LESENI 42
Baibel ese Singul Bona Headava Maurina be Edena Bamona Ia Herevalaia?
Tano haida ai, taunimanima idia abia dae bema ta ia headava do ia moale. To ita gwau lasi, headava taudia ibounai be idia moale, eiava singul taudia ibounai be idia moale lasi. To momokani Baibel ia gwau, headava bona singul maurina be Iehova amo ia mai harihari gauna.
1. Singul maurina ena namo haida be dahaka?
Baibel ia gwau: “Bema ta ia headava, unai be namo, to bema ta ia headava lasi, unai be namo herea.” (1 Korinto 7:32, 33, 38 duahia.) Edena dala ai singul tauna ena mauri be “namo herea”? Badina singul Keristani taudia be adavana lasi dainai, ta ena ura gaudia totona do idia lalohekwarahi lasi. Unai dainai, idia be mai edia nega bada gau momo idia karaia totona. Haida be Iehova ena hesiai gaukara idauidau idia karaia diba, hegeregere tano ma ta dekenai idia lao sivarai namona idia harorolaia totona. Bona mai anina bada gau be, edia hetura karana Iehova ida idia hagoadaia.
2. Dala maorona ai idia headava ena namo be dahaka?
Headava be mai ena namo, singul maurina hegeregerena. Baibel ia gwau “taunimanima rua ese tau tamona idia hereaia.” (Hadibaia Tauna 4:9) Unai be momokani Keristani taudia dekenai, badina edia headava lalonai Baibel ena hakaua herevadia idia badinaia. Dala maorona ai idia headava taudia be gwauhamata idia karaia, ta ta do idia lalokau henia, matauraia bona laloa bada. Unai dainai, idia mamia edia hetura karana be ia goada bona edia natudia do idia noho namonamo. To idia noho hebou kava taudia edia ruma bese maurina be unai bamona lasi.
3. Iehova ena lalohadai headava dekenai be dahaka?
Iehova ese tau bona hahine ginigunana edia headava ia karaia neganai, ia gwau: “Tau ese ena tamana bona sinana do ia rakatania bona ena hahine danu do ia hakapua.” (Genese 2:24) Iehova ia ura tau bona hahine be edia mauri ibounai lalonai, do idia noho hebou bona lalokau heheni. To, bema idia ta ia heudahanai, Dirava ese gwaumaoro ia henia headava idia hadokoa totona. Unai ia vara neganai, Iehova ese kerere lasi tau eiava hahine dekenai gwaumaoro ia henia ena adavana do ia divosia eiava lasi. a (Mataio 19:9) Iehova ese Keristani taudia dekenai gwaumaoro ia henia lasi adavana momo idia abia totona.—1 Timoteo 3:2.
DIBA MA HAIDA ABIA
Ena be oi singul o oi headava, oi moale bona Iehova oi hamoalea dalana oi dibaia.
4. Singul maurina oi gaukaralaia namonamo
Iesu ese singul maurina be harihari gauna ta bamona ia laloa. (Mataio 19:11, 12) Mataio 4:23 duahia, bena inai henanadai herevalaia:
-
Edena dala ai Iesu be singul maurina ia gaukaralaia ena Tamana ia hesiai henia bona ma haida ia durua totona?
Iesu bamona, Keristani taudia ese edia singul maurina idia moalelaia diba. VIDIO itaia, bona henanadai herevalaia.
-
Singul Keristani taudia ese edena dala namodia ai edia mauri idia gaukaralaia diba?
Inai oi diba, a?
Baibel ese mauri lagani ia gwauraia lasi headava totona. To, Baibel ese matamata tauna ia hagoadaia do ia naria ela bona “matamata negana ia hanaia,” badina unai nega ai mahuta hebou urana be ia goada, bona mai aonega ida abia hidi maorona do ia karaia be auka.—1 Korinto 7:36.
5. Mai aonega ida emu adavana oi abia hidi
Ta oi adavaia totona oi karaia abia hidi be mai anina bada. Mataio 19:4-6, 9 duahia, bena inai henanadai herevalaia:
-
Dahaka dainai Keristani ta be headava totona ia haraga lasi be namo?
