LAGANI 25 hahinena ta ia toretore, ia gwau: “Lau ia ubua sinana be lagani 1981 lalonai kensa dainai ia mase. Ia mase dainai, lau bona egu taihuna, heubu merona ai hekwarahi bada. Egu lagani be 17, bona egu taihuna merona be 11.

Egu sinana lau laloa momo. Lau idia hadibaia ia be guba dekenai ia lao, unai dainai, lau ura lau sibogu lau alaia mase, bena ia danu lau noho diba. Ia be egu turana namona.”

Mase be mai ena siahu emu lalokau tauna ta ia kokia totona be maoro lasi momokani. Bona mase ia vara neganai, emu lalokau tauna do oi hereva henia lou diba lasi, ia ida do oi kiri hebou diba lasi, bona oi daua toho diba lasi, unai oi laloa neganai emu lalona ia hametaua bada. Bema oi idia hadibaia emu lalokau tauna be guba dekenai ia noho, reana unai lalohisihisi ia kokia lasi.

To Baibel ese ia gwauraia helarona be idau. Guna ai hereva vadaeni bamona, Buka Helaga ese ia hahedinaraia, kahirakahira emu mase lalokau tauna ida do oi noho hebou lou diba, unai be oi diba lasi guba gabuna dekenai lasi, to iniseniai, maino bona kara maoromaoro tanobadana dekenai. Unai neganai, taunimanima be mai edia goevadae tauanina bona mauri dalana do idia moalelaia diba, bona do idia mase lou lasi. To reana haida idia gwau, ‘Unai be lalohadai kava gauna sibona!’

Edena bamona do oi abia dae diba unai be helaro momokanina? Gwauhamata ta oi abia dae totona, namona be oi diba gwauhamata ia karaia tauna ia ura ia hamomokania, bona do ia hagugurua diba. Unai dainai, daika ia gwauhamata mase taudia be do idia mauri lou?

Lagani 31 C.E. ena siahu negana be kahirakahira lalonai, Iesu Keriso be gari lasi dekenai ia gwauhamata: “Tamana ese mase taudia ia hatorea isi, bona ia hamauridia hegeregerena, Natuna danu ese ia lalokau henia taudia be ia hamauridia lou diba. Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena [Iesu ena] gadona do idia kamonai. Vadaeni guria gabu dekena amo do idia toreisi.” (Ioane 5:​21, 28, 29) Oibe, Iesu Keriso ia gwauhamata idia mase vadaeni taudia milioni momo be inai tanobada dekenai do idia mauri lou, bona ela bona hanaihanai maino bona paradaiso gabuna do idia noholaia diba. (Luka 23:43; Ioane 3:16; 17:3; mani Salamo 37:29 bona Mataio 5:5 itaia.) Iesu ese unai gwauhamata ia gwauraia dainai, ita laloa diba  ia ura do ia hagururua. To ia karaia diba, a?

Unai gwauhamata ia karaia negana amo lagani rua idia do ore lasi neganai, Iesu ese dala badana ai ia hahedinaraia ia ura toreisi lou ia karaia, bona ia be mai ena siahu do ia karaia totona.

Madi, unai be hebogahisi bada karana. Lasaro ia gorere bada. Iena taihudia rua, Maria bona Mareta, be hereva idia siaia Iesu dekenai; Iesu be Ioridane Sinavai kahanai ia noho: “Lohiabada e, oiemu lalokau tauna be ia gorere noho.” (Ioane 11:3) Idia diba Iesu ese Lasaro ia lalokau henia. Iesu be do ia ura iena gorere turana ia itaia, ani? To karaharaga Betania dekenai ia lao lasi, Iesu be dina rua lalodiai iena gabu dekenai ia noho.​—Ioane 11:​5, 6.

Lasaro ia gorere ena sivarai idia siaia nega sisina murinai, Lasaro ia mase. Iesu ia diba Lasaro be edena negai ia mase, bona ia ura gau ta do ia karaia. Iesu be Betania dekenai ia ginidae neganai, iena turana namona be dina hani lalodiai ia mase vadaeni. (Ioane 11:​17, 39) Dina hani lalodiai ia mase vadaeni tauna be Iesu ese ia hamauria lou diba, a?

