Haheitalai ta laloa: Inai be Wednesday hanuaboi. Geoffrey, 17, be ruma ia hagoevaia murinai, ia ura ia laga-ani. TV ia on bena ena feivarit sea dekenai ia helai.

Unai negai, Tamana be iduara badinai ia gini, bona toana be ia moale lasi.

Bema oi be Geoffrey, dahaka do oi karaia?

Emu tama sina ida oi herevahereva karana be motuka ta oi taria noho bamona. Bema roadblock o gau haida be dala idia koua, dala idauna ma ta oi tahua diba.

 HAHEITALAI:

Kekeni ladana, Leah, ia gwau: “Lau itaia egu tamana ida lau herevahereva be ia auka. Nega haida ia lau hereva henia nega sisina daudau bamona, to gabeai do ia gwau, ‘Sori, oi be lau oi hereva henia, a?’”

LEAH ESE DAHAKA IA KARAIA BE NAMO?

1. Mai boiboi badabada ida ena tamana do ia hereva henia.

   Leah ia boiboi, “Inai be mai anina bada herevana! Oi kamonai!”

2. Iena tamana do ia hereva henia lou lasi.

   Leah ia hesiku, ia ura lasi ena hekwakwanai be ena tamana dekenai ia herevalaia.

3. Ia naria bona gabeai ena tamana ida ia herevahereva.

   Leah ia naria diba bona gabeai ena tamana ida ia herevahereva, eiava leta ta ai ena hekwakwanai ia torea bena ena tamana dekenai ia siaia o henia.

Oi ura Leah be edena haere do ia abia hidi: A, B, o C?

MANI OI ALOA: Leah ena tamana be gau ta ia laloa noho​—⁠unai dainai, Leah ena lalohisihisi ena badina ia lalopararalaia lasi. So bema Leah be Haere A ia abia hidi, anina be ia boiboi badabada be anina lasi. Bona reana tamana be Leah ena hereva do ia kamonai lasi, bona ia hedinarai Leah be tamana ia matauraia lasi. (Efeso 6:2) Toana be Haere A be heduru do ia henia lasi.

Ena be Haere B be namo to unai be aonega karana lasi. Dahaka dainai? Badina Leah ese ena hekwakwanai ia hanaia totona, namona be ena tamana ia hereva henia​—⁠bona ena tamana ese ia durua totona, ia ura ena natuna ena sivarai ia kamonai namonamo guna. Haere B be heduru do ia henia lasi.

Haere C be namo herea badina Leah ia ura lasi ena tamana ida ia herevahereva karana be gau ta ese ia koua. To ia naria bona gabeai ena tamana ida ia herevahereva. Bona bema Leah be leta ta ai ena hekwakwanai ia torea bena ena tamana dekenai ia siaia o henia, reana maoromaoro Leah ia moale.

Danu, Leah ese leta ai ia ura herevalaia gaudia ibounai be do ia torea hedinarai namonamo. Iena tamana ese leta ia duahia neganai, reana Leah ia ura herevalaia gauna o ena hekwakwanai do ia lalopararalaia namonamo. Unai dainai, Haere C ese Leah bona ena tamana do ia durua. Herevana eda tama sina ida ita herevahereva o idia dekenai leta ita siaia, to inai dala o Haere C be Baibel ena sisiba bamona, ia gwau: “Maino idia havaraia gaudia . . . ita tahua noho.”​—⁠Roma 14:19.

Oi ura Leah ese dahaka ma ia karaia diba?

Henuna laini dekenai, Leah ena kara ma ta oi torea. Bona unai haere ena namo o dika oi torea danu.

Emu haere be dahaka?

Unai ena namo o dika be dahaka?

Laloatao: Nega momo emu tama sina edia lalohadai, oi gwauraia herevana dekenai be do ia idau.

HEGEREGERE:

Emu tama sina be oi idia nanadaia, ‘Dahaka dainai oi badu?’ Oi gwau, “Lau ura lasi unai lau herevalaia.”

To emu tama o sina oi hamaoroa: “Oi lau trastia lasi dainai emu heduru lau ura lasi. Egu turadia dekenai egu hekwakwanai do lau herevalaia to oi dekenai lasi.”

Mani oi laloa: Oi be hekwakwanai badana oi davaria noho bona emu tama sina idia ura oi idia durua. To oi gwau: “Umui laloa momo lasi. Lau sibona lau huaia diba.”

• Reana emu tama sina be unai idia kamonai.

• Edena dala ai idia oi haere henidia be maoro?