NEW YORK (U.S.A.) tauna ta ia gwau: “Egu natuna mero Jonathan ese aiemai gabu amo kilomita haida dekenai idia noho turadia haida ia vadivadi henidia. Egu adavana, Valentina, ia ura lasi unuseniai ia loaloa. Valentina ia gari bada badina motuka be momo. To Jonathan be paua masini gaudia ia ura henia momo, bona iena turadia edia gabu dekenai idia noho masini ia gaukaralaia diba, iena diba ia habadaia totona. Lau be aiemai ruma, Manhattan ena west kahanai, New York, dekenai lau noho. Egu adavana be Puerto Rico dekenai iena varavara taudia ia vadivadi henidia. Lau laloa, ‘Jonathan be kahirakahira do ia giroa.’ Bena iduara dekenai ta ia rini. Lau laloa: ‘Ia mai inai.’ To ia mai lasi. Unai be pulisi bona medikol taudia. Pulisi ofesa ia henanadai, ‘Inai draiva laiseni oi diba, a?’ Lau haere: ‘Io, unai be egu natuna, Jonathan, ena.’ Ia gwau: ‘Oi dekenai sivarai dikana ai mailaia. Aksiden ta ia vara, bona . . . emu natuna mero, . . . emu natuna mero ia mase.’ Egu lalohadai ginigunana be, ‘Lasi! Unai be maoro lasi!’ Unai sivarai dikana dekenai ai hoa bada, bona lagani momo murinai, emai kudouna lalonai ia havaraia hisihisina be ia do noho.”

 Unai sivarai ia hahedinaraia natuna ta ia mase neganai, tama sina ese idia abia lalohisihisina ia bada bona ia boio lasi bamona. Doketa ta ena hereva be momokani, ia toretore, ia gwau: “Natuna ta ia mase neganai, nega momo unai be taunimanima badana ta ia mase ena dika bona ena hisihisi ia hanaia, badina ita laloa lasi ruma bese lalonai natuna do ia mase. . . . Natuna ta ia mase neganai, gabeai emui ura haida do umui hagugurudia lasi, hegeregere, emui [natuna, ravana hahine, tubudia] oi bamodia lasi, bona ia ida hetura karana do umui davaria diba lasi . . . unai gaudia be umui do moalelaidia lasi.” Bona hahine bogana lalonai ena natuna ia dika neganai danu, ena mamina be gau ta ia haboioa.

Ena adavana ia mase dainai lalona dekenai ia tai headava hahinena ta ia gwau: “Egu adavana, Russell, be Tanobada Ibounai Tuarina Iharuana neganai Pacific ena tuari gabuna ai medikol gaukarana ia karaia. Ia ese tuari dikadia haida ia itaia, bona unai tuari amo ia roho mauri. Tuari murinai United States dekenai ia giroa, bona mai  ena maino mauri dalanai ia noho. Gabeai Dirava ena Hereva harorolaia hesiai tauna ta ai ia lao. Lagani 60 ia abia murinai, ia be kudou gorere ia davaria. Ena mauri lalonai tauanina ia gaukaralaia momo. Bena, dina ta July 1988 lalonai, iena kudouna ia gaukara lasi bena ia mase. Ia mase dainai lau daradoko. Lau bamahuta henia diba lasi. Ia be egu adavana sibona lasi. Ia be egu turana namo hereana danu. Ai be lagani 40 lalodiai ai noho hebou. Hari, lau be sibogu lau noho ena mauri dala idauna lau davaria.”

Tanobada hegegemadai, dina ta ta iboudiai, ruma bese tausen momo be dika idia davaria, bona ai gwauraia sivaraidia be haida sibona. Edia lalona dekenai idia tai taudia momo be do idia gwau, mase ese emu natuna, emu tau, emu hahine, emu tamana o sinana, eiava emu turana ia abia neganai, ia be momokani Keristani toretore tauna Paulo ese ia gwauraia gauna hegeregerena, ia be “inai tauna ginigabena.” Nega momo taunimanima be unai bamona sivarai dikana idia kamonai neganai, idia ura lasi idia abia dae, idia gwau, “Lasi! Unai be maoro lasi! Lau abia dae lasi.” Unai murinai ma gau haida idia karaia danu, bona gabeai unai do ita itaia.​—1 Korinto 15:​25, 26, NW.

To, mase dainai ta be ena lalona dekenai ia tai karana ita do herevalaia lasi neganai, namona be henanadai badadia haida ita haerelaidia. Ta ia mase neganai, anina be unai tauna ia ore vadaeni, a? Iseda lalokau taudia ita itaia lou diba helarona ta ia noho, a?

Baibel toretore tauna Paulo ia gwau, “inai tauna ginigabena,” mase, do ia ore helarona ta ia noho. Ia toretore, ia gwau: “Dirava ese mase danu do ia haorea.” (1 Korinto 15:26) Dahaka dainai Paulo ia diba unai hereva be momokani? Badina mase amo Dirava ese ia hatorea isi lou tauna, Iesu Keriso, ese ia hadibaia. (Kara 9:​3-19) Unai dainai Paulo be inai ia torea diba danu, ia gwau: “Tau tamona [Adamu] dekena amo mase ia vara, bona inai bamona danu, tau tamona [Iesu Keriso] dekena amo mase dekena amo toreisi lou ia vara. Badina be taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.”​—1 Korinto 15:​21, 22.