Ia kamonai Iesu ia mai neganai, gaukara hahinena Mareta ia heau murimuri dekenai, Iesu ia hedavaria henia totona. (Luka 10:​38-42 itaia.) Mareta ia lalohisihisi ia itaia dainai Iesu ena lalona ia marere, bona Mareta ena lalona ia hagoadaia, ia gwau: “Oiemu taihuna be do ia toreisi lou.” Mareta ia hahedinaraia ia be gabeai do ia vara toreisi lou negana ia abidadama henia, vadaeni, ia dekenai Iesu ia hereva maoro, ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.”​—Ioane 11:​20-25.

Gara gabuna ai ia ginidae neganai, Iesu ese ia hadibadia kohua ena iduara ia koua nadina idia kokia. Bena hereva badabada amo ia guriguri murinai, ia boiboi: “Lasaro e, oi mai murimuri dekenai.”​—Ioane 11:​38-43.

 Iboudiai be gara gabuna idia raraia. Dibura lalona amo tau ta ia raka lasi. Iena aedia bona imadia be dabua amo idia kumidia, bona iena vairana be dabua amo idia kumia. Iesu ese ia haganidia: “Kumia dabua umui kokia, umui rakatania.” Idia kokia kumia dabua ginigabena be tano dekenai ia moru. Oibe, unai be Lasaro, dina hani lalodiai ia mase vadaeni tauna!​—Ioane 11:44.

Lasaro hatorea isi lou karana be Ioane ena Evanelia lalonai ia torea ia be vara momokani sivaraina ta. Hereva maragimaragi iboudiai idia torea namonamo, unai dainai ita gwau diba lasi unai be gori kava sibona. Bema ita gwau unai be sivarai momokanina ta lasi, unai be hegeregere ita gwau Baibel ese ia gwauraia hoa karadia iboudiai idia vara lasi, Iesu Keriso ia toreisi lou sivaraina danu. Bema ita gwau Iesu ia toreisi lou lasi, anina be Keristani abidadama herevadia iboudiai ita dadaraia.​—1 Korinto 15:​13-15.

Bema oi abia dae Dirava ia noho momokani, toreisi lou do ia vara herevana dekenai do oi hekwakwanai lasi. Haheitalai ta be inai: Tau ta be vidio dekenai iena ura bona hereva ginigabedia ia atoa diba. Bena ia mase murinai, iena varavara bona turadia be vidio amo ia do idia itaia bona ena hereva idia kamonai diba, iena kohu bona tano idia gaukaralaia totona dahaka do idia karaia be namo ia hamaorodia diba. Lagani handred tamona gunanai, idia laloa lasi unai bamona do ia vara diba. Bona hari inai negai, tanobada ena daudau gabudia taudia haida idia daradara bada vidio masini ena gaukara dalana dekenai, bona idia laloa ia be hoa gauna ta. Bema taunimanima be Havaraia Tauna ese ia gwauraia saiens taravatudia idia gaukaralaia diba, tau ta ena hereva bona toana idia hahedinaraia lou totona, vadaeni, mauri ia Havaraia Tauna be taunimanima ia hamauria lou diba, ani?

Lasaro be mase amo ia toreisi lou hoa karana dainai, taunimanima edia abidadama Iesu dekenai bona toreisi lou dekenai ia hagoadaia. (Ioane 11:​41, 42; 12:​9-11, 17-19) Lalona hamarerea dalana ai, ia hedinarai danu, Iehova bona iena Natuna be mai edia ura danu toreisi lou do idia karaia.

Iesu be Lasaro ia mase ia kamonai neganai, iena kara ese ia hahedinaraia Dirava ena Natuna be mai ena hebogahisi bada. Unai neganai, ia karaia hebogahisi karana ese ia hahedinaraia goevagoeva, ia ura bada mase taudia do ia hatoredia isi lou. Ita duahia, ia gwau: “Maria be Iesu ia noho gabuna dekenai ia ginidae, ia itaia, vadaeni ia ese Iesu ena aena badinai iena kwarana ia atoa diho, ia gwau, ‘Lohiabada e, iniseni bema oi noho, be egu taihuna ia mase lasi.’ Maria bona inai Iuda taudia ia danu idia raka hebou, be idia taitai, vadaeni Iesu ese idia ia itaia, be iena lalona ia hisihisi bada, mamina ia abia momokani. Vadaeni ia henanadai, ia gwau, ‘Edeseni umui atoa?’ Idia haere, idia gwau, ‘Lohiabada e, oi mai, oi itaia.’ Iesu ia tai. Vadaeni Iuda taudia idia gwau, ‘Umui itaia, ia ese ia lalokau henia bada.’ ”​—Ioane 11:​32-36.