Baibel ena heduru amo adavana namona ai do ia lao tauna ena kara namodia do oi dibaia. Mai anina bada gauna be, oi ura adavaia tauna ese Iehova ia lalokau henia be namo. b Korinto Ginigunana 7:39 bona 2 Korinto 6:14 duahia. Bena inai henanadai herevalaia:
-
Dahaka dainai Keristani tauna sibona ita adavaia be namo?
-
Bema Iehova ia lalokau henia lasi tauna ta ita adavaia, oi laloa Iehova ena hemami be edena bamona?
Bema animal idaudia rua idia kwatua hebou, unai animal be hisihisi do idia mamia. Unai hegeregerena, bema Keristani ta be Witnes lasi tau o hahine ia adavaia, hekwakwanai momo do ia davaria
6. Iehova ena lalohadai headava dekenai abia
Idaunega Israela ai, tatau haida ese sibodia edia ura idia laloa dainai edia adavadia idia divosia. Malaki 2:13, 14, 16 duahia, bena inai henanadai herevalaia:
-
Dahaka dainai koikoi dalana ai headava hadokoa karana be Iehova ese ia inai henia?
Heudahanai bona divos karana ese ia kerere lasi adavana bona natudia ia hahisia bada
VIDIO itaia, bona henanadai herevalaia.
-
Bema emu adavana be Iehova ia lalokau henia lasi tauna, dahaka do oi karaia emui headava lalonai umui moale totona?
7. Iehova ena taravatu headava dekenai badinaia
Tau ta be Iehova ena taravatu headava dekenai ia badinaia totona, do ia gaukara goada. c To Iehova ese unai bamona idia karaia taudia ia hanamoa. VIDIO itaia.
Heberu 13:4 duahia, bena inai henanadai herevalaia:
-
Oi laloa Iehova ena taravatu headava dekenai be mai ena namo, a? Dahaka dainai unai bamona oi haere?
Iehova ia ura Keristani taudia ese edia headava bona divos do idia rejistaia, badina tano momo ai unai be gavamani ena taravatu. Tito 3:1 duahia, bena inai henanadaia herevalaia:
-
Bema oi headava vadaeni, emu headava be gavamani ena taravatu hegeregerena oi rejista, a?
REANA TA DO IA HENANADAI: “Dahaka dainai gavamani ena taravatu hegeregerena egu headava do lau rejista?”
-
Edena bamona do oi haere?
POINT BADANA
Singul bona headava maurina be Iehova ena harihari gauna. Singul bona headava taudia do idia moale bema edia mauri be Iehova ena ura hegeregerena idia noholaia.
Riviu
-
Edena dala ai ta be ena singul maurina ia gaukaralaia namonamo diba?
-
Dahaka dainai Baibel ia gwau Iehova ia lalokau henia tauna sibona ita adavaia be namo?
-
Baibel ena taravatu ai headava hadokoa ena badina tamona be dahaka?
REFERENS ITAIA
“Lohiabada lalonai sibona” headava ena anina be dahaka?
“Duahia Taudia Edia Henanadai” (Gima Kohorona, October 1, 2004)
Inai vidio kwadogidia rua itaia, unai amo ta oi tura henia bona oi adavaia totona abia hidi maorona oi karaia dalana do oi dibaia.
Do oi itaia dahaka dainai tadikaka ta ia gwau, Iehova ese ia dekenai ia henia gaudia be ia dadaraia gaudia idia hereaia momokani.
Bema ta ia ura ena adavana amo ia divos o parara dahaka gaudia ia laloa guna be namo?
“Dirava ese Ia Hamatamaia Headava Dalana Matauraia” (Gima Kohorona, December 2018)
a Hereva Ma Haida 4 itaia, ena be heudahanai karana ia vara lasi, to headava idia hapararaia ena badina ma haida ia herevalaia.
b Tano haida ai, sina tama ese ta idia abia hidi edia natuna mero eiava kekeni ia adavaia totona. Bema unai bamona, lalokau tama sina ese do idia laloa gauna ginigunana be unai mero o kekeni be Iehova ia lalokau henia, to moni eiava dagi lasi.
c Bema ta ida oi noho to umui headava lasi, unai tau o hahine oi rakatania eiava oi adavaia be emu abia hidi.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
