Haheitalai ta laloa: Karen be pati gabunai ia ginidae bena miniti 10 bamona murinai ena turana ena gadona ia kamonai, ia gwau.

Karen ia giroa bona ia itaia ena turana Jessica ena imana ai be bia rua ia dogoatao. Jessica ese bia ta be Karen ia henia bona ia gwau: “Oi be kekeni badana vadaeni, oi moale, a?”

Karen ia ura bia ia dadaraia, to ena turana Jessica ia laloa. Bona Karen ia gwau, ‘Lau ura lasi Jessica ia laloa ia dekenai lau hesiku. Danu, Jessica be kekeni namona ta. Bona bema Jessica ia inuinu, reana bia be dika momokani lasi.’ Karen be ia sibona dekenai ia gwau, ‘Inai be bia sibona. Ia be drag ania karana bamona lasi.’

Bema oi be Karen, dahaka do oi karaia?

Inai bamona hahetoho ai disisen maorona oi karaia totona, oi be dahaka oi diba be namo. Anina be oi laloa bada gaudia bona biliv o abidadama henia gaudia oi diba be namo. Unai diba oi abia dainai, haida be emu mauri do idia biagua lasi, to oi sibona ese emu mauri do oi biagua.​—⁠1 Korinto 9:26,27.

Edena dala ai emu mauri oi biagua diba? Namona be henanadai foa oi haerelaidia.

Emu aonega bona kara namodia oi diba neganai, unai ese emu goada do idia habadaia.

BAIBEL ENA HAHEITALAI: Aposetolo Paulo ia gwau: “Ena be egu hereva be mamina lasi, to egu diba be bada.” (2 Korinto 11:6) Paulo be Toretore Helagadia ia diba namonamo dainai ia gini goada, herevana haida be dahaka hereva idia gwauraia. Oibe, haida edia hereva ese Paulo ia hamanokaia lasi.​—⁠2 Korinto 10:10; 11:5.

OI SIBONA OI SEKEA: Henunai, oi diba karana (talent eiava skill) ta oi torea.

Henunai, emu kara namona ta oi torea. (Hegeregere, oi be haida oi hebogahisi henia, a? Oi be hariharibada tauna, a? Oi sibona ese gaukara ta oi karaia namonamo diba, a? Oi be taim oi laloa bada tauna dainai oi ura lasi leiti, a?)

Seini ta do ia makohi bema ena kahana ta ia manoka. Unai hegeregerena, bema emu manoka gaudia ese emu mauri idia biagua, oi laloa bada gaudia bona oi biliv gaudia idia senisi haraga diba.

BAIBEL ENA HAHEITALAI: Paulo be ena manoka gaudia ia diba. Ia gwau: “Lauegu kudouna ai Dirava ena taravatu lau moalelaia momokani. To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatuna ia tuari henia, bona inai kara dika ena taravatu ese igui hesiai tauna bamona lau ia hakaua.”​—⁠Roma 7:22,23.

OI SIBONA OI SEKEA: Edena manoka gauna biagua dalana oi dibaia be namo?

Oi be taksi ta ai do oi guia bena draiva do oi hamaoroa strit tamona dekenai ia heau giroagiroa ela bona motuka ena fuel ia ore, a? Lasi, unai be aonega karana lasi​—⁠bona moni bada do oi negea!

Dahaka oi dibaia? Tahua gaudia oi atoa neganai, emu mauri be mai anina bada. Oi diba edeseni do oi lao bona edena dala do oi badinaia.

BAIBEL ENA HAHEITALAI: Paulo ia gwau: “Lau be dala ia diba lasi bona ia heau kava tauna bamona lau heau lasi.” (1 Korinto. 9:26) Paulo be ia naria lasi ela bona hoa karadia idia vara ia dekenai, lasi, to ia ese tahua gaudia ia atoa bena ia hekwarahi unai ia hagugurua o ia abia totona. ​—⁠Filipi 3:12-14.

OI SIBONA OI SEKEA: Henunai, vaira lagani ai oi ura tahua gaudia toi oi torea hedinarai.

Bema oi be mai emu abidadama, disisen maorona do oi karaia. Gesoa (Chameleon gaigai) ta hegeregerena, reana emu kala do oi senisia badina emu turadia oi tohotohoa​—⁠unai ese ia hahedinaraia oi laloa bada gaudia bona oi biliv gaudia be idia senisi vadaeni.

To, emu abidadama ese emu kara idia biagua neganai, oi laloa bada gaudia bona oi biliv gaudia do idia senisi lasi​—⁠herevana haida be dahaka do idia karaia.

BAIBEL ENA HAHEITALAI: Peroveta tauna Daniela be ia mero matamata neganai, “ena lalona ia hadaia vadaeni,” ia be Dirava ena taravatu do ia badinaia, herevana ena famili kahirakahira ia noho lasi. (Daniela 1:8, NWT) Unai bamona ia karaia dainai, ena kara korikoridia ia badinaia noho. Daniela be ena abidadama ese idia durua dainai, ia abia dae kara maorodia ia karaia.

OI SIBONA OI SEKEA: Emu abidadama be edena bamona? Hegeregere, Dirava oi abidadama henia, a? Bema oi gwau, “Oibe,” dahaka dainai? Dahaka gaudia amo oi hamomokania Dirava be ia mauri noho?

Oi abia dae Dirava ena kara maoromaoro taravatudia be oi do idia durua namonamo, a? Bema oi gwau, “Oibe,” dahaka dainai?

Lai ia toa neganai, au amo ia moru rauna be do ia roho loaloa to lai badana ia toa neganai, au be gabunai do ia gini goada​—⁠oi ura oi be rau bamona o au bamona? Namona be oi laloa bada gaudia bona oi biliv gaudia oi dogoatao auka, unai amo oi be unai au bamona do oi gini goada. Bona unai ese oi do ia durua inai henanadai oi haerelaia totona, Lau be Daika?