Unai sivarai dekenai, inai hereva rua “iena lalona ia hisihisi bada,” bona “ia tai” ese idia hahedinaraia Iesu be kudouna amo ia hebogahisi. Unai hereva be guna idia torea gadona ai idia hahedinaraia, Iesu ena turana namona Lasaro ia mase dainai bona ia itaia Lasaro ena taihuna ia tai neganai, Ia danu ia tai bona mata ranudia idia diho. *

Ita laloa bada gauna be Iesu ese taunimanima rua ia hamauridia lou vadaeni. Bona Lasaro dekenai  unai bamona ia karaia gwauraia danu. (Ioane 11:​11, 23, 25) To, “ia tai.” Unai dainai, Iesu ia laloa taunimanima hamauridia lou karana be gaukara ta sibona lasi. Unai neganai, iena hebogahisi karana bona ena lalohisihisi ia hahedinaraia karana ese idia hahedinaraia goevagoeva, ia ura momokani mase ena dika do ia haorea.

Iesu ‘ena toana be Iehova Dirava ena toana hegeregerena’ dainai, ita laloa diba iseda guba Tamana be unai bamona danu. (Heberu 1:3) Abidadama tauna Iobu be Iehova ena ura karana toreisi lou karaia totona ia herevalaia, ia gwau: “Bema tau ta ia mase, ia be do ia mauri lou, a?” “Do oi boiboi, bena oi dekenai lau sibona do lau haere. Oiemu imana edia gaukara do oi ura dikadika.” (Iobu 14:​14, 15, NW) Guna idia torea gadona dekenai, inai hereva “do oi ura dikadika” idia hahanaia neganai, ia hahedinaraia Dirava be ia ura bada do ia karaia. (Genese 31:30; Salamo 84:2) Ia hedinarai goevagoeva, Iehova be toreisi lou negana ia naria mai ena ura bada ida.

Toreisi lou gwauhamatana ita abia dae diba ia be momokani do ia vara gauna, a? Oibe, ita diba momokani Iehova bona iena Natuna idia ura bada do idia karaia, bona karaia totona idia be mai edia siahu. Oi dekenai anina be dahaka? Inai tanobada dekenai, emu mase lalokau taudia ida do oi noho hebou lou diba, to unai nega ai emui noho do ia idau momokani!

Iehova Dirava be taunimanima ia havaradia neganai, uma hairaina ta dekenai ia atodia, bona ia gwauhamata, gabeai, inai tanobada dekenai Paradaiso do ia havaraia lou, Iena guba Basileia henunai; unai neganai, hairai ia abia tauna Iesu Keriso ese do ia lohiaia. (Genese 2:​7-9; Mataio 6:10; Luka 23:​42, 43) Unai Paradaiso do ia vara lou neganai, taunimanima be mauri hanaihanai do idia moalelaia diba, do idia gorere lou lasi. (Apokalupo 21:​1-4; mani Iobu 33:25; Isaia 35:​5-7 itaia.) Danu, inai heheni karana, bese idauna ta dadaraia karana, bese idauna tuari henia karana, bona moni hekwarahi do idia ore. Unai bamona tanobada goevana lalonai Iehova Dirava be Iesu Keriso amo mase taudia do ia hatoredia isi lou.

Inai kahana ena hamatamaia hereva dekenai ai gwauraia Keristani hahinena ena helaro be unai. Iena sinana ia mase bena lagani momo murinai, Iehova ena Witnes taudia ese idia durua Baibel ia stadilaia namonamo totona. Ia gwau: “Toreisi lou helarona lau kamonai neganai, lau tai. Egu sinana do lau itaia lou lau diba dainai lau moale bada.”

Bema emu kudou lalonai oi ura ia bamona emu lalokau tauna do oi itaia lou, Iehova ena Witnes taudia be mai edia moale danu oi idia ura durua, bena do oi diba edena bamona unai helaro momokanina oi davaria diba. Namona be oi kahirakahira ia noho Kingdom Hall ta dekenai oi tahudia, eiava rau 32 dekenai ia noho adres ta dekenai oi tore henidia.