12) Danu, Baibel ese ita ia hagoadaia moni ita ura henia dikadika lasi to inai do ita laloa, “ita dekenai idia noho gaudia be hegeregere.” (Heberu 13:5 duahia.) Unai bamona lalohadai ita abia neganai, gau momo totona do ita lalohekwarahi lasi. Abitorehai karana do ita dadaraia. (Aonega Herevadia 22:7) Bona moni gadara idauidau do ita karaia lasi bona moni momo abia haraga ena bisinesi karadia lalonai do ita vareai lasi.
3. Edena dala ai moni ita gaukaralaia namonamo diba?
Iehova be hariharibada Diravana, bona ‘hariharibada karana ita hahedinaraia bona ita dekenai idia noho gaudia ita haria’ neganai, Ia do ita tohotohoa. (1 Timoteo 6:18) Iseda moni ita gaukaralaia namonamo diba, iseda kongrigeisen bona idia dabu taudia haida hegeregere; iseda tadikaka taihu ita durua totona. Iehova be ita henia moni ena bada ia laloa lasi, to iseda henia karana ena badina ia laloa bada. Ita ese mai kudouna ibounai ida hariharibada karana ita hahedinaraia neganai, do ita moale bona Iehova do ia moale danu.—Kara 20:35 duahia.
DIBA MA HAIDA ABIA
Moni gaukara dekenai lalohadai maorona abia bona gau momo tahua lasi karana ena namo itaia.
4. Emu gaukara dalana amo Iehova oi hanamoa
Namona be iseda hetura karana Iehova ida ese ita ia durua, gaukara gabuna dekenai kara namodia ita hahedinaraia totona. VIDIO itaia, bona henanadai herevalaia.
-
Vidio oi itaia neganai, gaukara gabunai Jason ena hereva bona kara dekenai dahaka oi moalelaia?
-
Dahaka ia karaia dainai moni gaukara be ena gabu maorona ai ia atoa?
Kolose 3:23, 24 duahia, bena inai henanadai herevalaia:
-
Dahaka dainai gaukara gabuna ai iseda kara be mai anina bada?
Gaukara be mai anina bada. To gaukara ese Iehova ita tomadiho henia karana ia koua lasi be namo
5. Gau momo tahua lasi karana be mai ena namo
Taunimanima idia ura moni momo idia abia. To Baibel ena hagoadaia hereva be idau. Timoteo Iharuana 6:6-8 duahia, bena inai henanadai herevalaia:
-
Baibel ese ita ia hagoadaia dahaka ita karaia totona?
Ena be ita abia gaudia be sisina sibona, to ita moale diba. VIDIO itaia, bona henanadai herevalaia.
-
Ena be inai famili ta ta ese idia abia moni be sisina sibona, to dahaka ese idia ia hamoalea?
Bema ita dekenai idia noho gaudia be hegeregere, to gau ma haida ita do ura henia noho be edena bamona? Iesu ese haheitalai ta amo unai ena dika ia herevalaia. Luka 12:15-21 duahia, bena inai henanadai herevalaia:
-
Iesu ena haheitalai amo dahaka oi dibaia?—Siri 15 itaia.
Aonega Herevadia 10:22 bona 1 Timoteo 6:10 duahia bona hahegeregerea. Bena inai henanadai herevalaia:
-
Oi laloa dahaka be mai anina bada? Iehova tura henia karana, eiava moni momo abia karana? Dahaka dainai?
-
Moni momo ura henia karana ese dahaka hekwakwanai ia havaraia?
6. Iehova ese ita do ia durua
Gaukara bona moni ena hekwakwanai ese Iehova ita abidadama henia karana ia tohoa diba. VIDIO itaia abidadama idia tohoa gaudia hanaia dalana oi dibaia, bona henanadai herevalaia.
-
Vidio ai, tadikaka ese dahaka hekwakwanai ia davaria?
-
Dahaka ia karaia dainai unai hekwakwanai ia hanaia diba?
Mataio 6:25-34 duahia, bena inai henanadai herevalaia:
-
Iehova ia gwauhamata, ia idia atoa guna taudia totona dahaka do ia karaia?
HAIDA IDIA GWAU: “Egu famili durua totona lau gaukara goada be namo. Wiki ibounai kongrigeisen heboudia dekenai lau lao be auka.”
-
Edena Baibel siri ese oi ia durua dainai oi abia dae hanaihanai Iehova tomadiho henia karana oi atoa guna be abia hidi namona?
POINT BADANA
Moni gaukara bona moni be ita durua totona, to namo lasi unai ese Iehova hesiai henia gaukarana ia koua.
Riviu
-
Dahaka ese oi do ia durua moni gaukara dekenai lalohadai maorona oi abia totona?
-
Edena dala ai gau momo tahua lasi karana ese oi ia durua?
-
Edena dala ai Iehova ese ena taunimanima do ia durua gwauhamatana oi abidadama henia diba?
REFERENS ITAIA
Oi tahua bema Baibel ese moni ia gwauraia dika.
Dirava ese ia abia dae henia karana oi dibaia.
“Henia Karana Dekenai Baibel be Dahaka ia gwau?” (Websait atikol)
Moni gadara idauidau ese dika do ia havaraia lasi, a?
“Baibel Ena Lalohadai Moni Gadara Dekenai” (Noga!, March 2015)
Moni gadara idauidau bona henaohenao karana ia manadalaia tauna ese ena mauri ia haidaua ena sivarai oi duahia.
“Baibel ese Mauri Ia Haidaua” (Gima Kohorona, January 1, 2012)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