Iesu be Naina vabu hahinena ia davaria, bona ena mase natuna ia itaia neganai, unai ese Iesu ena lalona ia hahisia. Baibel sivaraina ese ita ia hadibaia, ia gwau: “[Naina] hanua maguna ena iduara badana dekenai [Iesu ia] raka kahirakahira lao neganai, haida ese mase tauna ta idia huaia murimuri dekenai, vabu ta ena natuna tamona sibona ia vara. Hanua taudia momo herea ese inai vabu danu idia lao. Lohiabada ese vabu ia itaia, vadaeni ia bogahisihisi henia, ia hereva henia, ia gwau, ‘Oi tai lasi.’ Vadaeni Iesu ia raka kahirakahira lao, mase patana dekenai ia dogoatao. Idia huaia taudia be idia gini. Vadaeni ia hereva, ia gwau, ‘Uhau tauna e, lau hereva henia oi dekenai, oi toreisi.’ Vadaeni mase tauna ia helai, ia hereva. Vadaeni Iesu ese iena sinana dekenai ia henia. Ibounai idia gari dikadika, vadaeni Dirava dekenai idia hanamoa, idia gwau, ‘Peroveta tauna badana ta iseda huanai ia hedinarai vadaeni!’ Ma idia gwau, ‘Dirava ese iena bese taudia hamauria totona ia mai vadaeni!’ ”​—Luka 7:​12-16.

Edia matadia vairanai, Iesu ese unai mero ia hatorea isi lou, bona idia laloaboio diba lasi. Unai nega ia do mai lasi neganai, Iesu ese toreisi lou negana, “guba matamatana” henunai tanobada dekenai taunimanima do idia mauri lou negana, ia perovetalaia, bona ia ese unai toreisi lou ena toana ia karaia unai. Guna ia peroveta neganai, Iesu ia gwau: “Inai kara dekenai do umui hoa lasi.  Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”​—Apokalupo 21:​1, 3, 4; Ioane 5:​28, 29; 2 Petero 3:13.

Toreisi lou karana idia itaia taudia ma haida be Petero, bona Iesu ida idia loaloa taudia 12 haida danu. Ia toreisi lou vadaeni tauna Iesu ena gadona idia kamonai, ia be Galilea Gohuna badinai ia hereva neganai. Unai sivarai ese ita ia hadibaia, ia gwau: “Iesu ese ia boiria idia dekenai, ia gwau, ‘Umui mai, umui aniani.’ Vadaeni diba tahua taudia edia lalona idia hegeregere lasi do idia nanadaia ia dekenai, do idia gwau, ‘Oi be daika?’ Badina idia diba unai be Lohiabada. Vadaeni Iesu be ia mai, paraoa ia abia, ia henia idia dekenai, bona gwarume danu. Unai be nega ihatoina Iesu be iena diba tahua taudia dekenai ia hedinarai, ia toreisi lou murinai.”​—Ioane 21:​12-14.

Unai dainai, Petero be mai ena diba momokani ida ia toretore diba, ia gwau: “Dirava, iseda Lohiabada Iesu Keriso ena Tamana do ita hanamoa bada. Iena bogahisihisi ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua.”​—1 Petero 1:3.

Aposetolo Paulo be iena helaro ia dogoatao momokani, bona inai bamona ia herevalaia: “Mose ena taravatu bona peroveta bukadia lalonai idia torea gaudia ibounai lau abidadama henia noho. Lau be mai egu abidadama Dirava dekenai, inai lau idia samania taudia hegeregere. Aiemai abidadama be inai: Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 24:​14, 15.

Unai dainai taunimanima milioni momo be mai edia helaro goadana, idia diba edia lalokau taudia be do idia mauri lou bona do idia itaia lou tanobada dekenai, to edia mauri dalana be do ia idau momokani. Unai mauri dalana idauna be edena bamona? Inai buklet ena kahana ginigabena ai, ladana “Mase Taudia Edia Helaro Momokanina,” iseda mase lalokau taudia do ita itaia lou helarona, Baibel amo, ena hereva ma haida do ita herevalaidia.

To bema emu lalokau tauna ta ia mase bona emu lalona dekenai oi tai dainai reana henanadai haida oi abia; namona be unai ita lalodia guna: Edia lalona dekenai inai bamona idia tai be vaia taunimanima momo edia kara, a? Edena bamona egu lalona dekenai lau tai karana lau haheaukalaia diba? Lau goada noho totona ma haida be dahaka idia karaia diba lau idia durua totona? Edia lalona dekenai idia tai taudia ma haida be edena bamona lau durudia diba? Bona henanadai badana be inai: Mase taudia do idia toreisi lou helarona dekenai Baibel be dahaka ia gwau? Egu lalokau taudia do lau itaia lou, eiava? Bona edeseniai do lau itaia?